- మైక్రోసాఫ్ట్ కు భారీ నష్టాలు
- ఖర్చు ఎక్కువ.. లాభం తక్కువ
- ఇన్వెస్టర్ల సంపద ఆవిరి
- టెక్ రంగంలో కొత్త టెన్షన్
సహనం వందే, హైదరాబాద్:
సాఫ్ట్వేర్ లో ఇప్పుడు ఎక్కడ చూసినా కృత్రిమ మేధ (ఏఐ) మాటే వినిపిస్తోంది. అయితే ఈ ఏఐ అనేది ఒక పెద్ద గాలి బుడగ అని… అది ఎప్పుడైనా పేలవచ్చని ఆర్థిక నిపుణుడు ఎరిక్ గార్డన్ బాంబు పేల్చారు. మైక్రోసాఫ్ట్ లాంటి దిగ్గజ కంపెనీ షేర్లు ఒక్కసారిగా పడిపోవడమే దీనికి నిదర్శనమని ఆయన హెచ్చరిస్తున్నారు. ఏఐ వల్ల ప్రపంచం మారిపోతుందని ఆశపడి వేల కోట్లు కుమ్మరిస్తున్న ఇన్వెస్టర్లకు ఇప్పుడు అసలు సినిమా కనిపిస్తోంది.
ఇక్కడ బబుల్ అంటే ఏమిటి?
ఒక వస్తువు అసలు విలువ కంటే దాని ధర విపరీతంగా పెరిగిపోవడాన్ని మార్కెట్ భాషలో ‘బుడగ’ అంటారు. ఉదాహరణకు ఒక రూపాయి విలువ చేసే చాక్లెట్ ను.. అది తింటే అద్భుతాలు జరుగుతాయని అందరూ నమ్మి 100 రూపాయలకు కొనడం మొదలుపెడతారు. కానీ ఏదో ఒక రోజు ఆ చాక్లెట్ లో అంత సీన్ లేదని తెలిసినప్పుడు దాని ధర ఒక్కసారిగా మళ్లీ రూపాయికి పడిపోతుంది. అప్పుడు 100 రూపాయలు పెట్టి కొన్నవారంతా నిండా మునిగిపోతారు. ఇప్పుడు ఏఐ విషయంలో కూడా అదే జరుగుతోందని ఎరిక్ గార్డన్ అంటున్నారు.
మైక్రోసాఫ్ట్ కు ఎందుకు నష్టం వచ్చింది?
మైక్రోసాఫ్ట్ కంపెనీ ఏఐ టెక్నాలజీ కోసం గత ఆరు నెలల్లోనే ఏకంగా 4.78 లక్షల కోట్ల రూపాయలు ఖర్చు చేసింది. కంప్యూటర్లు, డేటా సెంటర్లు కొనేందుకే ఈ డబ్బును నీళ్లలా ఖర్చు పెట్టింది. అయితే ఇంత ఖర్చు చేస్తున్నా దానికి తగ్గట్టుగా లాభాలు మాత్రం రావడం లేదు. ఏఐ వల్ల కంపెనీకి వచ్చే ఆదాయం కంటే పెడుతున్న పెట్టుబడే చాలా ఎక్కువగా ఉంది. ఇది చూసిన ఇన్వెస్టర్లు భయపడిపోయి మైక్రోసాఫ్ట్ షేర్లను అమ్మేయడంతో ఆ కంపెనీ విలువ ఒక్కసారిగా పడిపోయింది.
ఇన్వెస్టర్లు ఎందుకు విలవిలలాడుతున్నారు?
ఏఐ వల్ల రాత్రికి రాత్రే కోటీశ్వరులు అయిపోతామని చాలా మంది ఇన్వెస్టర్లు ఎన్విడియా, పలన్ తిర్ వంటి కంపెనీల్లో భారీగా పెట్టుబడులు పెట్టారు. ఎన్విడియా కంపెనీ షేర్లు గడిచిన ఏడాదిన్నరలోనే 13 రెట్లు పెరిగాయి. అంటే ఒకప్పుడు 100 రూపాయలు ఉన్న షేర్ ఇప్పుడు 1300 రూపాయలు అయింది. కానీ ఆ కంపెనీకి వస్తున్న లాభాలకు, ఆ షేర్ ధరలకు అస్సలు పొంతన లేదు. ఎప్పుడైతే మైక్రోసాఫ్ట్ లాంటి పెద్ద కంపెనీయే నష్టపోతోందని తెలిసిందో మిగిలిన కంపెనీల పరిస్థితి ఏంటని ఇన్వెస్టర్లు ఆందోళన చెందుతున్నారు.
ఖర్చు ఎక్కువ.. ఫలితం తక్కువ
ఏఐ టెక్నాలజీని నడపాలంటే విపరీతమైన కరెంటు, ఖరీదైన సర్వర్లు, డేటా సెంటర్లు కావాలి. వీటికి అయ్యే ఖర్చు కొన్ని లక్షల కోట్లలో ఉంటుంది. కానీ మనం వాడుతున్న చాట్ జీపీటీ వంటి ఏఐ సర్వీసుల ద్వారా కంపెనీలకు వచ్చే ఆదాయం చాలా తక్కువ. అంటే పెట్టే పెట్టుబడి ఒక అడుగు ఉంటే వచ్చే ఆదాయం ఒక అంగుళం మాత్రమే ఉంది. ఈ గ్యాప్ ఇలాగే కొనసాగితే ఏఐ కంపెనీలు దివాళా తీయక తప్పదని నిపుణులు హెచ్చరిస్తున్నారు.
నిపుణులు ఏమని హెచ్చరిస్తున్నారు?
ఏఐ బుడగ ప్రస్తుతం మన సౌర కుటుంబంలోని అతిపెద్ద గ్రహమైన గురు గ్రహమంత పరిమాణంలో ఉందని ఎరిక్ గార్డన్ ఎద్దేవా చేశారు. ఇది పేలితే ఆ శిథిలాలు ప్రపంచవ్యాప్తంగా పడతాయని, కోట్లాది మంది ఇన్వెస్టర్లు రోడ్డున పడతారని చెప్పారు. గతంలో 2000 సంవత్సరంలో ఇంటర్నెట్ కంపెనీల విషయంలో కూడా ఇలాగే జరిగిందని (డాట్ కామ్ బబుల్)… అప్పుడు జరిగిన నష్టం కంటే ఏఐ వల్ల జరిగే నష్టం చాలా ఎక్కువగా ఉంటుందని ఆయన విశ్లేషించారు.
ఇప్పుడు ఏం జరగబోతోంది?
ప్రస్తుతానికి ఇన్వెస్టర్ల దగ్గర ఇంకా డబ్బు ఉంది కాబట్టి మార్కెట్ పడిపోకుండా కాపాడుతున్నారు. కానీ ఎంత కాలం ఇలా గాలిలో మేడలు కడతారని నిపుణులు ప్రశ్నిస్తున్నారు. మైక్రోసాఫ్ట్ షేర్ల పతనం అనేది రాబోయే పెద్ద ప్రమాదానికి ఒక ట్రైలర్ మాత్రమే అని వారు అంటున్నారు. ఏఐ రంగంలో అద్భుతాలు జరుగుతున్న మాట వాస్తవమే అయినా దాని విలువను అంచనా వేయడంలో మార్కెట్ భారీ పొరపాటు చేస్తోందని స్పష్టమవుతోంది.
