- 35 ముక్కలుగా నరికి హత్య చేస్తే సత్కారమా
- విద్యా హక్కు పేరుతో కోర్టు కీలక నిర్ణయం
- నరరూప రాక్షసుడి పరీక్షకు ప్రత్యేక అనుమతి
- విచారణకు విరామం… పరీక్షకే ప్రాధాన్యం!
- రాక్షసులకు కూడా హక్కులు ఉంటాయా?
- న్యాయం, మానవ హక్కులపై మొదలైన చర్చ
సహనం వందే, న్యూఢిల్లీ:
శ్రద్ధా వాకర్ దారుణ హత్యోదంతం సభ్యసమాజం సిగ్గుతో తలదించుకునేలా చేసింది. ఒక మృగాడు ప్రియురాలిని అతి దారుణంగా హతమార్చి చేసిన నేరం దేశాన్ని కుదిపేసింది. ఇప్పుడు కటకటాల వెనుక ఉన్న ఆ హంతకుడు పరీక్షల కోసం విచారణను నిలిపివేయాలని కోరడం సంచలనం రేపుతోంది. ఒక హంతకుడి విద్యాభ్యాసానికి న్యాయస్థానం ప్రాధాన్యత ఇవ్వడం వెనుక ఉన్న మర్మం ఏంటో అర్థం కాక సామాన్యులు విస్మయానికి గురవుతున్నారు.
డేటింగ్ యాప్ ద్వారా పరిచయం…
శ్రద్ధా వాకర్, అఫ్తాబ్ అమీన్ పూనావాలా డేటింగ్ యాప్ ద్వారా పరిచయమయ్యారు. వారి మధ్య ఉన్న బంధం ఆ తర్వాత సహజీవనంగా మారింది. అయితే వారి మధ్య చిన్న చిన్న విషయాలకే గొడవలు జరిగేవి. ముఖ్యంగా శ్రద్ధా తన స్నేహితుడిని కలవడం అఫ్తాబ్కు అస్సలు నచ్చేది కాదు. ఈ చిన్న విషయమే ఇద్దరి మధ్య చిచ్చు పెట్టింది. తరచూ జరుగుతున్న ఈ గొడవలే చివరికి ప్రాణం తీసే స్థాయికి చేరుకున్నాయని పోలీసుల దర్యాప్తులో వెల్లడైంది.
గొంతు కోసి హత్య
2022న మే 18వ తేదీన వీరిద్దరి మధ్య ఘర్షణ పతాక స్థాయికి చేరింది. ఆ కోపంలోనే పూనావాలా శ్రద్ధా వాకర్ను అఫ్తాబ్ అమీన్ అత్యంత కిరాతకంగా గొంతు కోసి హత్య చేశాడు. హతమార్చిన తర్వాత నేరాన్ని కప్పిపుచ్చుకోవడానికి అతను అత్యంత క్రూరమైన మార్గాన్ని ఎంచుకున్నాడు. మృతదేహాన్ని ఏకంగా 35 ముక్కలుగా నరికి వాటిని 300 లీటర్ల ఫ్రిజ్లో దాచాడు. మృతదేహ భాగాలను పాతిపెట్టడానికి రంపం, సుత్తి, కత్తులను ఉపయోగించి మరీ అతడు ఈ ఘాతుకానికి ఒడిగట్టాడు.
నిందితుడి వికృత చర్యలు
శ్రద్ధా శరీర భాగాలను ఫ్రిజ్లో దాచిన సమయంలోనే అఫ్తాబ్ అదే ఇంటికి మరో యువతిని తీసుకురావడం మరింత సంచలనం సృష్టించింది. ఆ సమయంలో మృతదేహ భాగాలను బీరువాలోకి మార్చేవాడని విచారణలో తేలింది. హత్య చేసిన తర్వాత మృతదేహాన్ని ముక్కలు చేస్తున్నప్పుడు ఏమాత్రం చలించకుండా జొమాటోలో చికెన్ రోల్ తెప్పించుకుని తిన్నాడంటే అతని నేర ప్రవృత్తి ఎంతటిదో అర్థం చేసుకోవచ్చు. ఢిల్లీ శివార్లలోని అటవీ ప్రాంతంలో సుమారు మూడు వారాల పాటు ఆ శరీర భాగాలను పడేశాడు.
కోర్టు అనుమతి వెనుక మతలబు
ప్రస్తుతం తిహార్ జైలులో విచారణ ఖైదీగా ఉన్న అఫ్తాబ్… జైలులోనే ఉంటూ ఎంఏ సోషియాలజీ పరీక్షలకు సిద్ధమయ్యాడు. తన ఫైనల్ ఇయర్ పరీక్ష ఈ నెల 20న ఉండటంతో విచారణ నుంచి మినహాయింపు కోరాడు. పరీక్ష రాయడం నిందితుడి హక్కు అని భావించిన ఢిల్లీ కోర్టు… ఆ రోజు జరగాల్సిన విచారణను రద్దు చేస్తూ కీలక ఆదేశాలు జారీ చేసింది. హంతకుడి విద్యా హక్కులకు గౌరవం ఇవ్వడంపై సామాజిక వర్గాల్లో తీవ్ర చర్చ జరుగుతోంది.
న్యాయం కోసం నిరీక్షణ
శ్రద్ధా వాకర్ హత్య కేసులో ప్రతి చిన్న అంశం కీలకమైనది. అమీన్ పూనావాలా నేరాన్ని అఫ్తాబ్ ఒప్పుకున్నా విచారణలో జాప్యం జరగడం బాధితురాలి కుటుంబీకులను ఆందోళనకు గురిచేస్తోంది. నేరం జరిగిన తీరును బట్టి చూస్తే నిందితుడికి కఠినమైన శిక్ష పడాలని దేశం మొత్తం కోరుకుంటోంది. నిందితుడి పరీక్షల కారణంగా విచారణ వాయిదా పడటం వల్ల సత్వర న్యాయం అందడం లేదనే భావన వ్యక్తమవుతోంది. చట్టం తన పని తాను చేసుకుంటూనే హంతకుడి విద్యా హక్కులను కాపాడుతున్న తీరు చర్చనీయాంశంగా మారింది.
