కవిత మను’గడగడ’ – ముగిసిన షర్మిల ముచ్చట… విజయశాంతి అడ్రస్ గల్లంతు

• కోదండరాం పార్టీ మౌనం
• లోక్ సత్తా విరామం
• ఇలాగైతే కవిత పార్టీ ఉంటుందా?

సహనం వందే, హైదరాబాద్:

తెలంగాణ రాజకీయాల్లో కొత్త పార్టీల పుట్టుక ఒక సంచలనమైతే… వాటి అదృశ్యం అంతకంటే పెద్ద మిస్టరీగా మారింది. ఉద్యమ నేతలు, సినిమా స్టార్లు, మేధావులు పెట్టిన పార్టీలన్నీ కాలగర్భంలో కలిసిపోగా ఇప్పుడు కవిత తన అదృష్టాన్ని పరీక్షించుకోవాలని చూస్తున్నారు. కుటుంబ కలహాలు, ఆస్తి వివాదాల నేపథ్యంలో పుట్టబోయే ఈ పార్టీ రాజకీయాల్లో ఏ మేరకు నిలదొక్కుకుంటుందనేది ఇప్పుడు చర్చనీయాంశంగా మారింది.

వరుస వైఫల్యాల చరిత్ర
తెలంగాణ గడ్డపై పార్టీ పెట్టిన ఏ ఒక్కరూ కూడా గెలుపు తీరాలకు చేరలేకపోయారు. షర్మిల తన అన్న జగన్మోహన్ రెడ్డితో విభేదించి తెలంగాణ బిడ్డ అంటూ వైఎస్సార్ తెలంగాణ పార్టీని స్థాపించారు. చివరకు పార్టీని కాంగ్రెస్‌లో విలీనం చేసేశారు. ఇది కేవలం ఒక ఉదాహరణ మాత్రమే కాదు. సినీ నటి విజయశాంతి తల్లి తెలంగాణ పార్టీ పెట్టి చివరకు అడ్రస్ లేకుండా పోయారు. ఆమె ఇప్పుడు కాంగ్రెస్ గూటికి చేరారు. ఇలాంటి పతనాలు కొత్తగా పార్టీ పెట్టేవారికి ఒక హెచ్చరికగా కనిపిస్తున్నాయి.

ఉద్యమ నేతల పరాజయం
తెలంగాణ సిద్ధాంతకర్తలుగా పేరున్న వారు సైతం రాజకీయ పార్టీలను నడపలేకపోయారు. తెలంగాణ జన సమితి స్థాపించిన కోదండరాం ఉద్యమంలో హీరోగా ఉన్నా ఎన్నికల బరిలో మాత్రం పార్టీని నిలబెట్టలేకపోయారు. అలాగే దివంగత గద్దర్ ప్రజా ఫ్రంట్ పేరిట పార్టీ పెట్టినా సరైన ఎజెండా లేకపోవడంతో అది ముందుకు సాగలేదు. దేవేందర్ గౌడ్ స్థాపించిన నవ తెలంగాణ పార్టీ కూడా ఇలాగే కనుమరుగైపోయింది. ఈ అనుభవాలన్నీ కవిత ముందున్న పెద్ద సవాళ్లు.

మేధావులకూ అందని అధికారం
పాలనా సంస్కరణల కోసం జయప్రకాశ్ నారాయణ లోక్ సత్తా పార్టీని స్థాపించి ఒకప్పుడు ప్రభంజనం సృష్టించారు. కానీ వ్యవస్థను మార్చాలనే ఆయన ప్రయత్నం ఓట్ల రాజకీయాల ముందు ఓడిపోయింది. చివరకు పార్టీని పక్కన పడేశారు. అటు బహుజన లెఫ్ట్ ఫ్రంట్ కూడా భారీ ఆశలతో రంగంలోకి దిగి విఫలమైంది. వీరందరికీ లేని ప్రత్యేకత కవితకు ఏముందనే ప్రశ్న ఇక్కడ ఉత్పన్నమవుతోంది. కేవలం వారసత్వ రాజకీయాలు తెలంగాణ ప్రజలను ఆకట్టుకుంటాయా అనేది అనుమానమే.

కుటుంబ వివాదాలే పునాదా?
కవిత పెట్టబోయే పార్టీ వెనుక బలమైన రాజకీయ సిద్ధాంతం కంటే కుటుంబ తగాదాలే ఎక్కువగా కనిపిస్తున్నాయి. షర్మిల తన అన్నతో విభేదించి బయటకు వచ్చినట్టే కవిత కూడా కుటుంబంలో నెలకొన్న ఆస్తి గొడవలు, విభేదాల వల్లే పార్టీ దిశగా అడుగులు వేస్తున్నారని తెలుస్తోంది. కేవలం 10 ఏళ్ల అధికారం తర్వాత కుటుంబంలోని అంతర్గత కలహాలే ఎజెండాగా ప్రజల్లోకి వెళ్తే ఓటర్లు ఏ మేరకు ఆదరిస్తారనేది ప్రశ్నగా మారింది.

ఓట్లు చీల్చే వ్యూహమా?
రాష్ట్రంలో కొత్త పార్టీ పెడితే అది అధికారంలోకి వస్తుందని ఎవరూ అనుకోవడం లేదు. కానీ ఈ పార్టీ వల్ల ప్రధాన పార్టీల ఓట్లు చీలే అవకాశం ఉంది. తెలంగాణ తొలి మహిళా ముఖ్యమంత్రి కావాలనే కవిత కల నెరవేరుతుందా లేక గతంలో పార్టీ పెట్టిన వారిలాగే అడ్రస్ లేకుండా పోతారా అనేది కాలమే నిర్ణయించాలి. సరైన రాజకీయ వ్యూహం, పటిష్టమైన కార్యకర్తల బలం లేకుండా కేవలం సెంటిమెంట్‌తో పార్టీని నడపడం అసాధ్యమని గత చరిత్ర చెబుతోంది.

భవిష్యత్తుపై నీలినీడలు
తెలంగాణలో ఇప్పటికే రాజకీయాలు వేడెక్కాయి. ఈ దశలో కవిత పార్టీ ప్రకటన రాజకీయ ప్రకంపనలు సృష్టిస్తోంది. జయప్రకాశ్ నారాయణ నుండి గద్దర్ వరకు అందరూ విఫలమైన చోట కవిత ఏ ధైర్యంతో అడుగు వేస్తున్నారనేది మిలియన్ డాలర్ల ప్రశ్న. ఒకవేళ పార్టీ పెట్టినా అది ప్రజల గుండెల్లోకి వెళుతుందా లేక కేవలం ఓట్ల చీలికకే పరిమితమవుతుందా అనే సందేహాలు వ్యక్తమవుతున్నాయి.