- థియేటర్లలో ఈలలు గోలలు
- దర్శకుడు ఆదిత్య ధార్ సంచలనం
- మోడీ పాత జ్ఞాపకాల సందడి
- సోషల్ మీడియాలో షేక్
సహనం వందే, హైదరాబాద్:
బాలీవుడ్ వెండితెరపై పొలిటికల్ సెన్సేషన్ రిపీట్ అవుతోంది. ధురందర్ 2 సినిమాలో ప్రధాని నరేంద్ర మోదీ కనిపించడంతో థియేటర్లు దద్దరిల్లుతున్నాయి. కేవలం అతిథి పాత్రలకే పరిమితం కాకుండా కథలో భాగంగా వచ్చిన ఆ సన్నివేశాలు ప్రేక్షకులను ఉర్రూతలూగిస్తున్నాయి. సినిమాలకు రాజకీయాలకు ఉన్న విడదీయలేని బంధాన్ని ఈ చిత్రం మరోసారి నిరూపించింది.
థియేటర్లలో పూనకాలు
ఆదిత్య ధార్ దర్శకత్వంలో వచ్చిన ధురందర్ ది రివెంజ్ సినిమా బాక్సాఫీస్ వద్ద ప్రకంపనలు సృష్టిస్తోంది. ఈ సీక్వెల్ సినిమాలో ప్రధాని మోదీ రెండు కీలక సన్నివేశాల్లో కనిపిస్తారు. ఆయన తెరపై కనిపించగానే ప్రేక్షకులు సీట్లలోంచి లేచి గోల చేస్తున్నారు. సినిమా చూస్తున్నంత సేపు థియేటర్లలో పండుగ వాతావరణం కనిపిస్తోంది. సాధారణంగా హీరోల ఎంట్రీకి వచ్చే రెస్పాన్స్ ఇప్పుడు ప్రధాని మోదీకి వస్తోంది.
చారిత్రక ఘట్టాల కలయిక
ఈ సినిమాలో ప్రధాని మోదీ నేరుగా నటించలేదు. ఆధునిక భారత చరిత్రలో నిలిచిపోయిన రెండు కీలక ఘట్టాలను దర్శకుడు ఇందులో వాడారు. టీవీలో ప్రసారమయ్యే దృశ్యాల రూపంలో వీటిని చూపించారు. కథా గమనంలో భాగంగా వచ్చే ఈ క్లిప్పింగులు సినిమాకు పెద్ద అసెట్ అయ్యాయి. ప్రేక్షకులు ఈ సన్నివేశాలను చూసి ఆశ్చర్యపోతున్నారు.
ప్రమాణ స్వీకార దృశ్యం
సినిమాలో కనిపించే మొదటి సన్నివేశం 2014 నాటిది. నరేంద్ర మోదీ మొదటిసారి ప్రధానమంత్రిగా ప్రమాణ స్వీకారం చేస్తున్న దృశ్యాలను ఇందులో చూపించారు. ఆ కాలం నాటి రాజకీయ పరిస్థితులను ప్రతిబింబించేలా ఈ సీన్ ఉంటుంది. దేశ రాజకీయాల్లో వచ్చిన పెను మార్పుకు అది సంకేతంగా నిలిచింది. ఈ సీన్ రాగానే థియేటర్లలో చప్పట్లు మారుమోగుతున్నాయి.
నోట్ల రద్దు ప్రకటన
రెండో సన్నివేశం మరింత ఆసక్తికరంగా ఉంటుంది. 2016లో ప్రధాని మోదీ చేసిన పెద్ద నోట్ల రద్దు ప్రసంగాన్ని ఇందులో వాడారు. రాత్రివేళ దేశాన్ని ఉద్దేశించి ఆయన చేసిన ఆ ప్రసంగం అప్పట్లో సంచలనం సృష్టించింది. ఆ చారిత్రక నిర్ణయం తాలూకు విజువల్స్ సినిమాలో హైలైట్గా నిలిచాయి. ఇవి కథలో కీలక మలుపుగా మారుతాయి.
ఇంటర్నెట్లో రచ్చ
థియేటర్లలోనే కాకుండా సోషల్ మీడియాలోనూ దీనిపై పెద్ద ఎత్తున చర్చ జరుగుతోంది. సినిమా క్లిప్పింగులు, ప్రేక్షకుల రియాక్షన్ వీడియోలు నెట్లో వైరల్ అవుతున్నాయి. నెటిజన్లు ఈ ప్రయోగాన్ని మెచ్చుకుంటున్నారు. సినిమాలోని ఎమోషన్కు ఈ పొలిటికల్ టచ్ తోడవడంతో సినిమా రేంజ్ పెరిగిపోయింది.
సక్సెస్ ఫుల్ ఫార్ములా
పొలిటికల్ థ్రిల్లర్లకు రియల్ లైఫ్ ఇన్సిడెంట్స్ తోడైతే ఫలితం ఎలా ఉంటుందో ఈ చిత్రం చూపిస్తోంది. ఆదిత్య ధార్ తన మేకింగ్తో ప్రేక్షకులను కట్టిపడేశారు. సినిమా విడుదలైన మొదటి రోజే పాజిటివ్ టాక్ తెచ్చుకుంది. ముఖ్యంగా యువత ఈ సినిమాలోని వాస్తవికతకు ఫిదా అవుతున్నారు. ధురందర్ 2 బాక్సాఫీస్ వద్ద మరిన్ని రికార్డులు సృష్టించే అవకాశం కనిపిస్తోంది.
