‘నకిలీ’ మాఫియా నీడలో వ్యవసాయశాఖ

• నిషేధిత పత్తి విత్తన దందాను అడ్డుకోవడంలో వైఫల్యం
• రాష్ట్రాన్ని ముంచెత్తుతున్న నకిలీ విత్తనం
• రైతులను మోసం చేస్తున్న దళారులు
• నిర్లక్ష్యంలో మునిగిన అధికారులు
• ఇతర రాష్ట్రాల నుంచి సరఫరా…
• బ్రాండెడ్ విత్తనాల సరఫరాలో నిర్లక్ష్యం
• రైతులకు అవసరమైన విత్తన రకాల కొరత
• కొన్నిచోట్ల రెట్టింపు ధరలకు విక్రయాలు

సహనం వందే, హైదరాబాద్:

వానాకాలం సీజన్ త్వరలో ప్రారంభం కానుంది. రైతులు ఇప్పటికే విత్తనాల కోసం ఎదురు చూస్తున్నారు. ఈ పరిస్థితుల్లో ఎప్పటిలాగే దళారులు రైతులను మోసం చేస్తున్నారు. తెలంగాణలో పత్తి రైతులు నిషేధిత బీటీ-3 విత్తనాల దందాతో మోసపోతున్నారు. వ్యాపారులు, దళారులు అధిక దిగుబడి, తెగుళ్ల నిరోధకత పేరుతో ఈ విత్తనాలను రెట్టింపు ధరలకు అమ్ముతున్నారు. వ్యవసాయ శాఖ అధికారులు ఈ నకిలీ విత్తనాల రవాణాను అరికట్టడంలో విఫలమవుతూ, కొందరు దళారులతో కుమ్మక్కై చూసీ చూడనట్టు వ్యవహరిస్తున్నారన్న ఆరోపణలు వెల్లువెత్తుతున్నాయి. రైతులు కోరుకునే బ్రాండెడ్ విత్తనాల కొరత, సరఫరా ఆలస్యం, అధికారుల సమన్వయ లోపంతో రైతులు తీవ్ర ఇబ్బందులు ఎదుర్కొంటున్నారు.

ఇతర రాష్ట్రాల నుంచి సరఫరా…
మహారాష్ట్రలోని ఔరంగాబాద్, జాల్నా, గుజరాత్‌లోని పలు పట్టణాల నుంచి నిషేధిత బీటీ-3 విత్తనాలు తెలంగాణలోకి రవాణా అవుతున్నాయి. ఈ విత్తనాలు బీటీ-2 కంటే తెగుళ్లను సమర్థంగా ఎదుర్కొంటాయని, కలుపు నిరోధకత కలిగి ఉంటాయని వ్యాపారులు అబద్ధపు ప్రచారం చేస్తున్నారు. కలుపు నిర్మూలనకు కూలీలు దొరకని ఇబ్బందుల్లో ఉన్న రైతులు ఈ మోసపూరిత ప్రచారానికి ఆకర్షితులవుతున్నారు. బీటీ-2 ప్యాకెట్ ధర రూ. 901 కాగా, బీటీ-3 విత్తనాలను రూ. 2,000 నుంచి రూ. 2,500 వరకు విక్రయిస్తున్నారు. ఈ దోపిడీని అడ్డుకోవాల్సిన అధికారులు తూతూ మంత్రంగా దాడులు చేస్తూ, దళారులతో కుమ్మక్కై రైతులను దోచుకోవడానికి వీలు కల్పిస్తున్నారని రైతు సంఘాలు ఆగ్రహం వ్యక్తం చేస్తున్నాయి.

విత్తనాల కొరత… అధికారుల నిర్లక్ష్యం
రాష్ట్రంలో ఈ సీజన్‌లో దాదాపు 55 లక్షల ఎకరాల్లో పత్తి సాగు జరుగుతుందని అంచనా. అందుకోసం 1.26 కోట్ల విత్తన ప్యాకెట్లను సిద్ధం చేయాలని నిర్ణయించింది. కానీ ఇప్పటివరకు కేవలం సగం వరకు మాత్రమే ప్యాకెట్లు మాత్రమే సరఫరా అయ్యాయి. మిగతా త్వరలో సరఫరా అవుతాయని అధికారులు చెబుతున్నప్పటికీ, సీజన్ మొదలవుతున్న వేళ ఈ ఆలస్యం రైతులను క్యూలైన్లలో నిలబడేలా చేస్తోంది. ‘విత్తన కొరత లేదని చెబుతూ, రైతులు కోరుకునే బ్రాండెడ్ విత్తనాలను ఎందుకు సరఫరా చేయలేకపోతున్నారు?’ అని రైతులు ప్రశ్నిస్తున్నారు. ఇతర కంపెనీల విత్తనాలను కొనుగోలు చేయాలని అధికారులు చెబుతున్నారు, కానీ దిగుబడి తక్కువైతే ఎవరు బాధ్యత వహిస్తారని రైతులు నిలదీస్తున్నారు. కాగా, వ్యవసాయ శాఖలో ఇద్దరు సీనియర్ కీలక అధికారుల మధ్య సమన్వయ లోపం స్పష్టంగా కనిపిస్తోంది.

బ్లాక్ మార్కెటింగ్…
రైతులు కోరుకునే బ్రాండెడ్ విత్తనాలను వ్యాపారులు బ్లాక్ మార్కెట్‌కు తరలించి, అధిక ధరలకు విక్రయిస్తున్నారు. కాలం చెల్లిన, సాధారణ విత్తనాలను మాత్రమే మార్కెట్లో అందుబాటులో ఉంచుతున్నారు. ‘వ్యవసాయ శాఖకు రైతులకు కావాల్సిన విత్తనాల గురించి తెలుసు, కానీ వాటిని సరఫరా చేయడంలో ఎందుకు విఫలమవుతోంది?’ అని రైతులు ఆగ్రహం వ్యక్తం చేస్తున్నారు. కొందరు అధికారులు తక్కువ డిమాండ్ ఉన్న కంపెనీల విత్తనాలను ప్రోత్సహిస్తూ, రైతుల ఇష్టాలను పట్టించుకోవడం లేదని ఆరోపణలు ఉన్నాయి. ఈ బ్లాక్ మార్కెటింగ్ రైతుల జీవనాధారంతో చెలగాటమాడుతోంది.

నకిలీ విత్తనాల బెడద…
ప్రభుత్వం టాస్క్‌ఫోర్స్ ఏర్పాటు చేసినప్పటికీ, నకిలీ, నిషేధిత విత్తనాల ప్రవాహం ఆగడం లేదు. గుజరాత్, మహారాష్ట్ర నుంచి హెచ్‌టీ కాటన్ (బీజీ-3) విత్తనాలు జిల్లాలకు తరలివస్తున్నాయి. ఈ విత్తనాలు జీవ భద్రత, పర్యావరణానికి ముప్పుగా ఉన్నప్పటికీ, అధికారులు దీనిని నియంత్రించడంలో నిర్లక్ష్యం వహిస్తున్నారు. ‘నిషేధిత విత్తనాలను అడ్డుకోవడానికి బదులు, అధికారులు వ్యాపారులతో కలిసి రైతులను దోపిడీకి గురిచేస్తున్నార’ని రైతు నాయకులు ఆరోపిస్తున్నారు.