- కార్పొరేట్ ఫిట్నెస్ మంత్రం
- రిజిస్ట్రేషన్ ఫీజుల మోత
- ఫిట్నెస్ పేరిట వ్యాపారం
- ఖరీదైన షూల ఫ్యాషన్
- మధ్యతరగతి ఖరీదైన సరదా
సహనం వందే, హైదరాబాద్:
భారతదేశంలో పరుగు ఒక మతంలా మారుతోంది. కేవలం ఒక్క రోజు పరుగు కోసం భారతీయులు వేల రూపాయలు వెచ్చిస్తున్నారు. ముంబై నుండి లడఖ్ వరకు మారథాన్ ల జోరు పెరుగుతోంది. ఆరోగ్యమే మహాభాగ్యం అనే సూత్రం ఇప్పుడు ఖరీదైన జీవనశైలిగా మారింది. మధ్యతరగతి, కార్పొరేట్ వర్గాల్లో ఈ పరుగు పిచ్చి పీక్స్కు చేరింది. కేవలం ఒక్క రోజు పరుగు కోసం సగటున 50 వేల రూపాయలు వెచ్చించడం వెనుక ఒక పెద్ద ఆర్థిక చక్రం దాగి ఉంది. ఇది కేవలం శారీరక శ్రమ కాదు... ఒక సామాజిక హోదాగా రూపాంతరం చెందింది.
ఎంట్రీ ఫీజుల వెనుక అసలు కథ
మారథాన్లలో పాల్గొనడం ఉచితం కాదు. టాటా ముంబై మారథాన్ లేదా టీసీఎస్ వరల్డ్ 10కే వంటి ప్రతిష్టాత్మక పోటీలలో పాల్గొనాలంటే వేల రూపాయల రిజిస్ట్రేషన్ ఫీజు చెల్లించాలి. ఈ ఫీజులో నిర్వాహకులు అందించే రేస్ కిట్, టీ-షర్ట్, ఫినిషర్ మెడల్, పరుగు సమయంలో అందించే వైద్య సేవలు, ఎనర్జీ డ్రింక్స్ వంటివి కలిసి ఉంటాయి. కార్పొరేట్ కంపెనీలు తమ బ్రాండ్ ప్రచారం కోసం ఈ ఈవెంట్లను వేదికగా చేసుకుంటున్నాయి.
ప్రయాణం… విలాసాల ఖర్చు
ఒక రన్నర్ తన ఊరిలో పరుగు పందెం లేనప్పుడు ఢిల్లీ, కోల్కతా లేదా బెంగళూరు వంటి నగరాలకు ప్రయాణించాల్సి వస్తోంది. వైజాగ్లో ఉన్న నావికాదళ అధికారి తన 7 ఏళ్ల అనుభవంలో 7 మారథాన్ల కోసం దేశమంతా తిరిగారు. విమాన టిక్కెట్లు, నగరంలోని స్టార్ హోటళ్లలో బస, ఆరోగ్యకరమైన ఆహారం కోసం చేసే ఖర్చు కలిపితే అది సులభంగా 50 వేల రూపాయలకు చేరుతోంది.
బ్రాండెడ్ గేర్ విపణి
రన్నర్లు ఇప్పుడు సాధారణ దుస్తులతో సంతృప్తి చెందడం లేదు. నైక్, అడిడాస్ వంటి దిగ్గజ సంస్థలు రూపొందించే ప్రత్యేకమైన రన్నింగ్ షూస్ ధర 10 వేల నుండి 25 వేల రూపాయల వరకు ఉంటోంది. వీటికి తోడు స్మార్ట్ వాచీలు, కంప్రెషన్ సాక్స్, ఛాతీకి కట్టుకునే రెసిస్టెన్స్ వెయిట్స్ వంటి పరికరాల కోసం లక్ష రూపాయల వరకు ఖర్చు చేస్తున్నారు. ఫిట్నెస్ అనేది ఇప్పుడు ఒక టెక్నాలజీ ఆధారిత వ్యసనంగా మారింది.
నిర్వాహణ ఖర్చులు…
ఒక మారథాన్ను నిర్వహించడానికి కోట్లాది రూపాయలు ఖర్చవుతాయి. ముంబైలోని బాంద్రా వర్లీ సీ లింక్ వంటి ప్రధాన రహదారులను మూసివేయడం, వేల సంఖ్యలో వాలంటీర్లను నియమించడం, పరుగును ట్రాక్ చేయడానికి టైమింగ్ చిప్స్ వాడటం వల్ల నిర్వాహణ భారం పెరుగుతోంది. ఈ భారాన్ని రిజిస్ట్రేషన్ ఫీజులు, స్పాన్సర్షిప్ల ద్వారా వినియోగదారుల నుండే వసూలు చేస్తారు. ఇది ఒక పూర్తిస్థాయి వాణిజ్య నమూనాగా స్థిరపడింది.
మానసిక తృప్తి… వ్యసనం
పరుగు ఇచ్చే హై కోసం రన్నర్లు ఎంతైనా ఖర్చు చేయడానికి సిద్ధపడుతున్నారు. వైజాగ్లో పోస్టింగ్ ఉన్న లెఫ్టినెంట్ కమాండర్ వంటి వారు దీనిని ఒక మనుగడ సాధనంగా చూస్తున్నారు. యుద్ధక్షేత్రంలో గెలవాలంటే పరుగులో వేగం ఉండాలనే సైనిక సూత్రం ఇప్పుడు కార్పొరేట్ ఉద్యోగులకు ఒత్తిడి నుండి ఉపశమనం కలిగించే మంత్రంలా మారింది. ఈ మానసిక తృప్తి కోసమే వేల రూపాయలను కేవలం కొద్ది గంటల పరుగు కోసం వెచ్చిస్తున్నారు.
మారుతున్న భారతీయ జీవనశైలి…
లడఖ్ మారథాన్ వంటి సాహసోపేతమైన పరుగుల నుండి విప్రో బెంగళూరు మారథాన్ వంటి సిటీ రన్ల వరకు భారతీయుల భాగస్వామ్యం పెరుగుతోంది. నేడు అది అత్యంత ఖరీదైన క్రీడలలో ఒకటిగా చేరింది. ఫిట్నెస్ పేరిట జరుగుతున్న ఈ ఖర్చు వెనుక వ్యక్తిగత ఆరోగ్యం కంటే కూడా ఒక సామాజిక వర్గంలో భాగమవ్వాలనే తపన స్పష్టంగా కనిపిస్తోంది.
