ఫిరాయింపుల కంపు రాజకీయం – పార్టీలు మారినా దొరకని ఆధారాలు

• స్పీకర్ తీర్పుపై సర్వత్రా విస్మయం
• పాత బాటలోనే కాంగ్రెస్ ప్రభుత్వం

సహనం వందే, హైదరాబాద్:

తెలంగాణలో ఫిరాయింపుల రాజకీయం ముదిరి పాకాన పడింది. పదవుల కోసం పార్టీలు మారిన ఎమ్మెల్యేలను కాపాడేందుకు వ్యవస్థలను వాడుకుంటున్నారు. అధికార పార్టీ కండువాలు కప్పుకున్నా ఆధారాలు లేవనడం రాజకీయ నైతికతను ప్రశ్నార్థకం చేస్తోంది.

సాక్ష్యాల వేటలో స్పీకర్ నాటకం
గులాబీ గూడు వదిలి హస్తం నీడకు చేరిన ఐదుగురు ఎమ్మెల్యేలు పార్టీ మారలేదని స్పీకర్ ప్రసాద్ కుమార్ తేల్చారు. కళ్లముందే పార్టీ కండువాలు మార్చుకున్నా సాక్ష్యాలు లేవనడం హాస్యాస్పదంగా ఉంది. రాజ్యాంగ వ్యవస్థలను రాజకీయ పావులుగా వాడుకోవడం విడ్డూరం.

అధికార దాహం.. నైతికత శూన్యం
ఒక గుర్తుపై గెలిచి మరో పార్టీలోకి దూకడం ఆనవాయితీగా మారింది. అభివృద్ధి సాకుతో గూడు మారిన వారంతా ప్రజాస్వామ్యాన్ని వెన్నుపోటు పొడిచారు. గతంలో బీఆర్ఎస్ చేసిన తప్పిదాలనే కాంగ్రెస్ ఇప్పుడు పునరావృతం చేస్తోంది. విలువల గురించి మాట్లాడే నేతలు మౌనంగా ఉన్నారు.

కోర్టుల చుట్టూ కాలయాపన వ్యూహం
సుప్రీంకోర్టు మూడు నెలల గడువు ఇచ్చినా ఫలితం లేకుండా పోయింది. గడువు ముగిశాక వింత తీర్పులు ఇచ్చి కాలయాపన చేస్తున్నారు. కోర్టులంటే గౌరవం లేని పాలకులు చట్టాలను తమకు అనుకూలంగా మలుచుకుంటున్నారు. నాడు విమర్శించిన వారే నేడు నీతులు చెబుతున్నారు.

హామీలు అన్నీ నీటి మూటలే
పార్టీ మారితే అనర్హత వేటు పడేలా చట్టం తెస్తామని కాంగ్రెస్ నాడు ప్రగల్భాలు పలికింది. ఇప్పుడు సొంత రాష్ట్రంలో ఆ ఊసే ఎత్తడం లేదు. పదో షెడ్యూల్ ను నీరుగారుస్తూ సాగిస్తున్న ఈ తంతు ప్రజాస్వామ్యానికి శాపంగా మారింది. ఓటరు తీర్పు అంగట్లో సరుకుగా మారింది.

ఓటరుకు నిలువునా వంచన
నాడు కేసీఆర్ బాటలోనే నేడు రేవంత్ రెడ్డి పయనిస్తున్నారు. అధికార దాహం ముందు విలువలకి తావులేదని స్పష్టమవుతోంది. ఉప ఎన్నికలు రావని ముఖ్యమంత్రి ముందే చెప్పడం గమనార్హం. వ్యవస్థలన్నీ ప్రభుత్వ కనుసన్నల్లోనే నడుస్తున్నాయి. ఇది ఓటర్లను నిలువునా వంచించడమే అవుతుంది.