- జెన్ జెడ్ తిరుగుబాటు… డిజిటల్ వార్ షురూ
- నెటిజన్ల అసహనం… మోడీకి పెద్ద సవాల్
- రాజకీయ భవిష్యత్తుపై నీలినీడలు
- ‘న్యూయార్క్ టైమ్స్’ సంచలనాత్మక స్టోరీ
సహనం వందే, అమెరికా:
దశాబ్దాలుగా తిరుగులేని నేతగా చెలామణి అవుతున్న భారత ప్రధాని నరేంద్ర మోడీ ఇమేజ్కు ఇప్పుడు భారీ షాక్ తగులుతోంది. ఏళ్ల తరబడి సోషల్ మీడియాను గుప్పెట్లో పెట్టుకుని దేవుడిలా భావించిన ఆయనకు ఇప్పుడు కొత్త తరం నుంచి తీవ్రమైన సెగ తగులుతోంది. వీడియోలు, మీమ్స్, ఆగ్రహంతో డిజిటల్ ప్రపంచాన్ని కుదిపేస్తున్న యువత మోడీ సామ్రాజ్యానికి ఎదురునిలిచి ప్రశ్నల వర్షం కురిపిస్తోంది.
అజేయుడిగా మోడీ ఇమేజ్
భారత ప్రధాని నరేంద్ర మోడీ గడిచిన 10 ఏళ్లకు పైగా సోషల్ మీడియాను అత్యంత శక్తివంతమైన ఆయుధంగా వాడుకున్నారని ప్రముఖ అంతర్జాతీయ అమెరికా పత్రిక ‘న్యూయార్క్ టైమ్స్’ వ్యాఖ్యానించింది. దీనికి సంబంధించి శుక్రవారం ఆన్ లైన్ ఎడిషన్ లో ప్రత్యేక కథనం రాసింది. ఎక్కడా తప్పు చేయని దేవుడిలా తన ఇమేజ్ను ప్రజల్లో బలంగా నాటుకునేలా వ్యూహాలు రచించారు. సోషల్ మీడియా ప్లాట్ఫారమ్లన్నింటినీ తన చెప్పుచేతల్లో ఉంచుకుంటూ ప్రత్యర్థులపై పైచేయి సాధించారు. డిజిటల్ రంగంలో తిరుగులేని చక్రవర్తిగా ఆయన తనదైన ముద్ర వేసుకున్నారు. ఈ దశాబ్ద కాలంలో మోడీని ప్రశ్నించే నాథుడే లేడనే భ్రమను ఆయన వర్గం సృష్టించింది.
జెన్ జెడ్ కొత్త తరంగం
ఇప్పుడు సరికొత్తగా పుట్టుకొచ్చిన యువతరం రూపంలో మోడీకి గడ్డు పరిస్థితులు ఎదురవుతున్నాయి. జెన్ జీ అని పిలువబడే నేటి తరం యువత మోడీకి వ్యతిరేకంగా రోడ్డెక్కింది. కేవలం రోడ్ల మీదే కాకుండా డిజిటల్ రంగంలోనే ఆయనకు చుక్కలు చూపిస్తోంది. పదేళ్లుగా సాగుతున్న మోడీ ఏకఛత్రాధిపత్యానికి ఈ కొత్త తరం డిజిటల్ పోరు గట్టి ఎదురుదెబ్బ తగులుతోంది. ఏళ్ల నాటి మోడీ ఇమేజ్ను ఈ యువత ఒక్కసారిగా బద్దలు కొడుతోంది.
డిజిటల్ రణరంగంలో మీమ్స్ సునామీ…
మోడీని ఎదుర్కొనేందుకు నేటి యువత సోషల్ మీడియాయే అస్త్రంగా మలచుకుంది. వీడియోలు, మీమ్స్ రూపంలో విరుచుకుపడుతూ నెట్టింట పెను ప్రకంపనలు సృష్టిస్తోంది. మోడీ ప్రచార వ్యూహాలకు వ్యతిరేకంగా వినూత్న రీతిలో వ్యంగ్యాస్త్రాలు సంధిస్తోంది. అధికార పార్టీ సోషల్ మీడియా దళాలను సైతం ఈ యువత తమ డిజిటల్ వ్యూహాలతో కట్టడి చేస్తోంది. మీమ్స్, వీడియోల ద్వారా మోడీ ప్రభుత్వాన్ని కార్నర్ చేస్తూ డిజిటల్ నరేటివ్ను పూర్తిగా తమ చేతుల్లోకి తీసుకుంది.
మోడీ తీరుపై అసంతృప్తి
యువతలో ఆగ్రహం ఇప్పుడు తారాస్థాయికి చేరింది. మోడీ పరిపాలన తీరుపై వారి గుండెల్లో పేరుకుపోయిన అసంతృప్తి అగ్నిలా మండుతోంది. ఏమాత్రం భయపడకుండా తమ గళాన్ని సోషల్ మీడియా వేదికగా బహిరంగంగానే వినిపిస్తున్నారు. ఈ జనరేషన్ చూపుతున్న కోపం చాలా స్పష్టంగా కనిపిస్తోంది. ప్రభుత్వ మోసాలను ఎండగడుతూ ఈ యువత చేస్తున్న పోరాటం దేశవ్యాప్తంగా సంచలనం సృష్టిస్తోంది.
ఏళ్ల నాటి కోట కదిలిపోతోంది
పదేళ్ల కాలంలో ఎవరూ టచ్ చేయని విధంగా నిర్మించుకున్న మోడీ ఇమేజ్ ఇప్పుడు కరిగిపోతోంది. ఏ తప్పూ చేయలేదనే ఆయన దైవత్వం ఇమేజ్ను ఈ యువత తునాతునకలు చేస్తోంది. మోడీ ఎదుర్కొంటున్న సవాళ్లలో ఇదే అత్యంత ప్రమాదకరమైనదిగా రాజకీయ విశ్లేషకులు భావిస్తున్నారు. దశాబ్ద కాలంగా ఆయన సాగించిన డిజిటల్ రాజకీయాలకు ఈ యువత పోరాటంతో బ్రేక్ పడే సూచనలు స్పష్టంగా కనిపిస్తున్నాయి.
రాజకీయ భవిష్యత్తుపై నీలినీడలు
ఈ అనూహ్య పరిణామంతో రాబోయే రోజుల్లో మోడీ రాజకీయ ప్రస్థానంపై తీవ్ర ప్రభావం పడే అవకాశం ఉంది. డిజిటల్ రణరంగంలో ఓడిపోతున్నామనే భయం ఇప్పుడు అధికార పార్టీలో స్పష్టంగా కనిపిస్తోంది. యువత చూపుతున్న పట్టుదల మోడీని తీవ్ర ఇబ్బందుల్లోకి నెట్టేస్తోంది. దశాబ్ద కాలపు రాజకీయ ఆధిపత్యానికి ఈ డిజిటల్ తిరుగుబాటు రూపంలో పెద్ద ఎసరు పెట్టింది.
