- రంగంలోకి గూగుల్, మెటా
- వాట్సప్, టెలిగ్రామ్ అకౌంట్లు బ్లాక్
- ఐపీ అడ్రస్ ట్రాకింగ్… డిజిటల్ కత్తెర రెడీ
సహనం వందే, హైదరాబాద్:
దేశంలో ప్రతిష్టాత్మక పరీక్షల లీకేజీల వ్యవహారం లక్షలాది మంది విద్యార్థుల భవిష్యత్తును అంధకారంలోకి నెట్టేస్తోంది. కష్టపడి చదివే విద్యార్థుల జీవితాలతో పైసలు ఇచ్చి పేపర్లు కొనే దొంగలు ఆడుకుంటున్నారు. ఈ నేపథ్యంలో కేంద్ర ప్రభుత్వం గూగుల్, మెటా, టెలిగ్రామ్ వంటి టెక్ దిగ్గజాలను రంగంలోకి దించి లీకు వీరుల గుండెల్లో రైళ్లు పరిగెత్తిస్తోంది.
డిజిటల్ చెలగాటం
పరీక్ష అనగానే విద్యార్థుల్లో టెన్షన్ ఉండాలి. కానీ మన దేశంలో పేపర్ లీక్ అవుతుందేమోనన్న భయం ఎక్కువైపోయింది. దేశవ్యాప్తంగా సంచలనం సృష్టించిన నీట్ పరీక్ష రచ్చ అంతా ఇంతా కాదు. డాక్టర్లు కాబోయే విద్యార్థుల జీవితాలతో ఇలాంటి చెలగాటం ఏంటని దేశమంతా అట్టుడికిపోయింది. రీఎగ్జామ్ విషయంలో కేంద్ర ప్రభుత్వం ఎంత సీరియస్గా ఉందో ఈ లేటెస్ట్ టెక్ నిర్ణయమే స్పష్టం చేస్తోంది.
లక్ష్యంగా సోషల్ మీడియా
సాధారణంగా ఈ మధ్యకాలంలో లీకైన క్వశ్చన్ పేపర్లు ఎక్కడ చక్కర్లు కొడుతున్నాయి? వాట్సాప్ గ్రూపుల్లో, టెలిగ్రామ్ ఛానల్స్లో, గూగుల్ డ్రైవ్లలోనే కదా! సరిగ్గా కేంద్ర ప్రభుత్వం ఇక్కడే దెబ్బ కొట్టింది. ఎక్కడైతే తప్పు జరుగుతుందో ఆ రూట్నే బ్లాక్ చేయాలని డిసైడ్ అయింది. మెటా, గూగుల్, టెలిగ్రామ్ సంస్థలను పిలిచి మీ ప్లాట్ఫామ్స్ ద్వారా ఒక్క పేపర్ ముక్క కూడా బయటకు రాకూడదని స్ట్రిక్ట్ ఆర్డర్స్ పాస్ చేసింది.
అత్యవసర ఆదేశాలు
కేంద్ర ఐటీ శాఖ అధికారులు ఆయా సోషల్ మీడియా సంస్థలతో అత్యవసర సమావేశం నిర్వహించారు. క్వశ్చన్ పేపర్లు, హింట్లు లేదా పరీక్షకు సంబంధించిన ఎలాంటి అనుమానాస్పద కంటెంట్ కనిపించినా వెంటనే వాటిని డిలీట్ చేయాలని ఆదేశించారు. అంతేకాదు ఆ సమాచారాన్ని వైరల్ చేస్తున్న గ్రూపులు, అకౌంట్ల వివరాలను ఎప్పటికప్పుడు ప్రభుత్వానికి రిపోర్ట్ చేయాలని టైమ్లైన్ కూడా విధించింది.
కష్టపడే విద్యార్థికి న్యాయం
దీనివల్ల సాధారణ విద్యార్థులకు, తల్లిదండ్రులకు వచ్చే లాభం ఏంటి? నిరంతరం కష్టపడే విద్యార్థికి న్యాయం జరుగుతుంది. టెక్నాలజీ సాయంతో లీక్ చేసే వాళ్లను ముందే పట్టుకోవడం వల్ల పరీక్షలు ప్రశాంతంగా జరుగుతాయి. అయితే ఇందులో ఒక చిన్న సమస్య కూడా ఉంది. గ్రూపుల్లో నిజంగానే డౌట్లు అడిగే విద్యార్థుల అకౌంట్లు కూడా పొరపాటున బ్లాక్ అయ్యే అవకాశం ఉంది. కాబట్టి టెక్ కంపెనీలు చాలా జాగ్రత్తగా వ్యవహరించాల్సి ఉంటుంది.
డిజిటల్ రోడ్ మ్యాప్
ఈ నిర్ణయం కేవలం నీట్ పరీక్షకే పరిమితం కాదు… భవిష్యత్తులో దేశంలో జరిగే ప్రతి పెద్ద పరీక్షకూ ఇదొక రోడ్ మ్యాప్ లాంటిది. డిజిటల్ ఇండియాలో నేరాలు కూడా డిజిటల్గానే జరుగుతున్నప్పుడు వాటిని అడ్డుకునే ఆయుధం కూడా డిజిటల్ టెక్నాలజీనే కావాలి. టెక్ దిగ్గజాలు ప్రభుత్వంతో చేతులు కలిపితే వ్యవస్థలో పారదర్శకత పెరిగి దేశ విద్యావ్యవస్థపై ప్రజల్లో మళ్లీ నమ్మకం కుదురుతుంది.
ఏఐ సంకెళ్లు
గతంలో టెలిగ్రామ్ లాంటి యాప్స్ ప్రైవసీ పేరుతో ప్రభుత్వాలకు సమాచారం ఇవ్వడానికి వెనకాడేవి. కానీ పరీక్షల లీకేజీ అనేది దేశ భవిష్యత్తుకు సంబంధించిన సమస్య కాబట్టి ఈసారి ఆ సంస్థలు కూడా వెనక్కి తగ్గాయి. ఆర్టిఫిషియల్ ఇంటెలిజెన్స్ టూల్స్ ద్వారా నీట్ క్వశ్చన్ పేపర్ అనే పదాలు ఎక్కడ వాడినా సిస్టమ్ అలర్ట్ అయిపోయేలా కోడింగ్ సెట్ చేస్తున్నారు. గ్రూపుల్లో పేపర్ షేర్ చేయడమే ఆలస్యం అటు పేపర్ డిలీట్ అవ్వడంతో పాటు ఇటు పోలీసులకు లొకేషన్తో సహా ఐపీ అడ్రస్ చేరిపోతుంది.
