- రగిలిన గాయం… రణంలోనే మరణం
- విజయమో వీర స్వర్గమో… ఇదే నినాదం
- హోర్ముజ్ మూసి ప్రపంచాన్ని బందీ చేసింది
- ప్రపంచ ఆర్థిక సంక్షోభం… దేశాలు విలవిల
సహనం వందే, హైదరాబాద్:
కొన్నిసార్లు శాంతి కంటే యుద్ధమే ఒక దేశానికి ఊపిరి పోస్తుంది. ఇరాన్ ఇప్పుడు అదే మార్గాన్ని ఎంచుకుంది. ఆ దేశపు గాలిలో ఇప్పుడు పూల సువాసన లేదు… కేవలం గన్పౌడర్ ఘాటు మాత్రమే ఉంది. ఇరాన్ యుద్ధం కోరుకుంటోంది… ఎందుకంటే ఆ మంటలే తన ఆర్థిక గాయాలకు కాపలాగా ఉంటాయని దానికి తెలుసు. ఒక విరిగిన కలలాంటి గతం నుంచి ఒక భయంకరమైన రేపటి వైపు ఆ దేశం అడుగులు వేస్తోంది.
యుద్ధమే ఒక ఆయుధం
ఇరాన్ ఇప్పుడు సంధి గురించి మాట్లాడటం లేదు. అమెరికా అధ్యక్షుడు ట్రంప్ హెచ్చరికలు హోర్ముజ్ జలసంధి అలల మీద నిరర్థకమైపోతున్నాయి. దశాబ్దాలుగా మూతపడని ఆ సముద్రపు దారిని ఇరాన్ ఇప్పుడు ఇనుప సంకెళ్లతో బంధించింది. ఇది కేవలం ఒక మార్గాన్ని మూసివేయడం కాదు… ప్రపంచం గొంతుపై కత్తి పెట్టడం. భవిష్యత్తులో వచ్చే ఏ పాలకుడైనా ఇరాన్ వైపు చూడాలంటే భయపడేలా ఆ దేశం తన వ్యూహాన్ని రచిస్తోంది. ఇజ్రాయెల్, అమెరికా చేసే దాడులకు ఇరాన్ వెనక్కి తగ్గడం లేదు. ఎదురుదెబ్బ తగిలిన ప్రతిసారీ మరింత బలంగా లేస్తోంది. ప్రపంచానికి ఈ యుద్ధం భారమైతే, ఇరాన్కు మాత్రం ఇది తన ఉనికిని కాపాడుకునే ఏకైక మార్గంగా కనిపిస్తోంది.
చమురు మంటల నీడలో
చమురు ధరలు పెరుగుతుంటే ఆ సెగ ఇరాన్ ఆర్థిక వ్యవస్థకు వెచ్చదనాన్ని ఇస్తోంది. ఆంక్షలతో కుంగిపోయిన నేల మీద ఈ యుద్ధం ఒక ఆశగా మారింది. ఇజ్రాయెల్, అమెరికా చేసే ప్రతి దాడికి ఇరాన్ తనదైన శైలిలో బదులిస్తోంది. ఇది ఒక ఆత్మగౌరవ పోరాటం లాంటిది. ప్రపంచం అంతా భారీ నష్టాలతో కొట్టుమిట్టాడుతుంటే ఇరాన్ మాత్రం ఆ యుద్ధ జ్వాలలనే తన రక్షణ కవచంగా మార్చుకుంది.
ఉనికి కోసం ఆరాటం
ఆ దేశపు వీధులు ఇప్పుడు నిశ్శబ్దంగా ఉన్నాయి. ఆంక్షలు, కరెన్సీ పతనం, ఎండిపోతున్న జలాశయాలు ఇరాన్ను ఉక్కిరిబిక్కిరి చేస్తున్నాయి. రాజధాని టెహ్రాన్ను ఖాళీ చేయాల్సి వస్తుందని అధ్యక్షుడు హెచ్చరించిన రోజులు ఉన్నాయి. ఆ అంచున నిలబడి చావో రేవో తేల్చుకోవాలని ఇరాన్ నిర్ణయించుకుంది. అందుకే అది యుద్ధాన్ని ఒక పరిష్కారంగా చూస్తోంది. అది పోగొట్టుకోవడానికి ఏమీ లేని వాడి తెగింపు.
చౌకైన మృత్యువు
ఇరాన్ తన రక్షణ కోసం ఖరీదైన ఆయుధాలను వాడటం లేదు. కేవలం 16 లక్షల నుండి 41 లక్షల రూపాయల విలువ చేసే చిన్న డ్రోన్లను ప్రయోగిస్తోంది. కానీ వాటిని ఆపడానికి ప్రత్యర్థులు 33 కోట్ల రూపాయల విలువైన క్షిపణులను ఖర్చు చేయాల్సి వస్తోంది. ఇది ఒక పేదవాడి తెలివైన యుద్ధతంత్రం. ఆయుధాలు తక్కువైనా అవి గురి చూసి కొడుతున్నాయి. ప్రతి ప్రయోగం వెనుక ఒక లెక్క ఉంది.
మూసుకుపోయిన ద్వారాలు
హోర్ముజ్ జలసంధి ఇప్పుడు ఒక మౌన సాక్షిలా ఉంది. ఇరాన్ తన వద్ద ఉన్న మందుపాతరలతో, డ్రోన్లతో ఆ మార్గాన్ని ఒక అగాధంగా మార్చేసింది. గల్ఫ్ దేశాల ఆదాయం ఆవిరవుతుంటే ప్రపంచ ఆర్థిక వ్యవస్థ కుప్పకూలుతోంది. ఇరాన్ తాను అనుకున్నది సాధిస్తోంది. అది ప్రపంచాన్ని బందీగా మార్చుకుంది. యుద్ధం వద్దు అనుకునే వాళ్లందరికీ… యుద్ధమే సమాధానం అని ఇరాన్ నిరూపిస్తోంది.
బొల్లోజు రవి, సీనియర్ జర్నలిస్ట్
