- ‘రిజెక్షన్ సెన్సిటివ్ డిస్ఫోరియా’తో సతమతం
- తిరస్కరిస్తే కకావికలమవుతున్న జీవితాలు
- చిన్న మాటకే చితికిపోతున్న మానసిక స్థితి
- కాదంటే కన్నీళ్లే… శరీరంలో వింత మార్పులు
- సోషల్ మీడియా వాడకంతో పెరిగిన కేసులు
- వింత వ్యాధి బాధితులు… వైద్యులకు సవాల్
సహనం వందే, రాజమండ్రి:
చిన్న మాట… చిన్న జోక్… చిన్న విమర్శ. సాధారణంగా ఇవి రోజువారీ జీవితంలో భాగమే. కానీ కొందరికి మాత్రం ఇవే నరకంగా మారుతున్నాయి. ఎవరైనా తనను తిరస్కరించారని భావించిన క్షణంలోనే తీవ్ర మానసిక వేదనకు గురయ్యే ఒక కొత్త రుగ్మత ఇప్పుడు వైద్య ప్రపంచాన్ని ఆందోళనకు గురిచేస్తోంది. దీనినే ‘రిజెక్షన్ సెన్సిటివ్ డిస్ఫోరియా’గా పిలుస్తున్నారు. విమర్శలు, ఎగతాళి, నిరాకరణలను తట్టుకోలేక బాధితులు తీవ్రమైన మానసిక, శారీరక ప్రతిచర్యలను అనుభవిస్తున్నారు.
అతి సున్నితత్వమే పెద్ద శాపం
ఈ వ్యాధి ఉన్నవారికి ఎవరైనా తప్పు పడితే ప్రాణం పోయినంత పనవుతుంది. కేవలం మాటలతోనే వీరు తీవ్రమైన శారీరక వేదనకు గురవుతారు. ఏదైనా పనిని తిరస్కరించినా లేదా సరదాగా ఎగతాళి చేసినా వీరు భరించలేరు. ఆ సమయంలో వీరి మెదడు చాలా వేగంగా స్పందిస్తుంది. అది శరీరంలోని ప్రతి అణువుపై ప్రభావం చూపుతుంది. బాధితులు దీనిని వర్ణించలేని నరకంగా చెబుతున్నారు. ఇది కేవలం మానసికమైనదే కాకుండా శారీరక ప్రతిచర్యగా మారుతోంది.
గుండెను పిండేసే తిరస్కరణ
ఎవరైనా తనను ఇష్టపడటం లేదని తెలిసినా వీరు తట్టుకోలేరు. ఆ ఆలోచనే వారిని మానసిక క్షోభకు గురిచేస్తుంది. ముఖ్యంగా ఆఫీసుల్లో లేదా స్నేహితుల మధ్య జరిగే చర్చలు వీరికి శత్రువులుగా మారుతాయి. విమర్శ వినగానే వీరి గుండె వేగం పెరుగుతుంది. శ్వాస తీసుకోవడంలో ఇబ్బందులు ఎదురవుతాయి. కొందరికైతే ఒళ్లంతా చెమటలు పట్టి స్పృహ కోల్పోయే పరిస్థితి వస్తుంది. ఈ పరిస్థితిని అదుపు చేయడం చాలా కష్టమని వైద్యులు హెచ్చరిస్తున్నారు.
పెరుగుతున్న బాధితుల సంఖ్య
అంతర్జాతీయంగా ఈ సమస్య కొత్తగా వెలుగులోకి వస్తోంది. గతంలో దీనిని కేవలం కోపం లేదా మొండితనంగా భావించేవారు. కానీ ఇప్పుడు దీనిని ఒక ప్రత్యేక రుగ్మతగా గుర్తించారు. లక్షలాది మంది యువత ఈ సమస్యతో బాధపడుతున్నట్లు అంచనా వేస్తున్నారు. సోషల్ మీడియా వాడకం పెరిగిన తర్వాత ఈ కేసుల సంఖ్య భారీగా పెరిగింది. ప్రతీ చిన్న విషయాన్ని భూతద్దంలో చూడటం వీరికి అలవాటుగా మారుతోంది.
బయటపడని అంతర్గత యుద్ధం
బాధితులు తమలో తామే మధనపడుతూ ఉంటారు. ఇతరులకు చెబితే ఎగతాళి చేస్తారనే భయంతో మౌనంగా ఉండిపోతారు. ఈ మౌనం వారిని డిప్రెషన్లోకి నెట్టేస్తోంది. పనుల మీద ఏకాగ్రత దెబ్బతిని ఉద్యోగాలను వదులుకుంటున్నారు. కేవలం విమర్శలకు భయపడి కొత్త పనులను మొదలు పెట్టడానికి కూడా వెనుకాడుతున్నారు. ఈ భయం వారి ఎదుగుదలకు పెద్ద అడ్డంకిగా మారింది.
వైద్య లోకానికి పెద్ద సవాలు
ప్రస్తుతం ఈ వ్యాధిని అర్థం చేసుకోవడానికి పరిశోధనలు జరుగుతున్నాయి. దీనికి స్పష్టమైన మందులు ఇంకా అందుబాటులోకి రాలేదు. కేవలం థెరపీ ద్వారా మాత్రమే కొంత ఉపశమనం కలుగుతోంది. మెదడులోని రసాయన మార్పుల వల్ల ఇలా జరుగుతోందని శాస్త్రవేత్తలు భావిస్తున్నారు. ఈ వ్యాధి గురించి అవగాహన పెంచాల్సిన అవసరం ఎంతైనా ఉంది. లేకపోతే బాధితులు సమాజం నుంచి పూర్తిగా వేరుపడే ప్రమాదం ఉంది.
జాగ్రత్త పడకపోతే ప్రమాదమే
దీనిని నిర్లక్ష్యం చేస్తే ప్రాణాల మీదకు వచ్చే అవకాశం ఉంది. విమర్శలను స్వీకరించే శక్తి కోల్పోవడం వల్ల ఆత్మహత్య ఆలోచనలు కూడా వచ్చే ఛాన్స్ ఉంది. అందుకే కుటుంబ సభ్యులు వీరి పట్ల సానుభూతితో ఉండాలి. చిన్నపాటి మార్పులను గమనిస్తే వెంటనే వైద్యులను సంప్రదించాలి. ప్రపంచవ్యాప్తంగా పెరుగుతున్న ఈ రిజెక్షన్ సెన్సిటివ్ డిస్ఫోరియాపై నిరంతరం నిఘా ఉంచాలి. అప్పుడే ఈ మానసిక మహమ్మారి నుంచి ప్రజలను కాపాడగలము.
