- సీబీఐ కేసులో లాయర్ వసూళ్ల దందా
- విచారణ నుండి తప్పుకున్న న్యాయమూర్తి
- విజిలెన్స్ దర్యాప్తుకు సంచలన ఆదేశం
- దేశవ్యాప్తంగా పరువు తీసిన కోర్టు కుంభకోణం
- కేంద్రానికి ఫిర్యాదుతో బయటపడ్డ బండారం
సహనం వందే, తమిళనాడు:
భారత న్యాయవ్యవస్థ పవిత్రతను ఒక న్యాయవాది అంగడి సరుకుగా మార్చేశాడు. సాక్షాత్తూ హైకోర్టు జడ్జికే లంచం ఇవ్వాలంటూ క్లయింట్ నుంచి యాభై లక్షల రూపాయలు వసూలు చేసిన దారుణం వెలుగుచూసింది. తీర్పును కొనుగోలు చేయవచ్చనే భ్రమ కల్పించి న్యాయమూర్తి ప్రతిష్టను బజారున పడేసిన ఈ ఉదంతం ఇప్పుడు దేశవ్యాప్తంగా సంచలనం సృష్టిస్తోంది.
జడ్జి పేరుతో లాయర్ మాయాజాలం…
చెన్నైలోని 12వ అడిషనల్ స్పెషల్ సీబీఐ కోర్టు ఇచ్చిన ఒక ఉత్తర్వుపై గణేష్ అగర్వాల్, నరేష్ ప్రసాద్ అగర్వాల్ హైకోర్టులో అప్పీలు చేసుకున్నారు. ఈ కేసును జస్టిస్ ఎం. నిర్మల్ కుమార్ విచారిస్తున్నారు. అయితే ఈ కేసులో తమకు అనుకూలంగా తీర్పు రావాలంటే జడ్జికి లంచం ఇవ్వాలని ఒక సీనియర్ లాయర్ తన క్లయింట్ను నమ్మించాడు. ఇందుకోసం అక్షరాలా 50 లక్షల రూపాయలను వసూలు చేశాడు. తీర్పు రావడం ఆలస్యం కావడంతో మోసపోయానని గ్రహించిన క్లయింట్ అఖిల భారత న్యాయవాదుల సంఘం ద్వారా కేంద్ర న్యాయ శాఖకు ఫిర్యాదు చేయడంతో అసలు విషయం బయటపడింది.
అవినీతి భాగోతం కథ…
ఈ నెల 5వ తేదీన ఈ కేసు విచారణకు వచ్చినప్పుడు రిజిస్ట్రీకి అందిన ఫిర్యాదును చూసి జస్టిస్ నిర్మల్ కుమార్ విస్తుపోయారు. తన పేరు మీద 50 లక్షల రూపాయల వసూళ్లు జరిగాయని తెలుసుకున్న ఆయన తీవ్ర ఆగ్రహం వ్యక్తం చేశారు. కేంద్ర న్యాయ మంత్రిత్వ శాఖ పంపిన ఈ ఫిర్యాదులో ఒక సీనియర్ అడ్వకేట్ డబ్బులు వసూలు చేసినట్లు స్పష్టమైన ఆధారాలు ఉన్నాయి. గోపీనాథ్ అగర్వాల్ తరపున లాయర్ మురళీ కుమారన్ వాదిస్తున్న బృందం ఈ ఆరోపణలను తోసిపుచ్చినప్పటికీ ఫిర్యాదులోని అంశాలు లోతైన దర్యాప్తు అవసరమని స్పష్టం చేస్తున్నాయి.
నైతిక బాధ్యతతో తప్పుకున్న జడ్జి
తన వ్యక్తిత్వానికి మచ్చ తెచ్చేలా జరిగిన ఈ వసూళ్ల వ్యవహారంపై జస్టిస్ నిర్మల్ కుమార్ తక్షణమే స్పందించారు. నైతిక బాధ్యత వహిస్తూ ఈ కేసు విచారణ నుండి ఆయన తప్పుకుంటున్నట్లు ప్రకటించారు. తన కోర్టులో న్యాయం అమ్ముడుపోదని… ఇలాంటి నీచమైన ఆరోపణలు వచ్చిన చోట తాను విచారణ జరపడం భావ్యం కాదని ఆయన తేల్చి చెప్పారు. ఈ విషయాన్ని చీఫ్ జస్టిస్ దృష్టికి తీసుకెళ్లి కేసును మరో బెంచ్కు బదిలీ చేయాలని కోరారు. న్యాయమూర్తి తీసుకున్న ఈ నిర్ణయం కోర్టు వర్గాల్లో చర్చనీయాంశమైంది.
విజిలెన్స్ విచారణకు ఆదేశం
ఈ దారుణమైన వసూళ్ల వెనుక ఉన్నది ఎవరు? లాయర్ ఒక్కడే ఈ పని చేశాడా లేక ఇందులో కోర్టు సిబ్బంది పాత్ర కూడా ఉందా? అనే కోణంలో విచారణకు ఆదేశాలు జారీ అయ్యాయి. హైకోర్టు విజిలెన్స్ సెల్ తక్షణమే రంగంలోకి దిగి సోదాలు నిర్వహించాలని జడ్జి ఆదేశించారు. సీబీఐ కేసులలో ఇలాంటి భారీ మొత్తాల లావాదేవీలు జరగడం వెనుక ఉన్న చీకటి నెట్వర్క్ను ఛేదించాలని విజిలెన్స్ అధికారులకు సూచించారు. కోర్టు ప్రతిష్టను కాపాడటం కోసం కఠిన చర్యలు తీసుకోవాలని ఆయన నొక్కి చెప్పారు.
న్యాయ వ్యవస్థకు గండం
కోర్టు హాల్లో స్పెషల్ పబ్లిక్ ప్రాసిక్యూటర్ కె శ్రీనివాసన్ వాదిస్తూ, ఇలాంటి తప్పుడు వసూళ్లు న్యాయవ్యవస్థ గౌరవాన్ని మంటగలుపుతాయని ఆందోళన వ్యక్తం చేశారు. కేవలం డబ్బు కోసం న్యాయమూర్తుల పేర్లను వాడుకోవడం క్షమించరాని నేరమని పేర్కొన్నారు. 50 లక్షల రూపాయల సంచీ చేతులు మారిందన్న ఆరోపణలు నిజమైతే సదరు లాయర్ లైసెన్స్ను రద్దు చేయడమే కాకుండా క్రిమినల్ కేసులు నమోదు చేయాలని డిమాండ్లు వినిపిస్తున్నాయి.
ముగింపు లేని దోపిడీ
అంతర్జాతీయ స్థాయిలో సంచలనం సృష్టించిన ఎప్స్టీన్ కేసుల మాదిరిగానే ఇక్కడ కూడా అధికార బలంతో వ్యవస్థలను మేనేజ్ చేయవచ్చనే ధీమా కనిపిస్తోంది. న్యాయం కావాలా? అయితే 50 లక్షలు చెల్లించు అనే స్థాయికి కొందరు లాయర్లు దిగజారడం ప్రజాస్వామ్యానికే ప్రమాదకరం. హైకోర్టు విజిలెన్స్ విభాగం చేపట్టే విచారణలో మరిన్ని షాకింగ్ నిజాలు బయటకు వచ్చే అవకాశం ఉంది. ఈ కేసు విచారణ ముగిసే వరకు సదరు లాయర్లను కోర్టు కార్యకలాపాలకు దూరంగా ఉంచాలనే వాదనలు కూడా గట్టిగా వినిపిస్తున్నాయి.
