- మైనర్ల భవితపై సుప్రీం కోర్టు ఆందోళన
- పోక్సో – చట్టమా? ఆయుధమా? అని ప్రశ్న
- చట్టం దుర్వినియోగంపై కోర్టు విమర్శలు
- పరువు కోసం క్రిమినల్ కేసులేంటని నిలదీత
- జైలుకు వెళ్తున్న టీనేజర్లు… దేశంలో టెన్షన్
సహనం వందే, న్యూఢిల్లీ:
పిల్లల రక్షణ కోసం తెచ్చిన చట్టం, ఇప్పుడు ఇళ్లల్లో పరువు పంచాయితీలకు ఆయుధంగా మారుతోంది. టీనేజ్ ప్రేమజంటలు ఇంటి నుంచి బయటకు అడుగుపెడితే చాలు… తల్లిదండ్రులు దాన్ని నేరుగా నేరంగా చిత్రీకరిస్తున్నారు. పోక్సో చట్టంలోని లొసుగులను వాడుకుని తమ పరువు కాపాడుకోవడానికి క్రిమినల్ కేసులను అస్త్రాలుగా మలుచుకుంటున్నారు. ఈ క్రమంలో అమాయకపు టీనేజర్ల జీవితాలు జైళ్ల పాలవుతున్నాయి. చట్టం గమ్యం ఎటు వైపు వెళ్తుందో అన్నదే ఇప్పుడు దేశవ్యాప్తంగా చర్చనీయాంశమవుతోంది.
కోర్టు ప్రశ్నల వర్షం
ప్రభుత్వం పారిపోయే జంటలను ఎలా ఆపగలదని సుప్రీంకోర్టు జస్టిస్ బీవీ నాగరత్న, జస్టిస్ ఆర్ మహాదేవన్ ధర్మాసనం ప్రశ్నించింది. పోక్సో చట్టం అనేది పిల్లలపై లైంగిక దాడిని అడ్డుకోవడానికి మాత్రమేనని ధర్మాసనం స్పష్టం చేసింది. 15 నుంచి 18 ఏళ్ల వయసు చాలా సున్నితమైనదని… ఆ వయసులో కుతూహలం సహజమని కోర్టు అభిప్రాయపడింది. ఇష్టపూర్వకమైన నిర్ణయాలు కూడా పోక్సో పరిధిలోకి వస్తాయా అని సుప్రీంకోర్టు నిలదీసింది.
వివాదాస్పద తీర్పుపై స్పందన
గతంలో కలకత్తా హైకోర్టు ఇచ్చిన ఒక తీర్పుపై సుప్రీంకోర్టు తీవ్ర అభ్యంతరం వ్యక్తం చేసింది. బాలికలు రెండు నిమిషాల సుఖం కోసం చూస్తే ఫెయిల్యూర్ గా మిగిలిపోతారని హైకోర్టు వ్యాఖ్యానించింది. టీనేజీ దశలో లైంగిక కోరికలను నియంత్రించుకోవాలని సూచించింది. ఈ వివాదాస్పద తీర్పును సుప్రీంకోర్టు పక్కనబెట్టింది. గోప్యత హక్కుకు సంబంధించి సుమోటో కేసును విచారించింది.
నివేదికలో కీలక అంశాలు…
సీనియర్ లాయర్ మాధవి దివాన్ కేసు ఒక ప్రస్తుత స్థితిని వివరించారు. 25 ఏళ్ల యువకుడితో మైనర్ బాలిక వెళ్లిపోయిన కేసు పరిష్కారమైందని తెలిపారు. కోర్టు నియమించిన కమిటీ, సామాజిక కార్యకర్తలు ఆ బాలికతో సంప్రదింపులు జరిపారు. పోక్సో కేసుల్లో వ్యవస్థ ఎలా విఫలమవుతుందో ఆ నివేదికలో స్పష్టమైంది. బాలిక ఇష్టపూర్వకంగానే వెళ్లిందని, వారికి ఒక బిడ్డ కూడా ఉందని దివాన్ కోర్టుకు వివరించారు.
జైలుకు వెళ్తున్న టీనేజర్లు
16 నుంచి 18 ఏళ్ల వయసులో జంటలు బంధాలను ఏర్పరచుకుంటున్నారు. పరువు కోసం తల్లిదండ్రులు వారిపై క్రిమినల్ కేసులు మోపుతున్నారు. ఫలితంగా యువకులను కోర్టులు నిర్దోషులుగా విడుదల చేయాల్సి వస్తోంది. ఆ అమ్మాయి తన భర్తతో కలిసి సంతోషంగా ఉన్నా చట్టపరమైన ఇబ్బందులు తప్పడం లేదు. టీనేజీలో ఉన్నవారి సంక్షేమం, బాలల రక్షణ కోసం బలమైన వ్యవస్థ అవసరమని లాయర్ వాదించారు.
అవగాహనపై కేంద్రం ప్రతిపాదనలు
17 నుంచి 18 ఏళ్ల వయసు వారిని జైలుకు పంపడం ఈ సమస్యకు పరిష్కారం కాదని కోర్టు పేర్కొంది. 2012లో సమ్మతి వయస్సును 16 నుంచి 18 ఏళ్లకు పెంచకముందే ఇలాంటి సంబంధాలు ఉండేవని తెలిపింది. కేంద్ర ప్రభుత్వం చేసిన సిఫార్సులను అమలు చేయాలని లాయర్ సూచించారు. 6వ తరగతి నుంచే పాఠ్యాంశాల్లో పోక్సో చట్టంపై అవగాహన కల్పించాలని కోరారు.
పర్యవేక్షణలో జాప్యం
పోక్సో కేసుల పర్యవేక్షణకు ప్రత్యేక డాష్బోర్డ్ ఉండాలని దివాన్ కోరారు. అయితే ప్రతి హైకోర్టులో ఇప్పటికే బాలల హక్కుల కమిటీ ఉందని సుప్రీంకోర్టు గుర్తు చేసింది. దీనిని కేంద్రమే పర్యవేక్షించాలనే ప్రతిపాదనతో కోర్టు ఏకీభవించలేదు. ఈ అంశంపై తదుపరి విచారణను జూలై 17కు వాయిదా వేసింది. చట్టం అమల్లో ఆచరణాత్మకమైన మార్పులు రావాలని సుప్రీంకోర్టు స్పష్టం చేసింది.
