- బలేన్ షా ఘనవిజయం… కొత్త శకం ప్రారంభం
- పాతతరం రాజకీయాల పతనానికి నాంది
- రాష్ట్రీయ స్వతంత్ర పార్టీ ప్రభంజనం
సహనం వందే, నేపాల్:
హిమాలయాల చెంత జెన్ జెడ్ యువత గర్జించింది. పాత తరం రాజకీయ నాయకుల కోటలు బద్దలయ్యాయి. ఒకప్పటి రాపర్ గాయకుడు… ఖాట్మండు మాజీ మేయర్ బలేన్ షా నేతృత్వంలో సరికొత్త చరిత్ర మొదలైంది. అవినీతిపై తిరగబడ్డ యువత బ్యాలెట్ బాక్సుల ద్వారా తమ ఆగ్రహాన్ని ప్రపంచానికి చాటిచెప్పారు. ఇది కేవలం ఎన్నికల విజయం మాత్రమే కాదు… ఒక తరం మార్పునకు నిదర్శనం.
యువ కెరటం
నేపాల్ పార్లమెంటు ఎన్నికల ఫలితాలు రాజకీయ విశ్లేషకులను విస్మయానికి గురిచేశాయి. మొత్తం 165 ప్రత్యక్ష ఎన్నికల స్థానాల్లో బలేంద్ర షా నేతృత్వంలోని రాష్ట్రీయ స్వతంత్ర పార్టీ ఏకంగా 100 స్థానాలను కైవసం చేసుకుంది. ఆధునిక నేపాల్ చరిత్రలో ఇదొక అతిపెద్ద విజయంగా నమోదైంది. 35 ఏళ్ల మాజీ రాపర్ బలేన్ షా ఇప్పుడు దేశ ప్రధాని పీఠం వైపు అడుగులు వేస్తున్నారు. దేశంలోని యువత అంతా ఆయన వెంటే నడిచింది.
పాతతరం పతనం
ఈ ఎన్నికల్లో అత్యంత ఆసక్తికరమైన అంశం తూర్పు నేపాల్లోని పార్లమెంటు స్థానం. అక్కడ 35 ఏళ్ల బలేన్ షా నేరుగా 74 ఏళ్ల కేపీ శర్మ ఓలీతో తలపడ్డారు. మూడు సార్లు ప్రధానిగా పనిచేసిన అనుభవం ఓలీ సొంతం. అయినా సరే ఓలీని బలేన్ షా చిత్తుగా ఓడించారు. పాత తరం నాయకులు ఇక అవసరం లేదని ఓటర్లు తేల్చిచెప్పారు. ఓలీ రాజకీయ ప్రస్థానానికి ఇది కోలుకోలేని దెబ్బగా మారింది.
తిరుగుబాటు నేపథ్యం
గతేడాది నేపాల్లో చెలరేగిన యువత ఉవ్వెత్తున చేసిన పోరాటమే ఈ విజయానికి పునాది. రాజకీయాల్లో పెరిగిన అవినీతి, సోషల్ మీడియాపై నిషేధానికి వ్యతిరేకంగా జనం రోడ్లపైకి వచ్చారు. సెప్టెంబరులో జరిగిన ఆ నిరసనల్లో భద్రతా దళాలు జరిపిన కాల్పుల్లో 19 మంది ప్రాణాలు కోల్పోయారు. ఆ తర్వాత దేశమంతా అల్లర్లు చెలరేగి వేల సంఖ్యలో భవనాలు దహనమయ్యాయి. అప్పుడే ఓలీ ప్రభుత్వం కుప్పకూలిపోయింది.
జెన్ జెడ్ శక్తి
ఈ ఎన్నికల ఫలితాలను జెన్ జెడ్ సాధించిన రాజకీయ విప్లవంగా అభివర్ణిస్తున్నారు. రాష్ట్రీయ స్వతంత్ర పార్టీ సీనియర్ నేత సుభాష్ శర్మ అభిప్రాయం ప్రకారం ఇంతటి భారీ విజయాన్ని ఎవరూ ఊహించలేదు. ప్రజలు మార్పు కోరుకుంటున్నారని తెలుసు కానీ అది సునామీలా మారుతుందని రాజకీయ ఉద్దండులు అంచనా వేయలేకపోయారు. యువత తలచుకుంటే ఏ వ్యవస్థనైనా మార్చగలదని ఈ తీర్పు నిరూపించింది.
భవిష్యత్తు సవాళ్లు
నేపాల్ ఇప్పుడు ఒక కొత్త శకంలోకి ప్రవేశిస్తోంది. గత నెలలో కూడా ఖాట్మండు వీధుల్లో కాల్చిన కార్ల శిథిలాలు ఇంకా కనిపిస్తూనే ఉన్నాయి. అల్లర్ల గాయాలు ఇంకా పచ్చిగానే ఉన్నా ప్రజలు మాత్రం కొత్త నాయకత్వంపై నమ్మకం ఉంచారు. బలేన్ షా ప్రభుత్వం ముందు ఇప్పుడు దేశాన్ని గాడిలో పెట్టాల్సిన బాధ్యత ఉంది. అవినీతి రహిత పాలనను అందించడమే ఈ కొత్త తరం నాయకుల ముందున్న ప్రధాన లక్ష్యం.
