- పాశ్చాత్య దేశాలలో బంధాలు పతనం
- వ్యక్తిగత స్వేచ్ఛ పెరగడమే ఇందుకు కారణం
- సంప్రదాయం ముక్కలవుతున్న పరిస్థితులు
- ఇండియాలో పెళ్లి పదిలం…1 శాతమే డైవర్స్
సహనం వందే, హైదరాబాద్:
ప్రపంచవ్యాప్తంగా వివాహ బంధం పునాదులు కదులుతున్నాయి. ఒకప్పుడు పవిత్రంగా భావించిన పెళ్లి నేడు విడాకుల కోర్టుల మెట్ల దగ్గర ఆగిపోతోంది. పశ్చిమ దేశాల్లో పరిస్థితి మరీ ఘోరంగా ఉంది. పోర్చుగల్, స్పెయిన్ వంటి దేశాల్లో అసలు పెళ్లి అనే వ్యవస్థ ఉంటుందా అనే అనుమానం కలుగుతోంది. పెళ్లిళ్ల సంఖ్యతో పోలిస్తే విడాకుల రేటు ఆకాశాన్ని తాకుతోంది.
భారత్ ఆదర్శం…
విడాకుల విషయంలో భారత్ ప్రపంచానికే ఆదర్శంగా నిలుస్తోంది. ఇక్కడ విడాకుల రేటు కేవలం 1 శాతమే ఉంది. అంటే నూటికి 99 పెళ్లిళ్లు పదిలంగా సాగుతున్నాయి. వియత్నాం 7 శాతంతో రెండో స్థానంలో నిలిచింది. తజకిస్థాన్ 10 శాతంతో మూడో స్థానంలో ఉంది. ఇరాన్ లాంటి దేశాల్లో 14 శాతం వద్ద ఈ రేటు ఉంది. ఆసియా దేశాల్లో బంధాలకు విలువ ఇంకా తగ్గలేదని ఈ గణాంకాలు చెబుతున్నాయి.
పాశ్చాత్య దేశాల పతనం
యూరప్ దేశాల్లో వివాహ బంధం ఊగిసలాడుతోంది. జర్మనీలో 38 శాతం పెళ్లిళ్లు విడాకులతో ముగుస్తున్నాయి. యునైటెడ్ కింగ్డమ్, న్యూజిలాండ్లలో ఈ రేటు 41 శాతంగా ఉంది. ఆస్ట్రేలియాలో 43 శాతం మంది విడిపోతున్నారు. కెనడాలో 47 శాతం, నెదర్లాండ్స్లో 48 శాతం వద్ద పరిస్థితి ఉంది. స్వీడన్లో సగం పెళ్లిళ్లు అంటే 50 శాతం విడాకులకే దారితీస్తున్నాయి.
అగ్రరాజ్యం అమెరికా తీరు
అమెరికాలో విడాకుల రేటు 45 శాతంగా నమోదైంది. అంటే ప్రతి రెండు పెళ్లిళ్లలో ఒకటి విడాకుల దిశగా వెళ్తోంది. దక్షిణ కొరియా, డెన్మార్క్ దేశాల్లో 46 శాతంతో ఇదే తరహాలో ఉన్నాయి. చైనాలో సైతం విడాకులు 44 శాతానికి చేరుకోవడం గమనార్హం. జపాన్లో 35 శాతంతో కొంత మెరుగ్గా ఉన్నా అది ఆందోళనకరమే. అభివృద్ధి చెందిన దేశాల్లో వ్యక్తిగత స్వేచ్ఛ పెరగడమే ఇందుకు కారణం.
పోర్చుగల్ లో 94 శాతం విడాకులు
పోర్చుగల్ దేశంలో పరిస్థితి అత్యంత దారుణంగా ఉంది. అక్కడ విడాకుల రేటు ఏకంగా 94 శాతంగా ఉంది. అంటే అక్కడ జరిగే పెళ్లిళ్లలో దాదాపు అన్నీ విఫలమవుతున్నాయి. స్పెయిన్లో 85 శాతం మంది విడిపోతున్నారు. లక్సెంబర్గ్ 79 శాతంతో మూడో స్థానంలో ఉంది. రష్యాలో 73 శాతం మంది తమ బంధానికి ముగింపు పలుకుతున్నారు. ఉక్రెయిన్లో ఈ గణాంకం 70 శాతంగా నమోదైంది.
మధ్యంతర దేశాల పరిస్థితి
మెక్సికో, ఈజిప్ట్ మరియు సౌత్ ఆఫ్రికాలో విడాకుల రేటు 17 శాతంగా ఉంది. బ్రెజిల్లో 21 శాతం మంది విడాకులు తీసుకుంటున్నారు. టర్కీలో 25 శాతం, కొలంబియాలో 30 శాతానికి ఈ రేటు చేరింది. పోలాండ్ దేశంలో 33 శాతం పెళ్లిళ్లు ముగిసిపోతున్నాయి. ఫ్రాన్స్లో 51 శాతం, బెల్జియంలో 53 శాతానికి చేరుకుంది. ఫిన్లాండ్, క్యూబాలలో 55 శాతం మంది విడిపోతున్నారు.
విశ్లేషణ ఇలా?
ఈ గణాంకాలు ఒక ఏడాదిలో జరిగిన పెళ్లిళ్లకు… అదే ఏడాది జరిగిన విడాకులకు మధ్య నిష్పత్తిని తెలియజేస్తాయి. ఉదాహరణకు ఒక ఏడాదిలో 1000 పెళ్లిళ్లు జరిగితే 500 విడాకులు అయితే అది 50 శాతంగా లెక్కగట్టారు. జర్మనీ డేటా 2017 నుంచి పోర్చుగల్ డేటా 2020 నుంచి తీసుకున్నారు. వివాహ వ్యవస్థ మనుగడపై ఈ గణాంకాలు ప్రపంచవ్యాప్త చర్చకు దారితీస్తున్నాయి.
