- జూనియర్ సివిల్ జడ్జి పరీక్షలో విజయం
- అడ్డంకులను తలదన్నిన ధీర వనిత
- 100 శాతం అంధత్వంతో విజయం
- దివ్యాంగుల ఆశల వారధి ఈ అంధురాలు
- నిరాశలో ఉన్నవారికి నిలువెత్తు స్ఫూర్తి
సహనం వందే, కేరళ:
కళ్లు లేకపోయినా మనోనేత్రంతో చట్టాన్ని చదివిన ఒక సామాన్య మహిళ… ఇప్పుడు అసాధారణ శిఖరాన్ని అధిరోహించారు. కేరళ జ్యుడీషియల్ సర్వీస్ చరిత్రలోనే సరికొత్త అధ్యాయాన్ని లిఖిస్తూ ధన్య నాథన్ తొలి అంధ మహిళా జడ్జిగా బాధ్యతలు చేపట్టబోతున్నారు. చీకటిని శాపంగా భావించకుండా… ఆ చీకటిలోనే జ్ఞానాన్ని వెతుక్కున్న ఆమె ప్రయాణం ప్రతి ఒక్కరినీ ఆకట్టుకుంది.
కళ్లు లేకున్నా చట్టంపై పట్టు
ధన్య నాథన్ కు పుట్టుకతోనే చూపు లేదు. కానీ ఆమెకు అకుంఠిత దీక్ష ఉంది. సమాజంలో అన్యాయానికి గురవుతున్న వారికి అండగా నిలవాలనే సంకల్పంతో ఆమె న్యాయశాస్త్రాన్ని ఎంచుకున్నారు. 100 శాతం అంధత్వం తన లక్ష్యానికి అడ్డంకి కాదని నిరూపిస్తూ రాత్రింబవళ్లు కష్టపడి చదివారు. తాజాగా విడుదలైన సివిల్ జడ్జి (జూనియర్ డివిజన్) ఫలితాల్లో ఆమె మెరిట్ జాబితాలో అగ్రస్థానంలో నిలిచి అందరినీ ఆశ్చర్యపరిచారు.
మనోబలంతో సాగిన సమరం
చూపు ఉన్న వారికే కష్టమనిపించే జ్యుడీషియల్ సర్వీస్ పరీక్షలను ధన్య అత్యంత ప్రతిభతో ఎదుర్కొన్నారు. బ్రెయిలీ లిపి, ఆడియో సాఫ్ట్వేర్ సాయంతో వేల పేజీల చట్టాలను ఆమె కంఠస్థం చేశారు. కోర్టు గదుల్లో సాక్ష్యాధారాలను పరిశీలించేందుకు, తీర్పులు రాసేందుకు ఆధునిక సాంకేతికతను వాడుకునేలా ఆమె ముందుకు సాగుతున్నారు. ఆమె పట్టుదల చూసి తోటి విద్యార్థులు, అధ్యాపకులు సైతం అభినందనలతో ముంచెత్తుతున్నారు.100 శాతం అంధత్వం ఉన్న అభ్యర్థికి జడ్జి పదవి ఇవ్వడం న్యాయ వ్యవస్థలో వస్తున్న మార్పులకు నిదర్శనం. కేవలం శారీరక వైకల్యం ఉందనే కారణంతో ఎవరికీ అవకాశాలు నిరాకరించకూడదనే సుప్రీంకోర్టు తీర్పులకు అనుగుణంగా ధన్య ఎంపిక జరిగింది.
తీర్పుల్లో మానవీయ కోణం
ధన్య నాథన్ కేవలం ఒక జడ్జి మాత్రమే కాదు… బాధితుల గొంతుకగా మారబోతున్నారు. శారీరక లోపాలు ఉన్నవారు సమాజంలో ఎదుర్కొనే వివక్షను ఆమె దగ్గరగా పరిశీలించారు. అందుకే న్యాయ పీఠంపై కూర్చున్నప్పుడు సామాన్యుడి బాధను అర్థం చేసుకుని తీర్పులు ఇస్తానని ఆమె చెబుతున్నారు. కంటి చూపు లేకపోయినా మనసుతో వాస్తవాలను గ్రహించి నిష్పక్షపాతంగా తీర్పులు వెలువరిస్తానని ధీమా వ్యక్తం చేస్తున్నారు.
ప్రతిభకు అండగా నిలిచిన తోడు
ధన్య గెలుపు వెనుక ఆమె కుటుంబ సభ్యులు, స్నేహితుల ప్రోత్సాహం ఎంతో ఉంది. పుస్తకాలను చదివి వినిపించడం, పరీక్షల సమయంలో అండగా నిలవడంతో ఆమె ఈ ఘనత సాధించారు. ఇదే ఫలితాల్లో సెరిబ్రల్ పాల్సీతో బాధపడుతున్న జోయ్ సన్ సాజన్ కూడా రెండో ర్యాంకు సాధించడం విశేషం. వీరిద్దరూ ఇప్పుడు కేరళలో సరికొత్త విప్లవానికి నాంది పలికారు. వీరు న్యాయమూర్తులుగా బాధ్యతలు చేపడితే వ్యవస్థలో మరిన్ని సానుకూల మార్పులు వస్తాయని ఆశిస్తున్నారు.
నిరాశలో ఉన్నవారికి నిలువెత్తు స్ఫూర్తి…
చిన్నపాటి సమస్యలకే కుంగిపోయే నేటి యువతకు ధన్య నాథన్ ఒక నిలువెత్తు నిదర్శనం. లోపం శరీరానికే తప్ప సంకల్పానికి కాదని ఆమె నిరూపించారు. భారత న్యాయ వ్యవస్థలో మరిన్ని సాంకేతిక మార్పులు వస్తున్న తరుణంలో ఆమె బాధ్యతలు స్వీకరించడం ప్రాధాన్యత సంతరించుకుంది. అడ్డంకులను అవకాశాలుగా మార్చుకున్న ఈ అంధ యోధురాలు ఇప్పుడు దేశానికే గర్వకారణంగా నిలిచారు.
