రోగి ప్రాణంతో ఏఐ జూదం – డేటా భద్రతపై నీలినీడలు

• నిఘా నీడలో రోగులు
• నిపుణుల హెచ్చరికల హోరు
• ఐఎస్‌బీలో వైద్యుల కీలక చర్చలు

సహనం వందే, హైదరాబాద్:

రోగి నాడి పట్టుకోవాల్సిన వైద్యుడి స్థానంలో యంత్రం కూర్చుంటే ఫలితం ఎలా ఉంటుంది? ఇప్పుడు సరిగ్గా వైద్య రంగంలోకి ఏఐ దూసుకువస్తోంది. ఇది రోగుల పాలిట వరమా లేక ప్రాణాంతక ముప్పా అనే చర్చ మొదలైంది. రోగుల అత్యంత వ్యక్తిగత సమాచారాన్ని ఏఐ వ్యవస్థలు వాడుకోవడమే ఇప్పుడు అతిపెద్ద వివాదం. నైతిక పర్యవేక్షణ లేకపోతే మనిషి ప్రాణం యంత్రాల చేతిలో కీలుబొమ్మగా మారే ప్రమాదముందని నిపుణులు హెచ్చరిస్తున్నారు. వైద్యుడి విచక్షణకు ఏఐ ప్రత్యామ్నాయం కాదని వాదిస్తున్నారు.

ఐఎస్బీ కీలక వర్క్‌షాప్…
ఈ మేరకు హైదరాబాద్‌లోని ఇండియన్ స్కూల్ ఆఫ్ బిజినెస్ (ఐఎస్బీ) కీలక వర్క్‌షాప్ నిర్వహించింది. ఈ నెల 20 నుండి 22 వరకు మూడు రోజుల పాటు ఇది జరిగింది. పబ్లిక్ హెల్త్ ఇన్నోవేషన్ ప్రోగ్రామ్ పేరుతో ఈ కార్యక్రమం సాగింది. ఆంధ్రప్రదేశ్, తెలంగాణ, గోవా, అస్సాం నుండి 78 మంది పాల్గొన్నారు. ఇందులో వైద్యులు, సివిల్ సర్వెంట్లు భాగస్వాములయ్యారు. తెలంగాణ నుండి 34 మంది ప్రతినిధులు ఈ కార్యక్రమంలో పాల్గొన్నారు. డాక్టర్లు విమల థామస్, మణిషా సహాయ్, కిరణ్ మాదల, నవ కల్యాణి ఇందులో కీలక పాత్ర పోషించారు.

డేటా భద్రతపై నీలి నీడలు
రోగుల వ్యక్తిగత సమాచారాన్ని ఏఐ వ్యవస్థలు విపరీతంగా వాడుతున్నాయి. నిపుణుల అభిప్రాయం ప్రకారం ఇవి అత్యంత ప్రమాదకరమైన సాధనాలు. వీటిని పెద్ద ఎత్తున అమలు చేసే ముందు కఠినమైన ధృవీకరణ అవసరం. నైతిక పర్యవేక్షణ లేకపోతే డేటా దుర్వినియోగం అవుతుంది. బలమైన డేటా పర్యవేక్షణ ఉంటేనే రోగులకు రక్షణ ఉంటుంది. నిరంతర పర్యవేక్షణ లేని ఏఐ వ్యవస్థలు వినాశనానికి దారితీస్తాయి. ప్రాణాలతో ముడిపడి ఉన్న అంశం కాబట్టి అత్యంత జాగ్రత్తగా ఉండాలి.

నిర్ధారణలో పరిమితులు…
వైద్యపరంగా ఏఐ సాధనాలకు స్పష్టమైన పరిమితులున్నాయి. రోగాల కారణాలను ఇవి పూర్తిగా నిర్ధారించలేవు. కేవలం నమూనాలను గుర్తించడంలో మాత్రమే ఇవి పనిచేస్తాయి. వ్యాధుల స్క్రీనింగ్‌కు ఇవి ఉపయోగపడతాయి కానీ తుది నిర్ణయం తీసుకోలేవు. డాక్టర్ ఇచ్చే నిర్ధారణే ఎప్పుడూ అంతిమం కావాలి. కేవలం సాఫ్ట్‌వేర్ ఇచ్చే రిపోర్టుపై ఆధారపడటం ప్రాణాల మీదకు తెస్తుంది. సాంకేతికత కేవలం సాయం చేయడానికి మాత్రమే పరిమితం కావాలి.

భారత్ వేగం.. ప్రపంచానికి సవాల్
అమెరికా, యూరప్, చైనా ఏఐ అమలులో 20 ఏళ్లు ముందున్నాయి. కానీ భారతదేశం ఇప్పుడు వేగంగా పుంజుకుంటోంది. యూపీఐ వంటి డిజిటల్ వ్యవస్థల విజయంతో భారత్ సత్తా చాటింది. ఇప్పుడు ఏఐ స్వీకరణలోనూ భారత్ దూసుకుపోతోంది. గ్లోబల్ సౌత్ దేశాల్లో ఏఐ మార్పుకు భారత్ నాయకత్వం వహిస్తోంది. సాంకేతికతను అందిపుచ్చుకోవడంలో మన దేశం ప్రపంచ దేశాలకు గట్టి పోటీ ఇస్తోంది. ఇది ఆరోగ్య రంగంలో విప్లవాత్మక మార్పులకు సంకేతం.

తెలంగాణ మూడో దశ ప్రయోగం
రాష్ట్ర స్థాయిలో ఏఐ వినియోగం మూడు దశల్లో సాగుతోంది. తెలంగాణ వంటి దక్షిణ రాష్ట్రాలు ప్రస్తుతం మూడో దశలో ఉన్నాయి. ఇది అత్యంత అధునాతనమైన ప్రయోగాత్మక దశ. అయితే మన దగ్గర నియంత్రణ వ్యవస్థలు ఇంకా ప్రాథమిక దశలోనే ఉన్నాయి. మూల్యాంకన పద్ధతులు, ప్రమాణీకరణ ప్రక్రియలు ఇంకా పూర్తిస్థాయిలో అభివృద్ధి చెందలేదు. వ్యవస్థలు సిద్ధం కాకుండానే ప్రయోగాలు చేయడం చర్చనీయాంశంగా మారింది. ఇది భవిష్యత్తులో సవాళ్లకు దారితీయవచ్చు.