- సెకండ్ హ్యాండ్ షాపింగ్ జోరు
- రీసెల్లర్ల దందా… భారీ లాభాల వేట
సహనం వందే, అమెరికా:
జీవితం అంటేనే ఒక నిరంతర ప్రవాహం. ఒకరు వద్దనుకుని విసిరేసిన వస్తువు మరొకరికి జీవనాధారంగా మారుతుంది. మనం పాతబడ్డాయని వదిలేసిన చొక్కాలు, వాడేసిన వస్తువులు ఇప్పుడు ఒక భారీ అంతర్జాతీయ వ్యాపారానికి వేదికయ్యాయి. ఇది కేవలం అమ్మకపు కథ కాదు.. మనిషిలోని అత్యాశకు, అవసరానికి మధ్య జరుగుతున్న ఒక నిశ్శబ్ద పోరాటం.
నిరీక్షణ… ఒక అలవాటు
టెక్సాస్లో తెల్లవారుజామున 43 ఏళ్ల క్రిస్ హాట్ఫీల్డ్ తన కారులో కూర్చుని గుడ్విల్ స్టోర్ తలుపుల వైపు చూస్తుంటాడు. అతను వెతికేది షెల్ఫ్లలో అమర్చిన వస్తువుల కోసం కాదు. గుడ్విల్ బిన్ల (కుప్పల) కోసం. అక్కడ వస్తువులను పెద్ద టబ్బుల్లో కుప్పలుగా పోస్తారు. ఆ బట్టలు, బ్యాగుల కుప్పల్లో అతను రోజుకు 68 నుంచి 90 కేజీల బరువున్న వస్తువులను ఏరుకుంటాడు. 10 వేల రూపాయలు చెల్లించి రోజుకు 83,000 రూపాయల లాభం పొందుతాడు.
అంకెల వెనుక యుద్ధం
సెకండ్ హ్యాండ్ మార్కెట్ ఇప్పుడు 6.5 లక్షల కోట్ల రూపాయల భారీ సామ్రాజ్యంగా అవతరించింది. 2030 నాటికి ఇది మరింత విస్తరించనుంది. కానీ ఈ అంకెలు ఒక చేదు నిజాన్ని దాచిపెడుతున్నాయి. తక్కువ ధరకు వస్తువులు దొరికే చోట్ల ప్రొఫెషనల్ రీసెల్లర్లు గుంపులుగా వచ్చి దాడి చేస్తున్నారు. దీనివల్ల నిరుపేదలకు అందాల్సిన చౌక వస్తువులు మాయమవుతున్నాయి. రీసెల్లర్ లాభం కోసం ముందే ఎత్తుకెళ్తున్నాడు. అవసరానికి, వ్యాపారానికి మధ్య ఉన్న గీత చెరిగిపోతోంది.
కిచెన్ నుంచి కలెక్షన్ల వరకు
ఈ వ్యాపారం కేవలం బట్టలకే పరిమితం కాలేదు. రాబ్ అనే వ్యక్తి ఒక పాత దుకాణంలో పడి ఉన్న స్టీమ్ ఓవెన్ను 83,000 రూపాయలకు కొని ఆన్లైన్లో ఏకంగా 10 లక్షల రూపాయలకు విక్రయించాడు. టార్గెట్ వంటి స్టోర్లలో పోకీమాన్ కార్డుల కోసం రీసెల్లర్లు ఘర్షణకు దిగుతున్నారు. ఒకప్పుడు వినోదంగా ఉన్న ఈ వస్తువులు ఇప్పుడు వేల రూపాయల లాభాలను కురిపిస్తున్నాయి. వస్తువు ఏదైనా సరే… అది పాత రంగు రాళ్లైనా, స్ఫటికాలైనా లాభం వస్తుందంటే చాలు రీసెల్లర్లు వదలడం లేదు.
డిజిటల్ తెరపై వేలం
జాషువా వర్నెల్ తన హ్యారీ టోర్నాడో యూట్యూబ్ ఛానల్ ద్వారా లక్షలాది మందికి ఈ వ్యాపారం నేర్పిస్తున్నాడు. అతను ఒకసారి ఫ్లీ మార్కెట్లో దొరికిన రాళ్లను అమ్మితే 8.3 లక్షల రూపాయలు వచ్చాయి. ఇప్పుడు వాట్నాట్ వంటి యాప్లలో వేలం పాటలు హోరెత్తుతున్నాయి. ఒక మహిళ క్రిస్ దగ్గర 3,200 రూపాయలకు కొన్న పాత గౌనును తిరిగి రూపాయలకు అమ్మింది. వస్తువు విలువ దాని అవసరంలో లేదు… దాన్ని ఎంత ఎక్కువ ధరకు వేలం వేయగలమనే దానిపైనే ఆధారపడి ఉంది.
వ్యర్థాల వెనుక అర్థం
ప్రపంచవ్యాప్తంగా ఏటా 10 వేల కోట్ల వస్త్రాలు ఉత్పత్తి అవుతున్నాయి. ఇది 25 ఏళ్ల క్రితంతో పోలిస్తే రెట్టింపు. ఈ అతిగా ఉత్పత్తి చేయడం వల్ల పర్యావరణం దెబ్బతింటోంది. రీసెల్లర్లు వీటిని తిరిగి అమ్మడం వల్ల పర్యావరణానికి మేలు జరుగుతోందని వాదిస్తున్నారు. కానీ ఈ ప్రక్రియలో ధరలు కృత్రిమంగా పెరుగుతున్నాయి. వేగంగా మారుతున్న ఫ్యాషన్ ప్రపంచం పాత వస్తువులను కూడా వ్యాపార వస్తువులుగా మార్చేసింది. మనుషుల జ్ఞాపకాలు కూడా ఇప్పుడు ట్యాగ్లు తగిలించిన లాభాల వస్తువులే.
