- ఆకలి యుద్ధం… మృత్యువు సిద్ధం
- అంతరించిన జాతుల ఆవేదన
- ప్రకృతి ఒడిలో అద్భుతాలు
- మనుగడ కోసం ఆఖరి పోరాటం
- భూమి మీద ప్రతి జీవికి బతికే హక్కు
సహనం వందే, హైదరాబాద్:
మనుషుల ప్రపంచంలో మనం కేవలం మనుషుల గురించే ఆలోచిస్తాం. కానీ అడవిలో ప్రతి జంతువు వెనుక ఒక కథ ఉంటుంది. ఆకలి, భయం, ప్రేమ, మనుగడ కోసం అవి చేసే పోరాటం మన గుండెల్ని పిండేస్తుంది. కెమెరా కంటికి చిక్కిన ఈ దృశ్యాలు కేవలం ఫొటోలు కావు… అవి మూగజీవాల మూగ వేదనలు. ప్రపంచ ప్రఖ్యాత వైల్డ్ లైఫ్ ఫొటోగ్రాఫర్ ఆఫ్ ది ఇయర్ వారు నిర్వహించిన పీపుల్స్ ఛాయిస్ అవార్డ్ 2026 పోటీల్లో ఆస్ట్రియన్ ఫొటోగ్రాఫర్ జోసెఫ్ స్టెఫాన్ తీసిన ఫ్లయింగ్ రోడెంట్ అనే చిత్రానికి ప్రథమ బహుమతి లభించింది. మరో నాలుగు చిత్రాలను కూడా ఎంపిక చేశారు.
అడవిలో ప్రతి శబ్దం వెనుక ఒక భయం…
అడవిలో ప్రతి శబ్దం వెనుక ఒక భయం ఉంటుంది. ప్రతి నిశ్శబ్దం వెనుక ఒక వేట ఉంటుంది. మనం కేవలం మనుషుల గురించే ఆలోచిస్తాం కానీ మూగజీవాల ప్రపంచంలో ప్రతీ రోజూ ఒక యుద్ధమే. ఆకలి తీర్చుకోవడానికి ఒకటి పోరాడితే… ప్రాణం నిలుపుకోవడానికి మరొకటి పరుగెడుతుంది. కెమెరా కంటికి చిక్కిన ఈ దృశ్యాలు కేవలం ఫొటోలు కావు… అవి ప్రకృతి రాసిన కన్నీటి కావ్యాలు.
గాలిలో ఎగిరిన ప్రాణం
స్పెయిన్ అడవుల్లో ఒక అద్భుతం జరిగింది. ఐబేరియన్ లంక్స్ అనే అరుదైన పిల్లి జాతి జంతువు తన ఆహారాన్ని గాలిలోకి విసిరి పట్టుకుంటోంది. ఆస్ట్రియన్ ఫొటోగ్రాఫర్ జోసెఫ్ స్టెఫాన్ దీనిని తన కెమెరాలో బంధించారు. సియుడాడ్ రియల్ ప్రాంతంలో రెండు వారాల పాటు పొంచి ఉంటే ఈ దృశ్యం దొరికింది. దాదాపు 20 నిమిషాల పాటు ఆ లంక్స్ ఒక ఎలుకతో ఆడుకుంది. చివరకు దానిని నోట కరుచుకుని పొదల్లోకి వెళ్లిపోయింది. ఈ ఫొటోకు 2026 సంవత్సరపు ఉత్తమ అవార్డు దక్కింది.
మంచు కొండల మౌన రోదన
మంచు కొండల్లో ధ్రువపు ఎలుగుబంట్ల బతుకు భారమైపోతోంది. కెనడాకు చెందిన క్రిస్టోఫర్ తీసిన ఫొటోలో ఒక తల్లి ఎలుగుబంటి తన మూడు పిల్లలతో రాళ్ల మీద పడుకుని ఉంది. సముద్రపు మంచు కరిగిపోవడంతో వాటికి ఆహారం దొరకడం లేదు. బ్రిటన్ ఫొటోగ్రాఫర్ నిమా తీసిన మరో దృశ్యం అందరినీ కదిలిస్తోంది. ఒక ఎలుగుబంటి పిల్ల మంచులో నడుస్తున్న ఆఖరి ఫొటో అది. మనుషుల వల్ల దాని తల్లి చనిపోయింది… ఆ పిల్ల ఎలుగుబంటిని కూడా కాల్చి చంపేశారు.
అభివృద్ధి తెచ్చిన ఆపద
నమీబియాలో ఫ్లెమింగో పక్షులు కరెంటు తీగల కింద బతుకుతున్నాయి. అలెగ్జాండర్ తీసిన ఈ ఫొటో అభివృద్ధి పేరుతో మనం చేస్తున్న వినాశనాన్ని చూపుతోంది. కెనడాలో రోడ్డు మీద ఆడుకుంటున్న ఎలుగుబంటి పిల్లలను విల్ నికోల్స్ చిత్రించారు. జపాన్ లోని ఒక వింత దృశ్యం మనల్ని భయపెడుతుంది. కొయి తీసిన ఫొటోలో ఒక జింక తన కొమ్ములకు వేలాడుతున్న తన శత్రువు తలను మోస్తూ తిరుగుతోంది. చనిపోయినా వదలని ఆ పోరాటం అడవి నియమం.
అమ్మ ప్రేమకు భాష లేదు
దక్షిణాఫ్రికాలో ఒక పాంగోలిన్ పిల్ల తన తల్లిని కోల్పోయి రక్షణ కేంద్రంలో దుప్పటిలో దాక్కుంది. దాని తల్లి వేటగాళ్ల చేతిలో గాయపడి బిడ్డకు జన్మనిచ్చి చనిపోయింది. కోస్టారికాలో వాన కురుస్తుంటే ఒక స్లాత్ తల్లి తన బిడ్డను గుండెలకు హత్తుకుంది. థాయ్లాండ్లోని సన్ బేర్, ఆస్ట్రేలియాలోని పొసమ్ తల్లి, భారత్ లోని మకాక్ కోతి ఇలా ప్రతి జీవి తన పిల్లలను కాపాడుకోవడానికి ప్రాణాలకు తెగిస్తున్నాయి. మనిషి స్వార్థం వల్ల ఇవన్నీ అంతరించిపోతున్నాయి. ప్రకృతికి మనం చేస్తున్న గాయానికి ఈ ఫోటోలు సాక్ష్యాలు. ఈ ప్రకృతి మనది మాత్రమే కాదు ప్రతీ జీవి కూడా… ఈ భూమి మీద బతికే హక్కు ప్రతీ జీవికి ఉంది.
