మామిడి పండుపై జపాన్ బండ -నాణ్యత లేదని నిషేధించిన దేశం

• దీంతో ఎక్కడికక్కడ ఎగుమతులకు బ్రేక్
• రైతులకు భారీ లాభాలిచ్చే వ్యాపారానికి దెబ్బ

సహనం వందే, హైదరాబాద్:

తీపి మామిడికి చేదు అనుభవం ఎదురైంది. జపాన్ గడ్డపై అడుగుపెట్టాల్సిన భారతీయ మామిడికి తాత్కాలికంగా అడ్డంకులు ఏర్పడ్డాయి. శుద్ధి ప్రక్రియలో జరిగిన లోపాలు మన ఎగుమతిదారుల గొంతు కోశాయి. దశాబ్దాల క్రితం తొలగిన కష్టాలు మళ్ళీ వెంటాడుతున్నాయి. ఇప్పుడు ఆ దేశం తలుపులు మూసేయడంతో ఎగుమతిదారుల కళ్ళలో నీళ్లు తిరుగుతున్నాయి.

విధానాల్లో లోపం
జపాన్ క్వారంటైన్ అధికారులు భారతీయ మామిడి ఎగుమతులపై తీవ్ర అసంతృప్తి వ్యక్తం చేశారు. ఫ్యూమిగేషన్, క్రిమిసంహారక చర్యలలో భారీ లోపాలను వారు గుర్తించారు. ముఖ్యంగా ఉత్తరప్రదేశ్ లోని రెహ్మాన్ పూర్ లో ఉన్న వాపరు హీట్ ట్రీట్ మెంట్ కేంద్రాన్ని పరిశీలించినప్పుడు ఈ గందరగోళం బయటపడింది. ఏటా ఎగుమతులకు ముందు జరిపే ఈ తనిఖీలలో ఈసారి పకడ్బందీ నిబంధనలు పాటించలేదని వారు నిర్ధారించారు.

నాణ్యత మెరుగుపడే వరకు ఆంక్షలు
సుమారు 20 ఏళ్ల సుదీర్ఘ ప్రయాణం ఇప్పుడు అర్ధంతరంగా ఆగిపోయింది. ఏ ఒక్క మామిడి పండును జపాన్ స్వీకరించబోమని యోకోహామా ప్లాంట్ ప్రొటెక్షన్ అసోసియేషన్ స్పష్టం చేసింది. ఈ నిషేధం ఎప్పటివరకు కొనసాగుతుందనే దానిపై స్పష్టత లేదు. మన ఎగుమతి కేంద్రాల పనితీరులో నాణ్యత మెరుగుపడే వరకు ఈ ఆంక్షలు అమల్లోనే ఉంటాయి.

కొట్టుమిట్టాడుతున్న రకాలు
జపాన్ మార్కెట్లో మన దేశానికి చెందిన అల్ఫోన్సా, కేసర్, లంగ్రా, బంగనపల్లి రకాలకు విపరీతమైన గిరాకీ ఉంది. అయితే ఇప్పుడు వీటన్నింటి ఎగుమతులు నిలిచిపోయాయి. 2025-26 సంవత్సరంలో మన దేశం నుంచి జపాన్ కు అత్యధికంగా ఎగుమతి అయిన రకాల్లో గుజరాత్ కేసర్ మామిడిదే అగ్రస్థానం. ఈ ఆంక్షలతో ముఖ్యంగా గుజరాత్ ఎగుమతిదారులకు భారీ నష్టం వాటిల్లడం ఖాయంగా కనిపిస్తోంది.

చరిత్రలో తొలిసారి కాదు…
భారతీయ మామిడికి జపాన్ ఆంక్షలు విధించడం ఇదే మొదటిసారి కాదు. 1986లో కూడా పండ్ల ఈగల బెడద కారణంగా జపాన్ నిషేధం విధించింది. ఆ తర్వాత సుదీర్ఘ చర్చలు జరిపి మన దేశం ఎగుమతి వ్యవస్థను ఆధునీకరించింది. వాపరు హీట్ ట్రీట్ మెంట్ వంటి పద్ధతులు ప్రవేశపెట్టి 20 ఏళ్ల తర్వాత మళ్ళీ జపాన్ మార్కెట్లోకి అడుగుపెట్టాం. మళ్ళీ అదే పరిస్థితి పునరావృతం కావడం ఇప్పుడు ఆందోళన కలిగిస్తోంది.

ఆర్థికంగా భారీ దెబ్బ…
జపాన్ మనకు చిన్న మార్కెట్ అనిపించినా అక్కడ లభించే ధర అత్యున్నతం. 2025-26లో భారత్ నుంచి జపాన్ కు ఎగుమతి అయిన తాజా శుద్ధి చేసిన మామిడి ఉత్పత్తుల విలువ కోట్ల రూపాయల్లో ఉంటుంది. ఈ మొత్తం ఇప్పుడు గాలిలో కలిసిపోయింది. ఇప్పటికే వేడిగాలులు, రవాణా ఖర్చులు, ఇరాన్ ఉద్రిక్తతల వల్ల నష్టపోతున్న వ్యాపారులకు ఈ నిషేధం మరో పెద్ద దెబ్బలా మారింది.

నిబంధనల కఠినత్వం
నిబంధనల ప్రకారం కేవలం 6 రకాల మామిడిని మాత్రమే జపాన్ కు ఎగుమతి చేసేందుకు అనుమతి ఉంది. అల్ఫోన్సా, కేసర్, బంగనపల్లి, లంగ్రా, చౌసా, మాలిక రకాలను మాత్రమే ఎంపిక చేసిన కేంద్రాల నుంచి పంపాలి. ఆంధ్రప్రదేశ్, మహారాష్ట్ర, గుజరాత్, ఉత్తరప్రదేశ్, పశ్చిమ బెంగాల్ రాష్ట్రాల్లోనే ఈ సౌకర్యాలు ఉన్నాయి. ఈ కీలక కేంద్రాలే ఇప్పుడు జపాన్ కళ్ళలో పడటంతో యావత్ ఎగుమతి రంగానికి గడ్డుకాలం మొదలైంది.