- బిల్ క్లింటన్, బిల్ గేట్స్ అందరూ అందరే
- సెక్స్ రాకెట్ కింగ్ ఎప్ స్టీన్ సీక్రెట్స్ బట్టబయలు
- ప్రపంచాన్ని వణికిస్తున్న 35 లక్షల ఫైళ్లు
- కామాంధుడి వలలో ప్రముఖుల విలవిల
- కోట్లాది రూపాయల ముడుపుల జాతర
సహనం వందే, అమెరికా:
ప్రపంచాన్ని శాసించే దేశాధినేతలు… అపర కుబేరులు… మేధావుల అసలు స్వరూపం బయటపడింది. సెక్స్ రాకెట్ కింగ్ పిన్ జెఫ్రీ ఎప్ స్టీన్ నిర్వహించిన నరకకూపం తాలూకు వివరాలు ఇప్పుడు అగ్రరాజ్యంలో ప్రకంపనలు పుట్టిస్తున్నాయి. నీతి నియమాలు చెప్పే పెద్దలు తెర వెనుక ఎంతటి దారుణాలకు పాల్పడ్డారో ఈ లక్షలాది పత్రాలు సాక్ష్యమిస్తున్నాయి. ఇది కేవలం ఒక వ్యక్తి నేరం కాదు… అంతర్జాతీయ వ్యవస్థలోని ఒక కుళ్ళిన భాగం.
ఎవరు ఈ జెఫ్రీ ఎప్ స్టీన్?
జెఫ్రీ ఎప్ స్టీన్ ఒకప్పుడు సాధారణ గణిత ఉపాధ్యాయుడు. కానీ అతి తక్కువ కాలంలోనే వాల్ స్ట్రీట్ కుబేరుడిగా ఎదిగాడు. ఆయన ఎదుగుదల వెనుక మేధస్సు కంటే మాయాజాలమే ఎక్కువ. ధనవంతుల డబ్బును పెట్టుబడిగా పెడుతూ వేల కోట్ల రూపాయల సంపదను సృష్టించాడు. సుమారు 4,500 కోట్ల రూపాయల ఆస్తులతో విలాసవంతమైన జీవితాన్ని గడిపాడు. సొంతంగా ఒక దీవిని (లిటిల్ సెయింట్ జేమ్స్ ఐలాండ్) కొనుగోలు చేసి దాన్ని అక్రమ కార్యకలాపాలకు అడ్డాగా మార్చుకున్నాడు.
ప్రముఖులతో దోస్తీ ఎందుకు?
ఎప్ స్టీన్ కు అమెరికా అధ్యక్షులు డొనాల్డ్ ట్రంప్, మాజీ అధ్యక్షుడు బిల్ క్లింటన్, బ్రిటన్ రాకుమారుడు ఆండ్రూ వంటి వారితో విడదీయలేని సంబంధాలు ఉండేవి. వీరందరినీ తన వలలో వేసుకోవడానికి ఎప్ స్టీన్ ‘హనీ ట్రాప్’ను ఆయుధంగా వాడుకున్నాడు. తన ప్రైవేట్ విమానాల్లో, దీవుల్లో విందులు ఏర్పాటు చేసి వారికి అమ్మాయిలను ఎరగా వేసేవాడు. మైక్రోసాఫ్ట్ అధినేత బిల్ గేట్స్ నుంచి ప్రఖ్యాత శాస్త్రవేత్త స్టీఫెన్ హాకింగ్ వరకు ఎందరో ప్రముఖులు ఆయనతో సంబంధాలు కలిగి ఉండటం ఇప్పుడు విస్మయానికి గురి చేస్తోంది.
35 లక్షల పేజీల విస్ఫోటనం…
అమెరికా ప్రభుత్వం విడుదల చేసిన 35 లక్షల డాక్యుమెంట్లు ఒక పెను నిధి లాంటివి. ఇందులో 1,80,000 ఫొటోలు, వేల సంఖ్యలో ఈమెయిళ్లు ఉన్నాయి. డొనాల్డ్ ట్రంప్ పేరు 1,800 సార్లు ప్రస్తావనకు వచ్చింది. 13 ఏళ్ల బాలికపై అత్యాచారం చేశారనే ఘోరమైన ఆరోపణలు ఇందులో ఉన్నాయి. ఎప్ స్టీన్ విమానాల్లో క్లింటన్ పలుమార్లు ప్రయాణించారని, ఆ సమయంలో యువతులతో గడిపారని సాక్ష్యాలు చెబుతున్నాయి. ప్రిన్స్ ఆండ్రూ రాజభవనంలోనే ఎప్ స్టీన్ తో విందులు చేయడం, అమ్మాయిలపై అసభ్యంగా ప్రవర్తించిన ఫొటోలు బయటపడ్డాయి.
అక్రమాల అసలు రూపం
ఎప్ స్టీన్ కేవలం వ్యభిచారం మాత్రమే చేయలేదు.. మైనర్ బాలికలను ట్రాఫికింగ్ చేసేవాడు. పేద కుటుంబాల నుంచి వచ్చిన అమ్మాయిలకు మాయమాటలు చెప్పి తన దీవికి రప్పించేవాడు. అక్కడ వారిని బడా బాబులకు బానిసలుగా మార్చేవాడు. దీని కోసం సుమారు 1,000 కోట్ల రూపాయలకు పైగా ఖర్చు చేసినట్లు తెలుస్తోంది. ఈ దారుణాలన్నింటినీ తన వద్ద ఉన్న సీక్రెట్ కెమెరాలతో రికార్డ్ చేసి ఆ తర్వాత ఆ ప్రముఖులను బ్లాక్ మెయిల్ చేసేవాడని దర్యాప్తు సంస్థలు అనుమానిస్తున్నాయి.
జైలు గదిలో మిస్టరీ మరణం
2019లో ఎప్ స్టీన్ జైలులో ఉండగానే ఉరివేసుకుని చనిపోయాడు. అయితే ఇది ఆత్మహత్య కాదు.. హత్యేనని చాలామంది నమ్ముతున్నారు. ఎప్ స్టీన్ బతికుంటే ప్రపంచంలోని చాలామంది పెద్దల జాతకాలు బయటకు వస్తాయని అందుకే ఆయనను మట్టుబెట్టారని ఆరోపణలు ఉన్నాయి. ఆయన చనిపోయిన సమయంలో జైలులోని సీసీటీవీ కెమెరాలు పనిచేయకపోవడం, గార్డులు నిద్రపోవడం అనేక అనుమానాలకు తావిస్తోంది. ఆయన మరణంతో చాలా రహస్యాలు ఆయనతోనే సమాధి అయ్యాయని అనుకున్నారు.. కానీ ఇప్పుడు పత్రాల రూపంలో అవి తిరిగి పుట్టుకొచ్చాయి.
అంతర్జాతీయ ప్రభావం
ఈ ఫైళ్ల విడుదల తర్వాత ప్రపంచవ్యాప్తంగా నిరసనలు వెల్లువెత్తుతున్నాయి. ముఖ్యంగా మహిళా సంఘాలు పెద్దల ముసుగులో ఉన్న కామాంధులను శిక్షించాలని డిమాండ్ చేస్తున్నాయి. అమెరికా, బ్రిటన్ దేశాల మధ్య దౌత్యపరమైన చిక్కులు మొదలయ్యాయి. అక్రమ సంపాదన, అధికార బలంతో ఎంతటి నేరాన్నైనా కప్పిపుచ్చవచ్చనే భ్రమను ఈ ఫైళ్లు పటాపంచలు చేశాయి. న్యాయ వ్యవస్థ ఇప్పుడు ఈ రాబందుల వేట మొదలుపెట్టింది.
