- ఇన్స్టామార్ట్ డెలివరీలో విస్తుపోయే వింతలు
- డెలివరీ బాయ్కు ఏకంగా 68 వేల భారీ టిప్
- లక్ష రూపాయల విలువైన కండోమ్స్ ఆర్డర్
- ధనవంతుల వింత చేష్టలతో సామాన్యుడి షాక్
సహనం వందే, బెంగళూరు:
ఆన్ లైన్ డెలివరీ యాప్లు ఇప్పుడు కేవలం అవసరాల కోసమే కాదు… వింతలకు, విశేషాలకు వేదికగా మారుతున్నాయి. నిత్యావసర వస్తువుల నుంచి విలాసాల వరకు ఏది కావాలన్నా చిటికెలో ఇంటి ముందుకు వచ్చేస్తున్నాయి. అయితే తాజాగా బెంగళూరులో వెలుగు చూసిన కొన్ని ఆర్డర్లు చూస్తే మాత్రం మతిపోవాల్సిందే. డబ్బుంటే ఏమైనా చేయొచ్చు అన్నట్టుగా కొందరు కస్టమర్లు వ్యవహరిస్తున్న తీరు చర్చనీయాంశంగా మారింది.
లక్ష రూపాయల కండోమ్స్…
సాధారణంగా ఎవరైనా కిరాణా సామాను లేదా కూరగాయలు ఆర్డర్ చేస్తారు. కానీ బెంగళూరులో ఒక కస్టమర్ ఏకంగా ఒక లక్ష రూపాయల విలువైన కండోమ్స్ ఆర్డర్ ఇచ్చారు. ఇన్స్టామార్ట్ యాప్లో అందుబాటులో ఉన్న ప్రతి బ్రాండ్, ప్రతి రకాన్ని భారీ సంఖ్యలో కొనుగోలు చేశారు. భారీ బాక్సులతో వచ్చిన డెలివరీ బాయ్ మొదట అది ఏదో ఎలక్ట్రానిక్ వస్తువు అనుకున్నాడు. తీరా చూస్తే అందులో ఏముందో తెలిసి నోరెళ్లబెట్టాడు. ఇదొక సరదా కోసమో లేక తన హోదాను చాటుకోవడానికో చేసిన పనిలా కనిపిస్తోందని స్థానికులు చర్చించుకుంటున్నారు.
డెలివరీ బాయ్కు జాక్పాట్…
మరో ఆసక్తికర ఘటనలో ఒక డెలివరీ బాయ్కు ఏకంగా 68 వేల రూపాయల టిప్ లభించింది. తక్కువ విలువ గల వస్తువులనే ఆర్డర్ చేసిన సదరు కస్టమర్… డెలివరీ ఇచ్చిన వ్యక్తికి ఇంత భారీ మొత్తాన్ని బహుమతిగా ఇచ్చాడు. ఆ మొత్తాన్ని చూసిన డెలివరీ బాయ్ నమ్మలేకపోయాడు. అది పొరపాటున పంపిన డబ్బు అని అనుకున్నా… కస్టమర్ మాత్రం మనస్ఫూర్తిగానే ఇచ్చినట్టు తేలింది. ఈ ఒక్క టిప్పుతో ఆ డెలివరీ బాయ్ కొన్ని నెలల సంపాదన ఒక్క రోజులోనే వచ్చి పడింది. బెంగళూరు వంటి నగరాల్లో ఇలాంటి అద్భుతాలు అప్పుడప్పుడు జరుగుతూనే ఉన్నాయి.
ఆన్లైన్ లో అన్నీ వింతలే
దేశవ్యాప్తంగా ఆన్లైన్ డెలివరీల్లో ఇలాంటి క్రేజీ ఘటనలు ఇప్పుడే కొత్త కాదు. గతంలో ఒక వ్యక్తి ఏకంగా 10 లక్షల రూపాయల విలువైన ఐస్క్రీమ్ ఆర్డర్ చేసి వార్తల్లో నిలిచాడు. మరొక చోట 5 లక్షల రూపాయల టిప్ ఇచ్చిన సందర్భాలు కూడా ఉన్నాయి. ఒకప్పుడు కేవలం హోటల్ తిండికి మాత్రమే పరిమితమైన డెలివరీ యాప్లు… ఇప్పుడు మనుషుల పిచ్చికి, విలాసాలకు అద్దం పడుతున్నాయి. సామాన్యులు వేల రూపాయల జీతం కోసం కష్టపడుతుంటే… ధనవంతులు ఇలా లక్షల్లో టిప్పులు, వింత ఆర్డర్లు ఇస్తూ వార్తల్లో నిలుస్తున్నారు.
ట్రెండ్ మారుతోంది…
ఇప్పుడు ఆన్లైన్ షాపింగ్ అనేది కేవలం ఒక సౌకర్యం కాదు. అది ఒక స్టేటస్ సింబల్గా మారిపోయింది. సోషల్ మీడియాలో వైరల్ కావడానికి లేదా ఇతరుల దృష్టిని ఆకర్షించడానికి ఇలాంటి పనులు చేస్తున్నారు. డెలివరీ చేసే వ్యక్తులకు ఒక్కోసారి ఇది వరంగా మారినా… మరికొన్నిసార్లు వారిని ఇబ్బందుల్లోకి నెట్టే అవకాశం ఉంది. రాబోయే రోజుల్లో 1 కోటి రూపాయల టిప్ ఇచ్చే మహానుభావులు వచ్చినా ఆశ్చర్యపోవాల్సిన పనిలేదు. టెక్నాలజీ పెరుగుతున్న కొద్దీ ఇలాంటి క్రేజీ ఆర్డర్లు మరిన్ని చూడాల్సి వస్తుందని టెక్ నిపుణులు అభిప్రాయపడుతున్నారు.
