- బహిరంగ ప్రదేశాల్లోనే విడిపోతున్న జంటలు
- హోటల్ బిల్లులపై పేచీ… వాలెంటైన్స్ వింతలు
- ప్రేమ జంటల మధ్య ఆర్థిక యుద్ధం
సహనం వందే, హైదరాబాద్:
ఫిబ్రవరి 14… ప్రేమ జంటలంతా వాలెంటైన్స్ డే కోసం సిద్ధమవుతుంటే, మరికొందరు మాత్రం అదే రోజు ప్రేమకు వీడ్కోలు పలకాలని నిర్ణయించుకుంటున్నారు. గులాబీ పువ్వులు, గిఫ్టుల సందడి మధ్య రెస్టారెంట్లలో కూర్చుని విడిపోవడం ఇప్పుడు ఒక ట్రెండ్. ఇది వినడానికి వింతగా ఉన్నా ఖరీదైన హోటళ్లలో విందు ఆరగిస్తూ బంధాలను తెంచుకోవడం వెనుక బలమైన ఆర్థిక లెక్కలు ఉన్నాయి.
ప్రేమ ముగింపుకు పబ్లిక్ వేదిక
వాలెంటైన్స్ డే రోజున రద్దీగా ఉండే రెస్టారెంట్లను ఎంచుకోవడం వెనుక ఒక వ్యూహం ఉంది. సంజయ్ అనే వంటవాడు తన అనుభవాన్ని చెబుతూ జంటలు మసాలా వంటకాలు ఆరగిస్తూ అంతే ఘాటుగా విడిపోతున్నారని తెలిపాడు. ఇంట్లో అయితే గొడవలు ముదిరే ప్రమాదం ఉంది. అదే బహిరంగ ప్రదేశంలో అయితే అందరి ముందు గౌరవంగా విడిపోయే అవకాశం ఉంటుందని మానసిక వైద్యురాలు డాక్టర్ శివాని అనే నిపుణురాలు విశ్లేషిస్తున్నారు. ముఖ్యంగా యువతలో ఈ ధోరణి ఎక్కువగా కనిపిస్తోంది.
ఆర్థిక భారం మీద యుద్ధం
బంధం నుండి బయటపడటం ఇప్పుడు భారంగా మారింది. ప్రేమలో పడటానికి సగటున 50 వేల రూపాయల వరకు ఖర్చు చేస్తున్న యువత విడిపోయిన తర్వాత ఏడాదికి 6 లక్షల రూపాయల వరకు అదనపు భారాన్ని మోయాల్సి వస్తోంది. హోటల్లో ఒక మహిళ తన ప్రియుడి మోసాన్ని పబ్లిక్గా నిలదీసి అతని ఫోన్ పగలగొట్టింది. కానీ బిల్లు మాత్రం అతనే కట్టాల్సి వచ్చింది. మాజీ ప్రియులే చివరకు డబ్బులు చెల్లించి అక్కడి నుండి నిష్క్రమిస్తున్నారు.
టేస్టింగ్ మెనూతో వీడ్కోలు
ఖరీదైన రెస్టారెంట్లలో 10 వేల రూపాయల విలువైన భోజనం ఆర్డర్ ఇచ్చి సగం తిన్నాక విడిపోవడం సర్వసాధారణం. మకాఫీ అనే చెఫ్ ప్రకారం బ్రేకప్ కోసం ఎప్పుడూ వెళ్ళని కొత్త ప్రాంతమే మేలు. ఆర్డర్లు మార్చడం లేదా విడివిడిగా భోజనం చేయడం బ్రేకప్కు సంకేతాలుగా సిబ్బంది గుర్తిస్తున్నారు. వాలెంటైన్స్ డే రద్దీలో ఇలాంటి జంటలను గుర్తించడం సిబ్బందికి ఒక సవాల్గా మారుతోంది. ఇది కేవలం మనసుల గొడవే కాదు ఆర్థిక గొడవ కూడా.
బార్ దగ్గర కూర్చుంటేనే మేలు
ముంబైలోని ఒక రెస్టారెంట్ మేనేజర్ సోరియా ప్రకారం బ్రేకప్ కోసం టేబుల్ కంటే బార్ దగ్గర కూర్చోవడమే ఉత్తమం. టేబుల్ వద్ద కూర్చుంటే భోజనం ముగిసే వరకు ఎదురెదురుగా కూర్చోవడం నరకప్రాయం. బార్ దగ్గరైతే ఎప్పుడైనా లేచి వెళ్ళిపోయే వీలుంటుంది. చాలా జంటలు మూడు నెలల మార్కు వద్దే విడిపోవాలని నిర్ణయించుకుంటున్నాయి. అందుకే వాలెంటైన్స్ డే సమయంలో కాఫీ షాపుల్లో రద్దీ పెరుగుతోంది.
తక్కువ ఖర్చుతో ముగించండి
విడిపోయే సమయంలో 1000 రూపాయల కంటే ఎక్కువ ఖర్చు చేయవద్దని నిపుణులు సూచిస్తున్నారు. ఎందుకంటే బంధం ముగిసేటప్పుడు ఖరీదైన ఆహారం అనవసరం. కేవలం ఒక కాఫీ లేదా డ్రింక్తో ముగించడం మేలని డాక్టర్ మెస్సింగ్ చెబుతున్నారు. ఆర్థిక ముప్పు పొంచి ఉన్నప్పుడు జనం వింతగా ప్రవర్తిస్తారని హెచ్చరిస్తున్నారు.
సర్వర్లకు కాసుల వర్షం
ఈ బ్రేకప్ సీజన్ హోటల్ సిబ్బందికి లాభాలను తెస్తోంది. జంటలు విడిపోయే క్రమంలో సర్వర్ల మద్దతు కోరుతూ భారీగా టిప్పులు ఇస్తున్నారు. ఎమోషనల్ సపోర్ట్ ఇచ్చినందుకు వారికి అదనపు ఆదాయం లభిస్తోంది. పాత జ్ఞాపకాలు లేని కొత్త హోటళ్లను బ్రేకప్ కోసం వేదికగా చేసుకుంటున్నారు. వాలెంటైన్ వీకెండ్లో ఇలాంటి ఘటనలు ఎక్కువగా జరుగుతున్నాయి.
