- మనిషి అక్షరానికి పెరిగిన విలువ
- ఏఐతో సాధ్యం కాని సృజనాత్మకత
- కంపెనీల మధ్య పెరిగిన పోటీ
సహనం వందే, హైదరాబాద్:
సాఫ్ట్వేర్ రంగం అంటే కేవలం కోడింగ్ మాత్రమే కాదు. తాము తయారు చేసిన టెక్నాలజీ గురించి ప్రజలకు అర్థమయ్యేలా చెప్పడం కూడా ఒక కళ. ఇప్పుడు కంపెనీలకు ఆ కళ తెలిసిన వారే కావాలి. అందుకే రాత మీద పట్టున్న వారికి ఐటీ దిగ్గజాలు కోట్లాది రూపాయల జీతాలు ఇస్తున్నాయి. అసలు ఈ మార్పు ఎందుకు వచ్చిందో ఇప్పుడు చూద్దాం.
టెక్ కమ్యూనికేషన్స్ అంటే ఏంటి?
టెక్ కమ్యూనికేషన్స్ అంటే ఒక కఠినమైన సాంకేతిక విషయాన్ని సామాన్యుడికి అర్థమయ్యేలా చెప్పడం. ఉదాహరణకు ఒక కంపెనీ కొత్తగా ఒక చిప్ తయారు చేసిందనుకోండి. ఆ చిప్ లో ఎన్ని ట్రాన్సిస్టర్లు ఉన్నాయి అనేది ఇంజనీర్లకు ముఖ్యం. కానీ ఆ చిప్ వల్ల మీ ఫోన్ ఎంత వేగంగా పనిచేస్తుందో ప్రజలకు వివరించడం ‘టెక్ కమ్యూనికేటర్’ పని. అంటే టెక్నాలజీకి, సామాన్య ప్రజలకు మధ్య వీరు ఒక వారధిలా పనిచేస్తారు.
రచయితలకు డిమాండ్ ఎందుకు?
ప్రస్తుతం చాట్ జీపీటీ వంటి ఏఐ సాధనాలు విపరీతంగా పెరిగాయి. ఏఐ సెకన్లలో సమాచారాన్ని ఇస్తుంది కానీ అందులో ‘ప్రాణం’ ఉండదు. అది రాసే విషయాలు చదవడానికి చాలా కృత్రిమంగా ఉంటున్నాయి. మనుషులకు మనుషులు చెప్పే కథలే నచ్చుతాయి. అందుకే ఒక కంపెనీ కథను (బ్రాండ్ స్టోరీ) ఆసక్తికరంగా చెప్పే రచయితల కోసం గూగుల్, మైక్రోసాఫ్ట్ వంటి సంస్థలు ఎగబడుతున్నాయి. వారు రాసే అక్షరమే కంపెనీ వ్యాపారాన్ని పెంచుతోంది.
కోడింగ్ వర్సెస్ కమ్యూనికేషన్
గతంలో సాఫ్ట్వేర్ రాయడం తెలిస్తే చాలు జీవితం సెటిల్ అనుకునేవారు. కానీ ఇప్పుడు కోడింగ్ లో చాలా వరకు ఏఐ చేసేస్తోంది. దీనివల్ల సాధారణ కోడర్ల అవసరం తగ్గుతోంది. కానీ ఆ కోడింగ్ తో తయారైన యాప్ లేదా సాఫ్ట్వేర్ ఎందుకు వాడాలో ప్రజలను ఒప్పించే కమ్యూనికేటర్ల అవసరం పెరుగుతోంది. అందుకే ఇప్పుడు కంప్యూటర్ సైన్స్ చదివిన వారి కంటే సాహిత్యం లేదా జర్నలిజం చదివిన వారికి టెక్ రంగంలో కొత్త అవకాశాలు తలుపు తడుతున్నాయి.
కోట్లలో జీతాలు ఎవరికి?
ఈ రంగంలో జీతాలు చూస్తే కళ్లు చెదరాల్సిందే. ఉదాహరణకు నెట్ఫ్లిక్స్ లో ప్రొడక్ట్ కమ్యూనికేషన్స్ డైరెక్టర్గా చేరితే ఏడాదికి సుమారు 6.50 కోట్ల రూపాయల వరకు ఇస్తారు. ఓపెన్ ఏఐలో రచయితలకు 3 కోట్ల రూపాయలకు పైగా జీతం ఇస్తున్నారు. ఇది ఒక సాఫ్ట్వేర్ ఇంజనీర్ జీతం కంటే చాలా ఎక్కువ. మనిషి మెదడు నుండి వచ్చే ఆలోచనలకు, ఆకర్షణీయమైన రాతకు కంపెనీలు ఇచ్చే గౌరవం ఇది. క్వాలిటీ కంటెంట్ రాసే రచయితల అవసరం మరింత పెరిగింది. ఏఐని కేవలం ఒక పనిముట్టుగా వాడుకుంటూ తమ సొంత ఆలోచనలతో రాసే వారికి తిరుగులేదని తేలిపోయింది.
మీరు ఏం చేయాలి?
మీరు రాతలో మంచి పట్టున్న వారైతే టెక్నాలజీని సులభంగా అర్థం చేసుకోగలిగితే మీకు ఈ రంగం సరిగ్గా సరిపోతుంది. కేవలం డిగ్రీలు మాత్రమే కాదు… ఎదుటి వారిని మెప్పించేలా మాట్లాడటం, రాయడం నేర్చుకోవాలి. భాష మీద పట్టుతో పాటు కొత్త టెక్నాలజీలపై అవగాహన పెంచుకోవాలి. భవిష్యత్తులో కేవలం కోడింగ్ తెలిసిన వాళ్ల కంటే ఆ కోడింగ్ గురించి గొప్పగా చెప్పే వాళ్లకే ఎక్కువ విలువ ఉంటుందని నిపుణులు విశ్లేషిస్తున్నారు.
