ప్రొటీన్ షేక్… లైఫ్ షాక్ – కండల కోసం యువత అతి తిండి

• ప్రొటీన్ పేరుతో కంపెనీల కొత్త దోపిడీ
• కిలోల లెక్కలో భారీ పొరపాట్లు
• బరువు తగ్గడం కాదు పెరుగుతారు
• పీచు లేని తిండితో ఆరోగ్యానికి ముప్పు
• ప్రపంచ ఆరోగ్య సంస్థ నిపుణుల హెచ్చరిక

సహనం వందే, హైదరాబాద్:

బరువు తగ్గాలనుకునే వారిని ప్రొటీన్ పిచ్చి పట్టి పీడిస్తోంది. కండలు పెంచాలన్నా, పొట్ట తగ్గాలన్నా ప్రొటీన్ ఒక్కటే మార్గమని నమ్మించే వ్యాపార మాయాజాలం దేశంలో ముదురుతోంది. అయితే అవసరం లేకున్నా దండిగా ప్రొటీన్ షేకులు, మాంసం తినడం వల్ల ఒళ్లు తగ్గకపోగా కొత్త రోగాలు పుట్టుకొస్తాయని ఆరోగ్య నిపుణులు హెచ్చరిస్తున్నారు. ప్రొటీన్ లెక్కల వెనుక ఉన్న అసలు నిజాలను విశ్లేషిస్తే సామాన్యులు షాక్ అవ్వాల్సిందే.

కంపెనీల ప్రోటీన్ మాయాజాలం
ప్రస్తుతం మార్కెట్లో దొరికే బిస్కెట్లు, చిప్స్, చివరికి చాక్లెట్లలో కూడా ప్రొటీన్ ఉందని ప్రచారం చేస్తున్నారు. జనం కూడా ఆరోగ్యంగా ఉంటామనే భ్రమలో వీటిని ఎగబడి కొంటున్నారు. కానీ ఇవన్నీ అత్యంత ప్రమాదకరమైన ప్రాసెస్ చేసిన ఆహారాలని డాక్టర్ మెఘన్ హెచ్చరిస్తున్నారు. కేవలం ప్రొటీన్ గ్రాముల మీద దృష్టి పెట్టి అందులో ఉండే కెమికల్స్, షుగర్లను ప్రజలు పట్టించుకోవడం లేదు. ఇది వ్యాపార సంస్థలకు కాసుల వర్షం కురిపిస్తుంటే సామాన్యుల ఆరోగ్యం బుగ్గిపాలవుతోంది.

కిలోల లెక్కలో కిటుకు ఇదీ
చాలా మంది తమ ప్రస్తుత బరువును బట్టి ప్రొటీన్ తింటున్నారు. ఉదాహరణకు మీరు 90 కిలోల బరువు ఉండి.. 70 కిలోలకు తగ్గాలని అనుకుంటున్నారు అనుకోండి. మీరు 90 కిలోలకు సరిపడా ప్రొటీన్ తినకూడదు. ఎందుకంటే మీ శరీరంలో ఉన్న ఆ అదనపు 20 కిలోలు కేవలం కొవ్వు మాత్రమే. ఆ కొవ్వుకు ప్రొటీన్ అవసరం లేదు. మీరు చేరుకోవాల్సిన 70 కిలోల లక్ష్యానికి తగ్గట్టే ప్రొటీన్ తీసుకోవాలి. ఈ చిన్న లాజిక్ మిస్ అవ్వడం వల్లే డైటింగ్ చేస్తున్నా చాలా మంది బరువు తగ్గడం లేదు.

లక్ష్యానికి మించితే ముప్పే
బరువు తగ్గాలనుకునే వారు రోజుకు ఒక కిలో శరీర బరువుకు 1 నుండి 1.2 గ్రాముల ప్రొటీన్ తీసుకుంటే సరిపోతుంది. మీరు 70 కిలోల బరువు ఉండాలని లక్ష్యంగా పెట్టుకుంటే.. రోజుకు 70 నుండి 80 గ్రాముల ప్రొటీన్ చాలు. కానీ ప్రస్తుత బరువు 90 కిలోల లెక్కన 110 గ్రాములు తింటే ఆ అదనపు 30 గ్రాములు శరీరంలోకి అనవసరమైన క్యాలరీలను పంపుతాయి. ఇది రోజుకు సుమారు 120 అదనపు క్యాలరీలకు సమానం. అంటే మీరు బరువు తగ్గడానికి చేసే ప్రయత్నమే మీకు శాపంగా మారుతోంది.

పీచు పదార్థాన్ని మర్చిపోయారు
ప్రొటీన్ డబ్బాల మీద ఉన్న శ్రద్ధ మన పెరట్లో దొరికే కూరగాయల మీద ఉండటం లేదు. ఫైబర్ అంటే పీచు పదార్థం లేని ప్రొటీన్ తిండి వల్ల మలబద్ధకం వంటి సమస్యలు వస్తాయి. చిక్కుళ్లు, పప్పు ధాన్యాలు, కూరగాయల్లో ప్రోటీన్ తో పాటు పీచు కూడా ఉంటుంది. ఇవి తింటే కడుపు నిండుగా ఉంటుంది. త్వరగా ఆకలి వేయదు. కానీ షేకులు తాగే వారు కేవలం ద్రవ రూపంలో ప్రొటీన్ తీసుకుని కడుపు ఖాళీగా అనిపించి మళ్లీ ఏదో ఒకటి తింటున్నారు. ఇది బరువు తగ్గడానికి అస్సలు సహకరించదు.

శరీరం చెప్పే మాట వినండి
కంప్యూటర్లు, మొబైల్ యాప్‌లు చెప్పే గ్రాముల లెక్కల కంటే మీ శరీరం ఇచ్చే సంకేతాలు ముఖ్యం. ఆకలి తీరిన తర్వాత కూడా కేవలం ప్రొటీన్ టార్గెట్ పూర్తి చేయాలని తినడం మూర్ఖత్వమే అవుతుంది. మన పూర్వీకులు ఎలాంటి ప్రొటీన్ పౌడర్లు లేకుండానే బలంగా ఉండేవారు. వారు తినే పప్పు, అన్నం, కూరగాయల్లోనే అన్ని పోషకాలు ఉండేవి. ఇప్పుడు ఆధునికత పేరుతో కృత్రిమ ఆహారానికి అలవాటు పడి ఆరోగ్యాన్ని నాశనం చేసుకుంటున్నాం. ఒత్తిడి లేకుండా ప్రశాంతంగా నిద్రపోవడం కూడా బరువు తగ్గడానికి ముఖ్యమని గుర్తుంచుకోవాలి.

నిలకడ లేని ప్రయత్నం వృథా
ఏదో ఒక వారం రోజులు ప్రొటీన్ తిని ఆ తర్వాత మానేయడం వల్ల ఎలాంటి ఫలితం ఉండదు. ఇది ఒక రోజులో వచ్చే మార్పు కాదు. ఆరోగ్యకరమైన జీవనశైలిని జీవితాంతం కొనసాగించాలి. అతిగా ప్రొటీన్ తింటే కిడ్నీలపై భారం పడే అవకాశం కూడా ఉంది. కాబట్టి ప్రచార చిత్రాలను చూసి మోసపోకుండా ఇంటి భోజనానికే ప్రాధాన్యత ఇవ్వాలి. ప్రొటీన్ అనేది ఆహారంలో ఒక భాగం మాత్రమే. అదే మొత్తం ఆహారం కాకూడదు. అప్పుడే ఆరోగ్యకరమైన రీతిలో బరువు తగ్గడం సాధ్యమవుతుంది.