- మనిషి మెదడును చదివే కొత్త టెక్ ప్రయోగం
- కొత్త విషయాలను స్వయంగా కనిపెట్టే ఏఐ
- గేమింగ్ అనుభవంతో కొత్త ఏఐ మోడల్
సహనం వందే, హైదరాబాద్:
చైనా బిలియనీర్ ఇప్పుడు టెక్ ప్రపంచాన్ని ఆశ్చర్యపరిచే కొత్త ప్రాజెక్టుకు శ్రీకారం చుట్టారు. మనిషి మెదడు ఎలా ఆలోచిస్తుందో అదే ఆలోచనా విధానాన్ని యంత్రాలకు నేర్పించే డిస్కవరేటివ్ ఏఐ ప్రయోగం ప్రారంభించారు. ఒక శాస్త్రవేత్త ప్రయోగం చేసే సమయంలో మెదడు ఎలా పనిచేస్తుందో ఏఐ విశ్లేషిస్తుంది. ఆ తర్కాన్ని అల్గోరిథమ్ రూపంలోకి మార్చి అదే విధంగా యంత్రం ఆలోచించేలా రూపొందిస్తారు. ఇది విజయవంతమైతే శాస్త్ర సాంకేతిక రంగంలో విప్లవాత్మక మార్పులు సంభవించవచ్చని నిపుణులు చెబుతున్నారు. దీన్నే బ్రెయిన్ హ్యాకింగ్ అంటున్నారు.
ఏమిటీ బ్రెయిన్ హ్యాకింగ్
బ్రెయిన్ హ్యాకింగ్ అంటే మనిషి మెదడును ఆపరేట్ చేయడం కాదు. మనిషి మెదడు ఏదైనా సమస్యను పరిష్కరించినప్పుడు ఏ విధంగా ఆలోచిస్తుందో ఆ ఆలోచనా విధానాన్ని ఏఐ ద్వారా పట్టుకోవడమే ఈ ప్రయోగం ముఖ్య ఉద్దేశ్యం. ఉదాహరణకు ఒక శాస్త్రవేత్త కొత్త మందును కనుగొనడానికి తన మెదడును ఎలా ఉపయోగిస్తాడో ఆ ఆలోచనా తీరును ఏఐకి నేర్పిస్తారు. ఆ తర్వాత అదే ఏఐ మనిషి కన్నా వేగంగా కొత్త ఆవిష్కరణలను సొంతంగా చేస్తుంది.
డిస్కవరేటివ్ ఏఐ అంటే ఏమిటి
సాధారణంగా ఏఐ ఇప్పటివరకు ఉన్న సమాచారాన్ని మాత్రమే విశ్లేషిస్తుంది. కానీ ఈ కొత్త ఏఐ అలా కాదు. ఇది కొత్త విషయాలను కనిపెట్టడానికి (డిస్కవర్) ప్రయత్నిస్తుంది. మనకు తెలియని కొత్త కెమికల్ ఫార్ములాలను లేదా కొత్త టెక్నాలజీని ఇది తయారు చేస్తుంది. మన మెదడు ఎలాగైతే కొత్త ఆలోచనలను పుట్టిస్తుందో ఈ ఏఐ కూడా సరిగ్గా అలాగే కొత్త ఆవిష్కరణలను సృష్టిస్తుంది. దీనివల్ల పరిశోధనల సమయం చాలా వరకు తగ్గుతుంది.
ఏఐకి గేమింగ్ అనుభవం
ఆటలలో ఆటగాడు ఎలా స్పందిస్తాడో, ఎటువంటి నిర్ణయాలు తీసుకుంటాడో గేమింగ్ డిజైనర్లు బాగా అధ్యయనం చేస్తారు. అదే అనుభవాన్ని ఆయన ఇప్పుడు ఏఐకి ఉపయోగిస్తున్నారు. ఒక ఆటగాడు క్లిష్టమైన సమయంలో ఎలా ఆలోచిస్తాడో అదే తర్కాన్ని ఈ ఏఐకి అందిస్తున్నారు. గేమింగ్ లోని వేగవంతమైన నిర్ణయాల సామర్థ్యాన్ని ఏఐలోని విశ్లేషణ సామర్థ్యంతో కలిపి ఈ సరికొత్త ఆవిష్కరణను రూపొందిస్తున్నారు.
ఎలా పని చేస్తుంది
ఈ ప్రాజెక్టులో ఏఐ… మెదడులోని సంకేతాలను డిజిటల్ రూపంలోకి మారుస్తుంది. దీనివల్ల ఒక మనిషి ఏదైనా విషయాన్ని కనిపెట్టడానికి పట్టే సమయం… ఏఐకి సెకన్ల వ్యవధి మాత్రమే పడుతుంది. మనిషి మెదడులోని సృజనాత్మకతను ఏఐ అపారమైన డేటా నిల్వ సామర్థ్యంతో ఈ బిలియనీర్ అనుసంధానిస్తున్నారు. అంటే మనిషి మెదడు ఆలోచనను ఒక సాఫ్ట్ వేర్ రూపంలోకి మార్చి ఆ సాఫ్ట్ వేర్ ద్వారా కొత్త ఆవిష్కరణలను వేగంగా చేస్తారన్నమాట.
ఎందుకు ఈ ప్రయోగం
ప్రస్తుతం ప్రపంచంలో ఎన్నో క్లిష్టమైన సమస్యలు ఉన్నాయి. రోగాలకు మందులు కనుగొనడం, కొత్త ఇంధనాలను కనిపెట్టడం వంటివి సాధారణ రీతిలో చేయడానికి కొన్ని ఏళ్ల సమయం పడుతుంది. కానీ ఈ బ్రెయిన్ ఆధారిత ఏఐ ద్వారా కేవలం కొన్ని రోజుల లేదా గంటల్లోనే పరిష్కారాలను కనుగొనవచ్చు. అందుకే ఆయన ఈ భారీ ప్రయోగానికి కోట్లాది రూపాయల పెట్టుబడులను కేటాయిస్తున్నారు. ఇది వైద్య, శాస్త్ర సాంకేతిక రంగాలలో పెను మార్పులను తీసుకురానుంది.
ముందున్న సవాళ్లు
మెదడును చదవడం అనేది చాలా సున్నితమైన అంశం. మనిషి ప్రైవసీని కాపాడటం అనేది పెద్ద సవాలు. అలాగే మనిషి ఆలోచనలను ఏఐ మిస్ ఇంటర్ప్రెట్ చేసే అవకాశం కూడా ఉంది. కానీ ఈ బిలియనీర్ తన టీమ్ తో కలిసి అత్యంత భద్రమైన పద్ధతుల్లో ఈ హ్యాకింగ్ ప్రక్రియను చేపడుతున్నారు. టెక్ ప్రపంచం ఆసక్తిగా ఎదురుచూస్తున్న ఈ ప్రయోగం విజయవంతమైతే మానవ చరిత్రలో ఒక కొత్త అధ్యాయం మొదలవుతుంది.
