కామ్రేడ్స్ అండ్ కమ్‌బ్యాక్స్ – ఇండియాలో సంచలనం రేపుతున్న పుస్తకం

• దేశంలో నేటికీ తగ్గని ఎర్రజెండా ప్రాముఖ్యత
• లెఫ్ట్ పార్టీల లెక్కలు… ఎన్నికల మలుపులు!
• కేరళ నుంచి కాశ్మీర్ దాకా కమ్యూనిస్టుల బాట
• పోరాటమే ఊపిరిగా పయనం

సహనం వందే, న్యూఢిల్లీ:

భారత రాజకీయ యవనికపై ఎర్రజెండా రేపిన సంచలనాలు నేటికీ ఒక సజీవ సాక్ష్యం. ఎన్నికల గెలుపోటములతో సంబంధం లేకుండా దేశ విధానాలను శాసించే శక్తి కమ్యూనిస్టులకు ఉంది. ఆ పార్టీ సిద్ధాంతం, పోరాట పటిమ నేటికీ యువతరం నరనరాల్లో ప్రవహిస్తోంది. దేశవ్యాప్తంగా మితవాద గాలులు వీస్తున్న వేళ ఎర్ర కోటలు తమ ఉనికిని ఎలా కాపాడుకుంటున్నాయో వివరిస్తూ వచ్చిన ‘కామ్రేడ్స్ అండ్ కమ్‌బ్యాక్స్’ పుస్తకం ఇప్పుడు రాజకీయ వర్గాల్లో హాట్ టాపిక్‌గా మారింది.

సిద్ధాంతమే అసలైన ప్రాణం…
దేశంలో రాజకీయ పార్టీలు అధికారం కోసం ఆరాటపడుతుంటే… లెఫ్ట్ పార్టీలు మాత్రం సిద్ధాంతం కోసం పోరాడుతున్నాయి. 1920లో మొదలైన కమ్యూనిస్టు ప్రస్థానం నేటికి 100 ఏళ్లు దాటినా తన ప్రత్యేకతను కోల్పోలేదు. ప్రైవేటీకరణ, కార్పొరేట్ శక్తుల దోపిడీకి వ్యతిరేకంగా వీరు చేసే పోరాటాలు సామాన్యుడికి భరోసానిస్తున్నాయి. విపక్ష కూటములను ఏకం చేయడంలో ఇప్పటికీ కమ్యూనిస్టులే కీలకం. పార్లమెంటులో సంఖ్యాబలం తగ్గినా, ప్రజా సమస్యలపై గొంతు ఎత్తడంలో వీరు ఎప్పుడూ ముందుంటారు. ఈ పుస్తకం ప్రకారం… భారతదేశంలో లెఫ్ట్ అంటే కేవలం ఒక పార్టీ కాదు, అదొక సామాజిక అవసరం.

కేరళ నమూనా సరికొత్త రికార్డు…
దక్షిణాది రాష్ట్రమైన కేరళలో కమ్యూనిస్టులు సరికొత్త చరిత్ర సృష్టించారు. 140 అసెంబ్లీ స్థానాలున్న కేరళలో 2021 ఎన్నికల్లో వరుసగా రెండోసారి అధికారం చేపట్టి 40 ఏళ్ల సంప్రదాయాన్ని తిరగరాశారు. పినరయి విజయన్ ఆధ్వర్యంలోని కమ్యూనిస్టు ప్రభుత్వం ఆరోగ్య, విద్యా రంగాల్లో సాధించిన ఫలితాలు ప్రపంచం దృష్టిని ఆకర్షించాయి. కరోనా సమయంలో కేరళ ప్రభుత్వం చేపట్టిన పక్కా ప్రణాళికలు ప్రజల్లో నమ్మకాన్ని పెంచాయి. ఈ విజయం జాతీయ స్థాయిలో కమ్యూనిస్టులకు భారీ బూస్ట్ ఇచ్చింది. పాలనలో పారదర్శకత ఉంటే ఎర్రజెండాకు ఎదురులేదని కేరళ నిరూపించింది.

బెంగాల్‌లో పునర్వైభవం దిశగా
34 ఏళ్ల నిరంతర పాలన తర్వాత పశ్చిమ బెంగాల్‌లో కమ్యూనిస్టులు పతనాన్ని చవిచూశారు. 2011లో మమతా బెనర్జీ దెబ్బకు కోటలు కూలిపోయాయి. కానీ ఇప్పుడు అక్కడ పరిస్థితి మారుతోంది. తృణమూల్, బీజేపీ మధ్య సాగుతున్న ఘర్షణల వల్ల ప్రజలు మళ్లీ లెఫ్ట్ వైపు చూస్తున్నారు. క్షేత్రస్థాయిలో యువ కేడర్ మళ్లీ రోడ్ల మీదకు వస్తోంది. 294 స్థానాలున్న బెంగాల్ అసెంబ్లీలో ప్రస్తుతం ప్రాతినిధ్యం లేకపోయినా స్థానిక సంస్థల ఎన్నికల్లో ఓట్ల శాతం పెరుగుతోంది. బెంగాల్ గడ్డపై ఎర్రజెండా మళ్లీ రెపరెపలాడటం ఖాయమని రాజకీయ విశ్లేషకులు అంచనా వేస్తున్నారు.

రైతు ఉద్యమాలే ఊపిరిగా
దేశ రాజధానిని వణికించిన చారిత్రాత్మక రైతు పోరాటంలో కమ్యూనిస్టు అనుబంధ సంఘాలు వెన్నెముకగా నిలిచాయి. అఖిల భారత కిసాన్ సభ నేతృత్వంలో లక్షలాది మంది రైతులు ఏకమయ్యారు. ఏడాది పాటు ఎండనక వాననక సాగించిన ఈ పోరాటం చివరకు నల్ల చట్టాల రద్దుకు దారితీసింది. ఇది కేవలం ఒక వర్గం విజయం కాదు… కార్పొరేట్ శక్తులకు వ్యతిరేకంగా సామాన్యుడు సాధించిన విజయం. ఈ ఉద్యమమే లెఫ్ట్ పార్టీలకు మళ్లీ జనాదరణ తెచ్చిపెట్టింది. పంజాబ్, హర్యానా, ఉత్తరప్రదేశ్ రాష్ట్రాల్లో ఎర్రజెండా తన ప్రభావాన్ని చూపిస్తోంది.

యువత… మేధావుల గొంతు
భారతదేశంలోని ప్రతిష్టాత్మక విశ్వవిద్యాలయాలు ఇప్పటికీ కమ్యూనిస్టు భావజాలానికి నిలయాలుగా ఉన్నాయి. జవహర్ లాల్ నెహ్రూ యూనివర్సిటీ (జేఎన్‌యూ)లో ఎస్‌ఎఫ్ఐ వరుస విజయాలే దీనికి నిదర్శనం. యువత ఎదుర్కొంటున్న నిరుద్యోగం, ఫీజుల పెంపు వంటి సమస్యలపై వీరు రాజీలేని పోరాటం చేస్తున్నారు. అలాగే దేశంలోని అగ్రశ్రేణి రచయితలు, కళాకారులు లెఫ్ట్ పార్టీలకే మద్దతు తెలుపుతున్నారు. భావప్రకటనా స్వేచ్ఛపై దాడులు జరుగుతున్న వేళ లెఫ్ట్ పార్టీలు ఒక రక్షణ కవచంలా పనిచేస్తున్నాయని ఈ పుస్తక రచయిత విశ్లేషించారు.

విపక్ష కూటమిలో కీ రోల్
రాబోయే సార్వత్రిక ఎన్నికల్లో బీజేపీని అడ్డుకోవడమే లక్ష్యంగా లెఫ్ట్ పార్టీలు పావులు కదుపుతున్నాయి. విపక్ష కూటమి ‘ఇండియా’ ఏర్పాటులో సీపీఎం, సీపీఐ పాత్ర ఎంతో కీలకం. సామాన్య ప్రజల ఎజెండాను ఎన్నికల ఎజెండాగా మార్చడంలో వీరు సక్సెస్ అవుతున్నారు. దేశవ్యాప్తంగా ఉన్న 50 కోట్లకు పైగా అసంఘటిత కార్మికులను ఏకం చేసే దిశగా అడుగులు వేస్తున్నారు. ఎర్రజెండా మనుగడ కేవలం ఓట్ల కోసం కాదు… ఈ దేశ ప్రజాస్వామ్య రక్షణ కోసం అని ప్రజలు నమ్ముతున్నారు. మున్ముందు భారత రాజకీయాల్లో కమ్యూనిస్టులు మళ్లీ కింగ్ మేకర్లుగా మారబోతున్నారు.