- తూటా పేలకుండా వెనిజులా అధ్యక్షుడి బందీ
- గాలిలో గర్జిస్తూ వచ్చిన అమెరికా విమానాలు
- రాడార్లకు చిక్కకుండా యుద్ధ విమానాల రాక
- విద్యుత్ సరఫరా నిలిపేసిన అమెరికా హ్యాకర్లు
- డ్రోన్లతో బాడీగార్డులపై మత్తు చల్లి ఆపరేషన్
- అధ్యక్ష కోటను పోలిన నకిలీ భవనంతో ప్రాక్టీస్
- 15 వేల మంది సైనికులతో కరాకస్ దిగ్బంధం
- లాడెన్ను చుట్టుముట్టినట్లే మదురోపై దాడి
- సినిమాను తలపించేలా అమెరికా పక్కా స్కెచ్
సహనం వందే, హైదరాబాద్:
ఒక దేశాధ్యక్షుడిని అపహరించడం అంటే అది కేవలం సినిమాల్లోనే సాధ్యం అనుకున్నారంతా. కానీ జనవరి 3వ తేదీ అర్ధరాత్రి వెనిజులా రాజధాని కరాకాస్లో జరిగిన ఘటన హాలీవుడ్ యాక్షన్ సినిమాను మించిపోయింది. ప్రపంచంలోనే అత్యంత కట్టుదిట్టమైన భద్రత ఉండే అధ్యక్ష భవనంలోకి అమెరికా బలగాలు ఎలా జొరబడ్డాయి? వేల సంఖ్యలో ఉన్న వెనిజులా సైన్యం ఏమైంది? మదురో ఎందుకు అడ్డుకోలేకపోయారు? ఈ ఆపరేషన్ వెనుక ఉన్న అసలు రహస్యాలు ఆశ్చర్యం కలిగిస్తున్నాయి. అత్యంత ఆధునిక టెక్నాలజీతో ఒక దేశ అధ్యక్షుడిని ఈడ్చుకొచ్చారంటే చిన్న విషయం కాదు. ఇక్కడ టెక్నాలజీ పోషించిన పాత్ర ఊహకు అందనిది. ట్రంప్ హంటింగ్ తో ప్రపంచం నివ్వెర పోయింది.
నిశ్శబ్ద ముట్టడి
మూడో తేదీ అర్ధరాత్రి సరిగ్గా ఒంటి గంట అయింది. వెనిజులా గగనతలంలోకి అమెరికాకు చెందిన అత్యాధునిక ఎఫ్-35 స్టీల్త్ విమానాలు ప్రవేశించాయి. ఇవి రాడార్లకు అస్సలు చిక్కవు. అదే సమయంలో కరాకాస్ నగరంలో విద్యుత్ సరఫరాను అమెరికా హ్యాకర్లు నిలిపివేశారు. నగరం మొత్తం చీకటిమయమైంది. కమ్యూనికేషన్ వ్యవస్థలు స్తంభించిపోయాయి. సైనికులకు ఏం జరుగుతుందో అర్థమయ్యే లోపే అమెరికాకు చెందిన ఎలైట్ డెల్టా ఫోర్స్ కమెండోలు రంగంలోకి దిగాయి.
లాడెన్ను చుట్టుముట్టినట్లుగానే…
ఆపరేషన్ అబ్జల్యూట్ రిజాల్వ్ పేరుతో చేపట్టిన ఈ మిషన్ అత్యంత రహస్యంగా సాగింది. 2011లో ఒసామా బిన్ లాడెన్ను హతమార్చిన సీల్ టీమ్ 6 ఆపరేషన్ తర్వాత అంతటి సాహసోపేతమైన దాడి ఇదేనని విశ్లేషకులు చెబుతున్నారు. ఎక్కడా రక్తపాతం జరగకుండా, అమెరికా సైనికులకు చిన్న గాయం కూడా తగలకుండా మాదురోను పట్టుకోవడం కమెండోల వ్యూహరచనకు నిదర్శనం. అధ్యక్ష భవనం ఉక్కు తలుపులను కట్ చేయడానికి కమెండోలు వెంట గ్యాస్ కట్టర్లను తీసుకెళ్లారు. కేవలం కొన్ని సెకన్లలోనే బలమైన తలుపులను పగులగొట్టి లోపలికి ప్రవేశించారు.
ఆపరేషన్ ను ప్రత్యక్షంగా వీక్షించిన ట్రంప్…
నాలుగు రోజుల ముందే ఈ దాడికి డొనాల్డ్ ట్రంప్ ఆమోదం తెలిపారు. కానీ వాతావరణం అనుకూలించే వరకు ఆగాలని సైనిక నిపుణులు సూచించారు. శుక్రవారం రాత్రి 10:46 గంటలకు ట్రంప్ నుంచి గో అహెడ్ అనే సందేశం వచ్చింది. ఫ్లోరిడాలోని మార్ ఏ లాగో క్లబ్ నుంచి ట్రంప్ ఈ ఆపరేషన్ను ప్రత్యక్షంగా వీక్షించారు. అమెరికా చుట్టుపక్కల ఉన్న 20 స్థావరాల నుంచి ఏకకాలంలో 150 యుద్ధ విమానాలు గాల్లోకి లేచాయి. అందులో ఎఫ్-35, ఎఫ్-22 వంటి అత్యాధునిక జెట్ విమానాలు శత్రువుల రాడార్లను దెబ్బతీశాయి.
మత్తులోకి అంగరక్షకులు
మదురో ఉండే అధ్యక్ష భవనం చుట్టూ రష్యన్ ఆయుధాలతో కూడిన కట్టుదిట్టమైన భద్రత ఉంటుంది. కానీ అమెరికా బలగాలు ఇక్కడ ఒక కొత్త రకం టెక్నాలజీని వాడాయి. డ్రోన్ల ద్వారా భవనం చుట్టూ ఒక ప్రత్యేకమైన మత్తు వాయువును విడుదల చేశాయి. దీనివల్ల కాపలాగా ఉన్న వందలాది మంది అంగరక్షకులు స్పృహ కోల్పోయారు. ఒక్క తూటా కూడా పేల్చాల్సిన అవసరం లేకుండానే అమెరికా నేవీ సీల్స్ భవనం లోపలికి జొరబడ్డాయి. ఆధునిక సాంకేతికత ముందు వెనిజులా భద్రత వెలవెలబోయింది. క్క్షణాల్లో మదురోకు బేడీలు వేసి… నోటికి గుడ్డలు కట్టి భవనం పైకప్పు మీద సిద్ధంగా ఉన్న హెలికాప్టర్లోకి ఎక్కించారు.
సైన్యం ఎందుకు రాలేదు
వెనిజులా సైన్యం సంఖ్యలో పెద్దదే కానీ అమెరికా సైబర్ దాడి వల్ల వారి కమాండ్ సెంటర్ల మధ్య సంబంధాలు తెగిపోయాయి. ఒక అధికారి నుంచి మరో అధికారికి ఆదేశాలు వెళ్లే మార్గం లేకుండా పోయింది. అలాగే విమానాశ్రయాలు, కీలక రహదారులను అమెరికా డ్రోన్లు తమ గుప్పిట్లోకి తీసుకున్నాయి. మదురోను రక్షించే లోపే ఆయనను దేశ సరిహద్దులు దాటించి అరేబియా సముద్రంలో ఉన్న అమెరికా యుద్ధ నౌకకు చేర్చారు.
కొన్ని నెలలుగా గూఢచర్యం…
ఈ ఆపరేషన్ కోసం అమెరికా గత ఆరు నెలలుగా నిఘా పెట్టింది. మదురో పడుకునే గది, ఆయన భోజనం చేసే సమయం, అంగరక్షకుల డ్యూటీ షిఫ్టులు.. ఇలా ప్రతి అంగుళం సమాచారాన్ని సేకరించింది. వెనిజులా సైన్యంలోని కొందరు ఉన్నతాధికారులకు అమెరికా భారీగా డబ్బు ఆశ చూపి తనవైపు తిప్పుకుందనే ప్రచారం కూడా జరుగుతోంది. లోపల సహకారం ఉండటం వల్లే అమెరికా ఇంత సులువుగా లోపలికి వెళ్లగలిగింది. ఇది కేవలం సైనిక దాడి మాత్రమే కాదు.. ఒక పక్కా గూఢచారి వ్యూహం. అంతేకాదు పెంటగాన్ లో మాదురో నివాసాన్ని పోలిన ఒక నకిలీ భవనాన్ని నిర్మించారు. డెల్టా ఫోర్స్ కమెండోలు అధ్యక్ష భవనంలోకి ఎలా వెళ్లాలనే దానిపై కఠినమైన శిక్షణ పొందారు.
అగ్రరాజ్య సత్తా
ఈ ఆపరేషన్ ద్వారా అమెరికా ప్రపంచానికి ఒక బలమైన సందేశం పంపింది. తమకు శత్రువు అని భావిస్తే ఏ దేశంలో ఉన్నా.. ఎంత భద్రతలో ఉన్నా పట్టుకోగలమని నిరూపించింది. ఒక దేశాధినేతను ఇలా క్రిమినల్ లాగా తీసుకెళ్లడం అంతర్జాతీయ చట్టాలకు విరుద్ధమని రష్యా వంటి దేశాలు వాదిస్తున్నా.. ట్రంప్ మాత్రం అమెరికా భద్రత కోసమే ఇది చేశానని మొండిగా చెబుతున్నారు.
అమెరికాలో అగ్గి.. వెనిజులా చిచ్చు!
అమెరికా వీధులు ఇప్పుడు నిరసన జ్వాలలతో రగులుతున్నాయి. వెనిజులా అధ్యక్షుడు మాదురో అరెస్టుకు నిరసనగా వేలాది మంది రోడ్లపైకి వచ్చారు. శాంతి కాముకులు, వెనిజులా మద్దతుదారులు ప్రభుత్వం తీసుకున్న నిర్ణయాన్ని తప్పుబడుతున్నారు. మరోవైపు ట్రంప్ మద్దతుదారులు ఈ దాడిని సమర్థిస్తున్నారు. దీంతో అమెరికాలోని ప్రధాన నగరాల్లో ఉద్రిక్త పరిస్థితులు నెలకొన్నాయి. పోలీసులు భారీగా మోహరించి పరిస్థితిని గమనిస్తున్నారు. చికాగో నగరంలోని ప్రధాన చౌరస్తాల్లో నిరసనకారులు భారీ ప్రదర్శన చేపట్టారు. చేతుల్లో వెనిజులా జెండాలు పట్టుకుని ప్లకార్డులతో నినాదాలు చేశారు. ఇతర దేశాల అంతర్గత విషయాల్లో అమెరికా జోక్యం ఏమిటని వారు ప్రశ్నిస్తున్నారు. ఈ దాడి వల్ల అంతర్జాతీయంగా అమెరికా ప్రతిష్ట దెబ్బతింటుందని ఆందోళన వ్యక్తం చేశారు.
