స్కూల్ మోదీ… కాలేజీ చంద్రబాబు..ఉద్యోగం రాహుల్ గాంధీ

• మూడు జెండాలు మోసిన ముఖ్యమంత్రి
• తన రాజకీయ ప్రస్థానాన్ని ఆసక్తికరంగా వివరించిన సీఎం రేవంత్ రెడ్డి
• సంచలనంగా మారిన సీఎం వ్యాఖ్యలు… రాజకీయ వర్గాల్లో చర్చ
• రాజకీయ రంగులు అంటూ ప్రతిపక్షాల ఫైర్

సహనం వందే, హైదరాబాద్:

ముఖ్యమంత్రి రేవంత్ రెడ్డి తన రాజకీయ ప్రస్థానంపై చేసిన వ్యాఖ్యలు రాజకీయ వర్గాల్లో తీవ్ర చర్చనీయాంశంగా మారాయి. ఆదివారం హరియాణ గవర్నర్ బండారు దత్తాత్రేయ రచించిన ‘ప్రజలే నా ఆత్మకథ’ పుస్తకావిష్కరణ కార్యక్రమంలో పాల్గొన్న రేవంత్, తన రాజకీయ జీవితంలో ప్రధాని నరేంద్ర మోడీ, టీడీపీ అధినేత చంద్రబాబు నాయుడు, కాంగ్రెస్ అధినేత రాహుల్ గాంధీలతో తనకున్న అనుబంధాన్ని ఆసక్తికరంగా వెల్లడించారు. ‘స్కూల్ మోదీ… కాలేజీ చంద్రబాబు దగ్గర చదివాను. ఇప్పుడు రాహుల్ గాంధీ దగ్గర ఉద్యోగం చేస్తున్నాన’ని రేవంత్ వ్యాఖ్యానించడం రాజకీయంగా కలకలం రేపింది. బీజేపీ, టీడీపీ, కాంగ్రెస్ వంటి విభిన్న రాజకీయ శిబిరాల్లోని అగ్రనేతలతో తనకున్న సంబంధాలను రేవంత్ ఈ విధంగా వెల్లడించడం ద్వారా తన రాజకీయ అనుభవాన్ని హైలైట్ చేసే ప్రయత్నం చేశారని అభిప్రాయపడుతున్నారు. మూడు జెండాలు మోసిన మన ముఖ్యమంత్రి మూడు విభిన్న సిద్ధాంతాల భావజాలాలను కూడా కలిగి ఉన్నారని రాజకీయ విశ్లేషకులు అంటున్నారు.

రాజకీయ రంగులు అంటూ ప్రతిపక్షం ఫైర్…
రేవంత్ వ్యాఖ్యలపై బీజేపీ, బీఆర్ఎస్ నాయకులు తీవ్రంగా స్పందించారు. ‘రేవంత్ రెడ్డి రాజకీయ రంగులు మార్చిన చరిత్రను ఈ వ్యాఖ్యలు గుర్తు చేస్తున్నాయి. ఇప్పుడు కాంగ్రెస్‌లో ఉంటూ మోదీ, చంద్రబాబులతో సంబంధాలను ప్రస్తావించడం ద్వారా రాజకీయంగా గందరగోళం సృష్టించే ప్రయత్నం చేస్తున్నార’ని బీజేపీ నాయకులు విమర్శించారు. బీఆర్ఎస్ నాయకులు రేవంత్ వ్యాఖ్యలను రాజకీయ అవకాశవాదంగా అభివర్ణించారు. ‘ఒకవైపు కాంగ్రెస్‌లో ఉంటూ, మరోవైపు బీజేపీ, టీడీపీ నాయకులతో సంబంధాలను ప్రస్తావించడం ద్వారా తెలంగాణ ప్రజలను గందరగోళానికి గురిచేస్తున్నార’ని విమర్శించారు. బీజేపీ నాయకులు కూడా రేవంత్ వ్యాఖ్యలను రాజకీయ డ్రామాగా అభివర్ణించారు.

రాహుల్‌తో సన్నిహిత అనుబంధం…
రేవంత్ రెడ్డి తన ప్రస్తుత రాజకీయ జీవితాన్ని రాహుల్ గాంధీతో అనుబంధంతో ముడిపెట్టడం ద్వారా కాంగ్రెస్‌లో తన స్థానాన్ని మరింత బలోపేతం చేసుకునే ప్రయత్నం చేస్తున్నట్లు కనిపిస్తోంది. రాహుల్ గాంధీ దగ్గర ఉద్యోగం చేస్తున్నాననే వ్యాఖ్య ద్వారా, కాంగ్రెస్ అగ్రనాయకత్వంతో తన సన్నిహిత సంబంధాన్ని రేవంత్ స్పష్టం చేశారు. ఇది తెలంగాణలో కాంగ్రెస్‌ను బలోపేతం చేయడంలో రేవంత్ కీలక పాత్రను సూచిస్తోంది.

మోదీ, చంద్రబాబుతో సంబంధం…
రేవంత్ రెడ్డి గతంలో బీజేపీ, టీడీపీలతో సంబంధాలను ప్రస్తావించడం రాజకీయ వ్యూహంగా భావిస్తున్నారు విశ్లేషకులు. రాష్ట్ర అభివృద్ధి కోసం కేంద్రంతో సమన్వయం అవసరమని రేవంత్ గతంలో పలుమార్లు పేర్కొన్నారు. ఈ నేపథ్యంలో మోదీ, చంద్రబాబులతో సన్నిహిత సంబంధాలను ప్రస్తావించడం ద్వారా కేంద్రంతో సహకారాన్ని కొనసాగించే ఉద్దేశం కనిపిస్తోంది. ఒకవైపు కాంగ్రెస్‌ను బలోపేతం చేస్తూనే కేంద్రంతో, పొరుగు రాష్ట్రాలతో సహకారాన్ని కొనసాగించాలనే రేవంత్ వ్యూహం స్పష్టంగా కనిపిస్తోంది. అయితే విపక్షాల విమర్శలు రేవంత్ రాజకీయ విశ్వసనీయతపై ప్రశ్నలు లేవనెత్తే అవకాశం ఉంది. ఈ వ్యాఖ్యలు రాబోయే రోజుల్లో తెలంగాణ రాజకీయాల్లో ఎలాంటి మార్పులు తీసుకొస్తాయనేది ఆసక్తికరంగా ఉంది.