- మొగుడు నిద్రపోయాక చాటింగ్ మొదలు
- భాగస్వామిని బురిడీ కొట్టే ‘ఇల్లీగల్’ హంటింగ్
- మగువ మనసులో డిజిటల్ అలజడి
- భారతీయ సంప్రదాయంపై ఆధునికత దాడి
- అక్రమ సంబంధాల రాజధాని బెంగళూరు
సహనం వందే, హైదరాబాద్:
జీవితం ఒక రహస్యాల నిలయం. పవిత్రమైన బంధంలో ఉన్నామని లోకానికి చెప్పుకుంటూనే మరో తోడు కోసం ఆరాటపడే మనస్తత్వం నేడు పెరిగిపోతోంది. గ్లీడెన్ అనే యాప్ ఇప్పుడు భారతీయుల ఫోన్లలో నిశ్శబ్దంగా తిష్టవేసింది. పెళ్లయిన వారు మరో వ్యక్తితో రహస్యంగా బంధం పెట్టుకోవడానికి ఇది ఒక వంతెనలా పనిచేస్తోంది. అంకెలు చూస్తుంటే మన నైతిక విలువల గోడలు నెమ్మదిగా బీటలు వారుతున్నాయి.
వ్యభిచారానికి డిజిటల్ వేదిక
గ్లీడెన్ అనేది సాధారణ డేటింగ్ యాప్ కాదు. ఇది ఒక వివాహేతర సంబంధాల యాప్. పెళ్లయిన పురుషులు లేదా స్త్రీలు తమ భాగస్వామికి తెలియకుండా మరో వ్యక్తితో స్నేహం చేయడానికి ఇక్కడ చేరుతారు. కేవలం రహస్య బంధాల కోసమే ఇది పుట్టింది. ఇందులో ప్రొఫైల్ క్రియేట్ చేసుకుని తమకు నచ్చిన వారితో చాటింగ్ చేయవచ్చు. ఎవరికీ అనుమానం రాకుండా చాలా జాగ్రత్తగా ఈ యాప్ డిజైన్ చేశారు. సమాజానికి తెలియకుండా మరో లోకంలో విహరించడానికి ఇది ఒక గేట్వే లాంటిది.
40 లక్షల విరిగిన స్వప్నాలు
ఈ యాప్ నిర్వహించిన తాజా సర్వే ప్రకారం భారతదేశంలో దీనికి 40 లక్షల మంది వినియోగదారులు ఉన్నారు. అంటే 40 లక్షల మంది భారతీయులు తమ పెళ్లి బంధం బయట మరో తోడును వెతుక్కుంటున్నారు. ఇది ఒక చిన్న పల్లెటూరి జనాభా కాదు. ఒక పెద్ద నగరం అంత మంది జనం. వీరంతా తమ ప్రస్తుత బంధంలో ఏదో వెలితి ఉందని భావిస్తున్నారు. ఆ వెలితిని పూడ్చుకోవడానికి ఈ డిజిటల్ వేదికను వాడుకుంటున్నారు. కేవలం ఒక కొత్త అనుభూతి కోసం ఈ 40 లక్షల మంది ఆరాటపడుతున్నారు.
నగరాల మధ్య నిశ్శబ్ద యుద్ధం
ఈ రహస్య బంధాల వేటలో బెంగళూరు నగరం దేశంలోనే మొదటి స్థానంలో నిలిచింది. మొత్తం వినియోగదారులలో 18 శాతం అంటే దాదాపు 7.20 లక్షల మంది బెంగళూరు నుంచే ఉన్నారు. మన హైదరాబాద్ నగరం 17 శాతంతో రెండో స్థానంలో నిలిచింది. అంటే దాదాపు 6.80 లక్షల మంది భాగ్యనగర వాసులు ఈ యాప్లో సభ్యులుగా ఉన్నారు. ఢిల్లీ 11 శాతంతో మూడో స్థానంలో ఉంటే… ముంబై 9 శాతంతో నాలుగో స్థానంలో ఉంది. పూణే 7 శాతంతో ఐదో స్థానంలో నిలిచింది. లక్నో, భువనేశ్వర్ వంటి పట్టణాల్లో కూడా ఈ సంఖ్య మూడింతల వేగంతో పెరుగుతోంది.
మగువల మక్కువ
ఈ కథలో అత్యంత కీలకమైన అంశం మహిళల సంఖ్య. గత రెండేళ్లలో ఈ యాప్లో మహిళల సంఖ్య ఏకంగా 148 శాతం పెరిగింది. ప్రస్తుతం మొత్తం వినియోగదారుల్లో 35 శాతం మంది మహిళలే ఉండటం గమనార్హం. పురుషులు 65 శాతం మంది ఉన్నారు. మహిళలకు ఈ యాప్లో సభ్యత్వం ఉచితంగా ఇస్తున్నారు. తనకంటూ ఒక గుర్తింపును, భావోద్వేగ తోడును వెతుక్కునే క్రమంలో మహిళలు కూడా ఈ డిజిటల్ బాట పడుతున్నారు. ఐటీ ఉద్యోగాలు, ఒంటరితనం దీనికి ప్రధాన కారణాలుగా కనిపిస్తున్నాయి.
చీకటి ముచ్చట్ల సమయం
ఈ యాప్లో వ్యక్తులు చాట్ చేసే సమయాలు కూడా ఆశ్చర్యకరంగా ఉన్నాయి. మధ్యాహ్నం 12 నుంచి 3 గంటల మధ్య, రాత్రి 10 నుంచి 1 గంట మధ్య రద్దీ ఎక్కువగా ఉంటోంది. అంటే భాగస్వాములు పనిలో ఉన్నప్పుడు లేదా నిద్రపోయినప్పుడు ఈ రహస్య ముచ్చట్లు సాగుతున్నాయి. సగటున ప్రతి వినియోగదారుడు రోజుకు గంటన్నర సమయం ఈ యాప్లోనే గడుపుతున్నాడు. 25 నుంచి 35 ఏళ్ల వయసు వారు ఎక్కువగా దీనిపై ఆసక్తి చూపుతున్నారు. లైక్స్, ప్రైవేట్ చాట్ల ద్వారా పరిచయం పెంచుకుని బయట కలిసే వరకు వెళ్తున్నారు.
బంధాల వ్యవస్థకు బీటలు
భారతీయ కుటుంబ వ్యవస్థలో వస్తున్న మార్పులకు ఇది ఒక అద్దం. పెళ్లిని ఒక బాధ్యతగా మాత్రమే భావిస్తున్న వారు మానసిక ఉల్లాసం కోసం బయటి వ్యక్తుల వైపు చూస్తున్నారు. టెక్నాలజీ పెరుగుతున్న కొద్దీ సంబంధాలు కూడా అంతే సంక్లిష్టంగా మారుతున్నాయి. డిజిటల్ తెరపై దొరికే ఆ కాసేపటి ఓదార్పు కోసం దశాబ్దాల బంధాన్ని ఫణంగా పెడుతున్నారు. తోడు దొరకడం సులభమైంది కానీ నమ్మకాన్ని నిలబెట్టుకోవడం కష్టంగా మారింది. ఈ డిజిటల్ యుగంలో మనిషి నిజమైన తోడు కోసం వెతుకుతున్నాడా లేదా కేవలం కాలక్షేపం చేస్తున్నాడా అనేది మిస్టరీగా మారింది.
