చావుకు చట్టం… బతుకు కష్టం – జెర్సీలో మరణం హక్కు

• రోగులకు భారీ ఊరటగా వర్ణన
• వచ్చే ఏడాదే నుంచి అమలు
• నైతిక విలువలపై చర్చ…
• చావడానికి అర్హతలు ఏంటంటే?

సహనం వందే, జెర్సీ:

తీవ్రమైన అనారోగ్యంతో బాధపడుతున్న వారు తమ ప్రాణాలను తీసుకోవడానికి జెర్సీ ప్రభుత్వం చట్టబద్ధమైన అనుమతి ఇచ్చింది. చనిపోవాలనుకునే హక్కును కల్పిస్తూ చారిత్రాత్మక నిర్ణయం తీసుకుంది. ఇది బ్రిటీష్ దీవుల్లోనే ఒక సంచలన మార్పుగా మారింది. అయితే ఈ నిర్ణయంపై ఇప్పుడు ప్రపంచవ్యాప్తంగా అనుకూల, వ్యతిరేక వాదనలు మొదలయ్యాయి.

చట్టబద్ధమైన మరణం
జెర్సీ ప్రభుత్వం అసెస్టెడ్ డయింగ్ చట్టానికి గ్రీన్ సిగ్నల్ ఇచ్చింది. దీనివల్ల ప్రాణాంతక వ్యాధులతో బాధపడేవారు గౌరవప్రదంగా తనువు చాలించవచ్చు. ఈ మేరకు శుక్రవారం చట్టం తుది ఆమోదం పొందింది. వచ్చే ఏడాది వేసవి నాటికి మొదటి దయామరణం జరిగే అవకాశం ఉంది. ఈ చట్టం అమలు కోసం అధికారులు అన్ని ఏర్పాట్లు చేస్తున్నారు. 32 మంది రాజకీయ నాయకులు అనుకూలంగా ఓటు వేయగా… 16 మంది వ్యతిరేకించారు.

చావడానికి అర్హతలు…
ఈ చట్టం అందరికీ వర్తించదు. కేవలం ఆరు నెలల కంటే తక్కువ కాలం బతికే రోగులకు మాత్రమే అనుమతి ఉంటుంది. పార్కిన్సన్స్ లేదా మోటార్ న్యూరాన్ వంటి వ్యాధులు ఉన్నవారికి 12 నెలల గడువు ఇచ్చారు. బాధను భరించలేని స్థితిలో ఉన్నవారు మాత్రమే దరఖాస్తు చేసుకోవాలి. జెర్సీలో కనీసం 12 నెలల నుంచి నివసిస్తున్న వారే దీనికి అర్హులు. ఐల్ ఆఫ్ మ్యాన్ తర్వాత ఈ చట్టాన్ని తెచ్చిన రెండో ప్రాంతంగా జెర్సీ నిలిచింది.

రోగుల హర్షాతిరేకాలు
రొమ్ము క్యాన్సర్‌తో బాధపడుతున్న లోర్నా పిరోజోలో ఈ నిర్ణయాన్ని స్వాగతించారు. తాను చనిపోవడానికి భయపడటం లేదని కానీ బాధను భరించడమే భయంగా ఉందని ఆమె చెప్పారు. హ్యూమనిస్ట్స్ యూకే చీఫ్ ఆండ్రూ కోప్సన్ కూడా దీనిని ప్రశంసించారు. ఇది రోగులకు ఇచ్చే గొప్ప గౌరవమని ఆయన అభిప్రాయపడ్డారు. చివరి క్షణాల్లో గౌరవంగా చనిపోయే హక్కును ప్రజలు కోరుకుంటున్నారని ఆయన పేర్కొన్నారు.

నైతిక విలువల వాదన
ఈ చట్టాన్ని వ్యతిరేకిస్తున్న వారు కూడా ఉన్నారు. డిప్యూటీ సర్ ఫిలిప్ బైల్హాచే దీనిని తీవ్రంగా ఖండించారు. ప్రాణం చాలా విలువైనదని దానిని తీసివేసే హక్కు ఎవరికీ లేదని ఆయన వాదించారు. ఇది జెర్సీ సమాజంపై చెడు ప్రభావాన్ని చూపుతుందని ఆయన హెచ్చరించారు. నైతిక కోణంలో ఇది సరైన నిర్ణయం కాదని ఆయన అసెంబ్లీలో చెప్పారు. దీనివల్ల భవిష్యత్తులో అనేక సమస్యలు వస్తాయని ఆయన ఆందోళన వ్యక్తం చేశారు.

బ్రిటన్ రాజకీయాల్లో వేడి
జెర్సీ నిర్ణయంతో బ్రిటన్ అంతటా చర్చ మొదలైంది. లార్డ్ చార్లీ ఫాల్కనర్ దీనిని సమర్థించారు. ప్రస్తుత చట్టాలు చాలా క్రూరంగా ఉన్నాయని ఆయన విమర్శించారు. లండన్, వేల్స్‌లో కూడా ఇలాంటి చట్టాల కోసం ప్రయత్నాలు జరుగుతున్నాయి. కానీ అక్కడ ప్రక్రియ చాలా నెమ్మదిగా సాగుతోంది. జెర్సీ సొంత నిర్ణయం తీసుకునే అధికారాన్ని ఉపయోగించుకుందని ఆయన స్పష్టం చేశారు.