- పండుగ బరిలో ప్రభాస్, చిరంజీవి, రవితేజ
- ది రాజా సాబ్, మన శంకర వరప్రసాద్ గారు
- ఈ రెండు చిత్రాలపై భారీ అంచనాలు
- మరోవైపు తమిళ్ స్టార్ విజయ్ సినిమా కూడా
- ఈసారి థియేటర్లలో ఏడు సినిమాలు
- జనవరి 9 నుంచే సినిమా సందడి మొదలు
సహనం వందే, హైదరాబాద్:
తెలుగు వారికి సంక్రాంతి అంటేనే సినిమాల పండుగ. అరవై ఏళ్ల వృద్ధుడి నుంచి ఆరేళ్ల పిల్లాడి వరకు ప్రతి ఒక్కరూ థియేటర్ల వైపు చూసే సమయం ఇది. ఈ ఏడాది బాక్సాఫీస్ వద్ద యుద్ధం మామూలుగా ఉండేలా లేదు. అగ్ర కథానాయకులు తమ అస్త్రశస్త్రాలతో సిద్ధమయ్యారు. పండుగ హడావుడి ఇప్పుడే మొదలైంది.
ప్రభాస్ వింటేజ్ మేజిక్…
రెబల్ స్టార్ ప్రభాస్ ఈసారి తన పంథా మార్చారు. భారీ యాక్షన్ చిత్రాల తర్వాత ‘ది రాజా సాబ్’ అంటూ వింటేజ్ లుక్లో వస్తున్నారు. దర్శకుడు మారుతి తెరకెక్కించిన ఈ హారర్ కామెడీ చిత్రం 9వ తేదీన థియేటర్లలోకి రానుంది. ఈ సినిమా కోసం సుమారు 400 కోట్ల రూపాయలకు పైగా ఖర్చు చేసినట్లు సమాచారం. ప్రభాస్ ద్విపాత్రాభినయం చేయడం ఫ్యాన్స్కు పెద్ద కిక్కు ఇచ్చే అంశం. పండగ కంటే వారం ముందే థియేటర్లలో సందడి మొదలుపెట్టే బాధ్యతను ప్రభాస్ తీసుకున్నారు.
మెగాస్టార్ ఫ్యామిలీ ట్రీట్…
సంక్రాంతి అంటే మెగాస్టార్ చిరంజీవి బరిలో ఉండాల్సిందే. అనిల్ రావిపూడి దర్శకత్వంలో వస్తున్న ‘మన శంకర వరప్రసాద్ గారు’ జనవరి 12న విడుదల కానుంది. ఇందులో నయనతార కథానాయికగా నటిస్తోంది. ఒక పక్కా ఫ్యామిలీ ఎంటర్టైనర్గా రూపొందిన ఈ సినిమాపై మెగా అభిమానులు కోటి ఆశలు పెట్టుకున్నారు. చిరంజీవి తన మార్కు కామెడీ, ఎమోషన్స్తో మ్యాజిక్ చేయడానికి వస్తున్నారు. సుమారు 200 కోట్ల రూపాయల బడ్జెట్తో తెరకెక్కిన ఈ చిత్రం పండగ రోజుల్లో కుటుంబ ప్రేక్షకులను ఆకట్టుకోవడం ఖాయంగా కనిపిస్తోంది.
మాస్ మహారాజా దూకుడు…
మాస్ మహారాజా రవితేజ సైతం ఈ రేసులో తగ్గడం లేదు. ఆయన నటించిన ‘భర్త మహాశయులకు విజ్ఞప్తి’ జనవరి 13న బాక్సాఫీస్ వద్ద సందడి చేయనుంది. కిశోర్ తిరుమల దర్శకత్వంలో వస్తున్న ఈ చిత్రం పూర్తిస్థాయి వినోదాత్మక చిత్రంగా ఉండబోతోంది. రవితేజ ఎనర్జీకి తోడు ఫ్యామిలీ సెంటిమెంట్ కూడా తోడైతే ఈ పండుగకు రవితేజ ఖాతాలో మరో హిట్ పడటం గ్యారెంటీ. వరుస సినిమాలతో అలరించే రవితేజ ఈసారి సంక్రాంతి విన్నర్గా నిలవాలని గట్టిగా ప్రయత్నిస్తున్నారు.
యంగ్ హీరోల పోటీ
పెద్ద హీరోలతో పాటు యంగ్ హీరోలు కూడా ఈసారి పండగ బరిలో నిలిచారు. నవీన్ పోలిశెట్టి నటించిన ‘అనగనగా ఒక రాజు’ జనవరి 14న విడుదలవుతోంది. శర్వానంద్ ‘నారీ నారీ నడుమ మురారి’ కూడా అదే రోజున పోటీకి దిగుతోంది. ఈ రెండు సినిమాలు కూడా హాస్యానికి పెద్దపీట వేసినవే. శర్వానంద్ సంక్రాంతి సెంటిమెంట్ను నమ్ముకోగా, నవీన్ తన కామెడీ టైమింగ్తో ప్రేక్షకులను నవ్వించడానికి వస్తున్నారు. పండుగ చివరి రోజుల్లో ఈ చిన్న సినిమాలు పెద్ద వసూళ్లు రాబట్టే అవకాశం ఉంది.
డబ్బింగ్ సినిమాల సెగ
టాలీవుడ్ సినిమాలకే కాకుండా తమిళ డబ్బింగ్ సినిమాలకు కూడా ఈ సంక్రాంతి కీలకం కానుంది. దళపతి విజయ్ తన చివరి చిత్రంగా భావిస్తున్న ‘జన నాయకుడు’ జనవరి 9న ప్రభాస్ సినిమాతో తలపడనుంది. అలాగే శివ కార్తికేయన్, సుధా కొంగర కాంబోలో వస్తున్న ‘పరాశక్తి’ కూడా జనవరి 10న వస్తోంది. విజయ్ సినిమా సుమారు 300 కోట్ల రూపాయల ప్రీ-రిలీజ్ బిజినెస్ చేసినట్లు టాక్. ఈ సినిమాలు కూడా తెలుగు బాక్సాఫీస్ వద్ద గట్టి పోటీనిచ్చేలా కనిపిస్తున్నాయి.
ఓటీటీలో వినోదం జాతర
థియేటర్లే కాకుండా ఓటీటీ ప్లాట్ఫామ్లు కూడా పండుగ వినోదాన్ని రెట్టింపు చేస్తున్నాయి. నెట్ఫ్లిక్స్, అమెజాన్ ప్రైమ్, జియో హాట్స్టార్ వంటి సంస్థలు కొత్త సినిమాలతో పాటు వెబ్ సిరీస్లను సిద్ధం చేశాయి. ముఖ్యంగా జనవరి 9న నెట్ఫ్లిక్స్లో ‘అఖండ 2’ వంటి భారీ చిత్రాలు స్ట్రీమింగ్ అయ్యే అవకాశం ఉంది. ఇంట్లోనే ఉండి వినోదాన్ని ఆస్వాదించే వారి కోసం సుమారు 10కి పైగా కొత్త చిత్రాలు అందుబాటులోకి రానున్నాయి. థియేటర్లలో ఏడు సినిమాలు, ఓటీటీలో పదికి పైగా చిత్రాలతో ఈ సంక్రాంతి అసలైన సినిమా పండుగలా మారనుంది.
