- లేబరేటరీలలో ఆర్టిఫీషియల్ బియ్యం
- ప్రత్యేకంగా డిజైన్ చేసి ల్యాబుల్లో తయారు
- మార్కెట్లోకి కొత్త కృత్రిమ బ్రాండ్ అన్నం
- మూడు రెట్లు అధికంగా ప్రోటీన్ పెంపు
- మధుమేహంపై శాస్త్రవేత్తల కొత్త సృష్టి
- అయితే అందులో అమినో యాసిడ్లు తీసివేత
- ల్యాబ్లో పంట… కడుపులో మంట?
సహనం వందే, హైదరాబాద్:
భారతీయ భోజన పళ్లెంలో ప్రధానమైన తెల్లటి అన్నం ఇప్పుడు ప్రయోగశాలలో రూపాంతరం చెందుతోంది. కార్బోహైడ్రేట్లు ఎక్కువగా ఉండి మధుమేహానికి కారణమవుతున్న సహజ బియ్యానికి ప్రత్యామ్నాయంగా శాస్త్రవేత్తలు సరికొత్త డిజైనర్ బియ్యాన్ని సృష్టించారు. ఇది కేవలం ఆహారమే కాదు… సాంకేతికతతో నిర్మించిన ఒక పోషకాల గిడ్డంగి. కానీ ఇది ఆరోగ్యానికి ఎంతవరకు మేలు చేస్తుందనేది ఇప్పుడు ప్రధాన చర్చ.
పిండి నుంచి మెరిసే గింజ
సాధారణంగా బియ్యం పొలాల్లో పండుతాయి. కానీ ఈ సీఎస్ఐఆర్ డిజైనర్ బియ్యం యంత్రాల్లో తయారవుతుంది. శాస్త్రవేత్తలు ముందుగా బియ్యం పిండిని తీసుకుంటారు. దానికి బియ్యం నుంచి తీసిన ప్రొటీన్లను కలుపుతారు. ఈ మిశ్రమాన్ని ట్విన్ స్క్రూ ఎక్స్ట్రూషన్ అనే ప్రక్రియ ద్వారా అధిక వేడి, ఒత్తిడికి గురిచేస్తారు. చివరకు అది అచ్చం పాలిష్ చేసిన బియ్యం గింజల రూపంలో బయటకు వస్తుంది. ఇందులో ఎలాంటి రసాయనాలు వాడలేదని శాస్త్రవేత్తలు చెబుతున్నారు.
షుగర్ పెరగకుండా రక్షణ
మన దేశంలో 62 శాతం ఆహారం కార్బోహైడ్రేట్లతోనే నిండి ఉంటుందని ఐసీఎంఆర్ నిర్వహించిన అధ్యయనం వెల్లడించింది. దీనివల్ల రక్తంలో చక్కెర స్థాయిలు వేగంగా పెరుగుతాయి. అందుకే ఈ కొత్త బియ్యంలో గ్లైసీమిక్ ఇండెక్స్ను తగ్గించారు. ఇందులో ఉండే ప్రొటీన్ల వల్ల ఆహారం నెమ్మదిగా జీర్ణమవుతుంది. ఫలితంగా రక్తంలో గ్లూకోజ్ అకస్మాత్తుగా పెరగదు. ఇది మధుమేహ రోగులకు ఒక రకమైన రక్షణ కవచంలా పనిచేస్తుందని బరోడా విశ్వవిద్యాలయ పరిశోధకురాలు సునీతా చందోర్కర్ వివరించారు.
మూడు రెట్లు ప్రొటీన్లు పెరుగుదల
సాధారణ బియ్యంలో ప్రొటీన్లు కేవలం 6 నుంచి 8 శాతం మాత్రమే ఉంటాయి. కానీ ఈ ల్యాబ్ బియ్యంలో వాటిని 20 శాతానికి పెంచారు. బియ్యం నుంచే తీసిన ప్రొటీన్ ఐసోలేట్లను దీని కోసం ఉపయోగించారు. అయితే ఇక్కడో చిక్కు ఉంది. బియ్యం ప్రొటీన్లలో అన్ని రకాల అమినో యాసిడ్లు ఉండవు. అందుకే దీనికి పప్పు ధాన్యాల ప్రొటీన్లను కలిపి ఉంటే బాగుండేదని జార్జ్ ఇన్స్టిట్యూట్ ఆఫ్ గ్లోబల్ హెల్త్ పరిశోధకురాలు సుపర్ణ ఘోష్ జెరాత్ అభిప్రాయపడ్డారు.
అల్ట్రా ప్రాసెస్డ్ ఆహారంగా గుర్తింపు
సహజమైన గింజను పిండిగా మార్చి మళ్లీ గింజగా తయారు చేయడం వల్ల దీని నిర్మాణం మారుతుంది. అందుకే దీనిని అల్ట్రా ప్రాసెస్డ్ ఫుడ్ అని పిలుస్తారు. గింజ ఆకారం మారకపోయినా దాని అంతర్గత స్వరూపం మారిపోతుంది. దీనివల్ల జీర్ణక్రియలో మార్పులు వచ్చే అవకాశం ఉంది. అయితే కృత్రిమ పదార్థాలు ఏవీ వాడకుండా కేవలం భౌతిక మార్పు ద్వారానే బియ్యాన్ని సృష్టించడం గొప్ప విషయమని నిపుణులు అంగీకరిస్తున్నారు.
పరిశోధన నుంచి విపణిలోకి
ఈ సాంకేతికతను అభివృద్ధి చేయడంలో సీఎస్ఐఆర్ డైరెక్టర్ ఆనందరామకృష్ణన్ కీలక పాత్ర పోషించారు. ఇప్పుడు ఈ పరిజ్ఞానాన్ని టాటా కన్స్యూమర్ ప్రొడక్ట్స్, చెన్నైకి చెందిన ఎస్ఎస్ సోల్ ఫుడ్స్ సంస్థలకు బదిలీ చేశారు. ఇకపై ఈ సంస్థలే ఈ బియ్యాన్ని మార్కెట్లోకి తెస్తాయి. వీటి ధర ఎంత ఉంటుంది? సాధారణ ప్రజలకు అందుబాటులోకి వస్తాయా? లేదా? అనేది ఆ సంస్థల నిర్ణయం మీద ఆధారపడి ఉంటుంది.
ఆరోగ్యకరమైన భవిష్యత్తు దిశగా
భారతీయుల ఆహారపు అలవాట్లను దృష్టిలో పెట్టుకుని ఈ మార్పులు చేశారు. కేవలం కడుపు నింపే ఆహారంగా కాకుండా ఆరోగ్యాన్నిచ్చే ఇంధనంగా బియ్యాన్ని మార్చడమే లక్ష్యమని ఆనందరామకృష్ణన్ తెలిపారు. ప్రస్తుతం మన దేశంలో పెరుగుతున్న ఊబకాయం, షుగర్ వ్యాధులను అరికట్టడానికి ఇలాంటి ఆవిష్కరణలు అవసరమని శాస్త్రవేత్తలు నమ్ముతున్నారు. సహజ సిద్ధమైన బియ్యానికి ఈ డిజైనర్ రైస్ గట్టి పోటీ ఇచ్చేలా కనిపిస్తోంది.
