- ప్రపంచ బ్యాంక్ అధ్యక్షుడు పేల్చిన బాంబు
- దీంతో మున్ముందు సామాజిక అశాంతి జ్వాల
- ఇండియాలోనూ పెరిగిన నిరుద్యోగ రేటు
సహనం వందే, హైదరాబాద్:
ప్రపంచం ఒక నిరుద్యోగ అగ్నిపర్వతం మీద కూర్చుంది. రాబోయే దశాబ్ద కాలంలో కోట్ల మంది యువతకు ఉపాధి లేక వీధుల పాలయ్యే ప్రమాదం పొంచి ఉంది. భారత్లో పెరుగుతున్న నిరుద్యోగ రేటు, అంతర్జాతీయంగా ప్రపంచ బ్యాంకు చేస్తున్న హెచ్చరికలు ఒకే భయానక సత్యాన్ని ఆవిష్కరిస్తున్నాయి. ఇది కేవలం ఆర్థిక లెక్కల గారడీ కాదు… వ్యవస్థల వైఫల్యం వల్ల పుట్టుకొస్తున్న సామాజిక దావానలం.
ప్రపంచ బ్యాంక్ పేల్చిన బాంబు
ప్రపంచ బ్యాంకు గ్రూపు అధ్యక్షుడు అజయ్ బంగా అంతర్జాతీయ వేదికపై విస్తుపోయే గణాంకాలను బయటపెట్టారు. అభివృద్ధి చెందుతున్న దేశాల్లో ఉపాధి కల్పన వ్యవస్థ అట్టడుగుకు పడిపోయిందని ఆయన విశ్లేషించారు. రాబోయే 10 నుంచి 15 ఏళ్లలో అక్షరాలా 120 కోట్ల మంది యువత పని వయసులోకి అడుగు పెడతారు. వీరంతా మార్కెట్లోకి కొత్తగా వచ్చే సైన్యం. అయితే ఈ భారీ సంఖ్యకు సరిపడా ఉద్యోగాలు లేవనేది పచ్చి నిజం. ఇది పెను ముప్పుగా పరిణమిస్తోంది.
భారీ కొలువుల లోటు
గణాంకాల ప్రకారం చూస్తే అంతర్జాతీయ పరిస్థితి చాలా దారుణంగా ఉంది. 120 కోట్ల మంది ఉద్యోగార్థుల కోసం కేవలం 40 కోట్ల కొలువులు మాత్రమే అందుబాటులో ఉండనున్నాయి. అంటే 80 కోట్ల మందికి అసలు ఉద్యోగమే దొరకని పరిస్థితి ఏర్పడుతుంది. ఈ 80 కోట్ల మంది యువత పరిస్థితి ఏంటనేది ఇప్పుడు మిలియన్ డాలర్ల ప్రశ్న. ప్రతి ముగ్గురిలో ఇద్దరికి నిరాశే మిగులుతుంది. ఈ భారీ ఉద్యోగ లోటు ప్రపంచ ఆర్థిక వ్యవస్థ పునాదులను కదిలించేలా ఉంది.
సామాజిక అశాంతి జ్వాలలు
అజయ్ బంగా ప్రధానంగా సామాజిక విస్ఫోటనం గురించి హెచ్చరించారు. చేతిలో పని లేని 80 కోట్ల మంది యువత నిరాశతో నేరాల బాట పట్టే ప్రమాదం ఉంది. ఇది దేశాల మధ్య అంతర్యుద్ధాలకు దారితీయవచ్చు. కడుపు మండిన యువత రోడ్ల మీదకు వస్తే ఏ వ్యవస్థా వారిని ఆపలేదు. ఇది కేవలం ఆర్థిక సమస్య కాదు. ఇది మానవ మనుగడకే సవాలుగా మారుతుంది. సమాజంలో అరాచకం పెరగడానికి ఈ నిరుద్యోగమే ప్రధాన కారణం అవుతుంది.
భారత్లో నిరుద్యోగ రేటు
బుధవారం (నేడు) విడుదలైన ప్రభుత్వ గణాంకాలు భారతీయ ఉద్యోగ మార్కెట్లోని అస్థిరతను బయటపెట్టాయి. 15 ఏళ్లు అంతకంటే ఎక్కువ వయసున్న వారిలో నిరుద్యోగ రేటు పెరిగింది. ఫిబ్రవరిలో 4.9 శాతంగా ఉన్న ఈ రేటు మార్చి నాటికి 5.1 శాతానికి చేరింది. ముఖ్యంగా పట్టణ ప్రాంతాల్లో ఉద్యోగాల కొరత తీవ్రంగా ఉండటమే దీనికి ప్రధాన కారణం. దేశంలోని యువతకు తగినన్ని అవకాశాలు కల్పించడంలో పాలక వ్యవస్థలు తడబడుతున్నాయని ఈ అంకెలు స్పష్టం చేస్తున్నాయి.
ముంచుకొస్తున్న పట్టణ సంక్షోభం
నగరాల్లో పెరుగుతున్న ఈ నిరుద్యోగం భారత సామాజిక స్థితిగతులను దెబ్బతీసేలా ఉంది. ప్రభుత్వం విడుదల చేసిన తాజా డేటా ప్రకారం నిరుద్యోగిత పెరుగుదల ఆందోళనకరంగా మారింది. చదువుకున్న యువతకు ఉపాధి దొరక్కపోవడం వల్ల మానవ వనరులు వృథా అవుతున్నాయి. అంతర్జాతీయంగా ఎదురయ్యే 80 కోట్ల ఉద్యోగ లోటు ప్రభావం భారత్పై కూడా తీవ్రంగా ఉండబోతోంది. తక్షణమే విధానాల్లో మార్పు రాకపోతే మున్ముందు గడ్డు పరిస్థితులు తప్పవు.
