అదానీ కేసు మూసివేతపై జడ్జి ఫైర్ – లంచం కేసు రద్దుపై అమెరికా కోర్టు ఆగ్రహం

• అలా ఎలా రద్దు చేస్తారని నిలదీసిన జడ్జి
• వివరణ కోరిన ఫెడరల్ న్యాయమూర్తి
• ట్రంపు సర్కారు నిర్ణయంపై నీలినీడలు
• విచారణ కొనసాగాల్సిందేనన్న కోర్టు
• క్లోజింగ్ రిక్వెస్ట్ రిజెక్ట్… జడ్జి వద్ద అదానీ ఫైలు
• అదానీకి అమెరికాలో తప్పని చిక్కులు

సహనం వందే, వాషింగ్టన్:

అమెరికా గడ్డపై భారతీయ బిలియనీర్ గౌతమ్ అదానీపై నమోదైన లంచం, మోసాల కేసు ఊహించని మలుపు తిరిగింది. ఈ కేసును కొట్టేయాలని కోరుతూ అమెరికా న్యాయశాఖ వేసిన పిటిషన్ ను అక్కడి ఫెడరల్ జడ్జి నిర్ద్వంద్వంగా తిరస్కరించారు. అదానీని కేసు నుండి బయటపడేయడానికి ఎందుకు ప్రయత్నిస్తున్నారో వివరణ ఇవ్వాల్సిందేనని ప్రభుత్వాన్ని నిలదీశారు. అదానీ సామ్రాజ్యానికి వ్యతిరేకంగా సాగుతున్న ఈ న్యాయపోరాటం ఇప్పుడు కీలక దశకు చేరింది.

తగ్గేది లేదంటున్న జడ్జి
సాధారణంగా అమెరికా న్యాయశాఖ ఒక కేసును వాపసు తీసుకోవాలని కోరితే కోర్టులు పెద్దగా అభ్యంతరాలు చెప్పవు. కానీ ఈసారి జడ్జి అందుకు విరుద్ధంగా వ్యవహరించారు. అదానీపై మోపిన లంచం, మోసం వంటి తీవ్రమైన ఆరోపణలను కేవలం అభ్యర్థనతో కొట్టేయడం సాధ్యం కాదని ఆయన తేల్చి చెప్పారు. అదానీ కేసు విషయంలో న్యాయశాఖ తీసుకున్న వెనకడుగు వెనుక ఉన్న అసలు కారణాలను బయటపెట్టాలని ఆయన ప్రభుత్వాన్ని ఆదేశించారు. ఇది న్యాయవ్యవస్థకు ప్రభుత్వానికి మధ్య జరుగుతున్న ఆధిపత్య పోరాటంగా కనిపిస్తోంది.

ప్రశ్నార్థకమైన న్యాయశాఖ నిర్ణయం
అమెరికా చట్టాల ప్రకారం అదానీపై వచ్చిన ఆరోపణలు చాలా తీవ్రమైనవి. 2 వేల కోట్ల రూపాయలు లంచం ఇచ్చి భారీ కాంట్రాక్టులు దక్కించుకున్నారన్నది ప్రధాన అభియోగం. ఇంతటి కీలకమైన కేసును విచారణ ముగియకముందే ఎలాంటి తగిన కారణాలు చూపకుండానే మూసివేయాలని న్యాయశాఖ ఎందుకు ప్రయత్నిస్తోందనేది ఇప్పుడు పెద్ద చర్చ. తన నిర్ణయాన్ని సమర్థించుకునేలా ప్రభుత్వం బలమైన కారణాలు చూపకపోతే ఆ పిటిషన్ ను జడ్జి పూర్తిగా తిరస్కరించే అవకాశం ఉంది.

ప్రభుత్వంపై పెరిగిన ఒత్తిడి
న్యాయమూర్తి ఆదేశాల తర్వాత అమెరికా ప్రభుత్వానికి ఇప్పుడు చిక్కులు మొదలయ్యాయి. గతంలో చేసిన ఆరోపణలను ఎందుకు ఇప్పుడు సమర్థించలేకపోతున్నారో వారు నిరూపించుకోవాలి. లేదంటే అదానీకి అనుకూలంగా వ్యవహరిస్తున్నారన్న ముద్ర ప్రభుత్వంపై పడే ప్రమాదం ఉంది. న్యాయవ్యవస్థ పారదర్శకతను కోరుకుంటున్న వేళ ప్రభుత్వం ఇచ్చే సమాధానంపైనే అదానీ భవితవ్యం ఆధారపడి ఉంది.

సరికొత్త మలుపులు
ఈ కేసు విచారణ ఆగిపోకుండా ఉండాలని కోర్టు కోరుకోవడం అంటేనే అందులో ఏదో పెద్ద కుట్ర ఉందన్న సంకేతం స్పష్టంగా కనిపిస్తోంది. ఇప్పటికే అదానీ గ్రూపుపై ఆరోపణలు వచ్చినప్పటి నుండి షేర్ మార్కెట్లలో తీవ్ర ఆందోళన నెలకొంది. ఇప్పుడు కోర్టు కూడా ప్రభుత్వం వైపు వేలెత్తి చూపిస్తుండటంతో అంతర్జాతీయ ఇన్వెస్టర్లు అదానీ వ్యవహారాన్ని మరింత అనుమానంతో గమనిస్తున్నారు.

న్యాయవ్యవస్థపై నమ్మకం…
సాధారణ ప్రజల దృష్టిలో అదానీ కేసు అంటే కేవలం డబ్బుకు సంబంధించిన వ్యవహారం కాదు‌.‌‌.. ఇది చట్టం కంటే ఎవరూ ఎక్కువ కాదనే నిరూపించే ఒక గొప్ప క్రిమినల్ కేసు. ఫెడరల్ జడ్జి తీసుకున్న ఈ తాజా నిర్ణయం సామాన్యుల్లో న్యాయవ్యవస్థపై నమ్మకాన్ని పెంచింది. రాజకీయ లేదా ఆర్థిక శక్తులు ఎంత బలంగా ఉన్నా న్యాయం తన పని తాను చేసుకుపోతుందన్న సంకేతం ఈ పరిణామంతో స్పష్టమైంది.

రాజకీయ వర్గాలకు గట్టి సవాల్…
ప్రస్తుతం న్యాయశాఖ కోర్టులోకి బంతి విసిరిన జడ్జి… తమకు సరైన సమాధానం కావాలని కోరారు. ఒకవేళ ప్రభుత్వం చెప్పే కారణాలు న్యాయమూర్తిని సంతృప్తి పరచకపోతే కేసు విచారణ కొనసాగుతుంది. అప్పుడు అదానీపై వచ్చిన ఆరోపణల విషయంలో వాస్తవాలు బయటకు వస్తాయి. అమెరికా కోర్టు తీసుకున్న ఈ నిర్ణయం ఇప్పుడు అదానీ సామ్రాజ్యానికి మాత్రమే కాదు రాజకీయ వర్గాలకు కూడా గట్టి హెచ్చరికగా మారింది.