- చావును జయిస్తున్న ధనవంతులు
- కుబేరుల తీరుపై ‘హిమ్స్ అండ్ హెర్స్’ ఫైర్
- సూపర్ బౌల్ మ్యాచ్ ప్రకటన రచ్చ రచ్చ
- బిలియనీర్లకు దక్కుతున్న ఆయుష్షు
- సంపన్నులే జీవిస్తారు… పేదలు చస్తారు
- పైసా ఉంటేనే ప్రాణం.. లేదంటే గాలిలో దీపం
- ఆరోగ్యం కోసం కోట్లు కుమ్మరిస్తున్న పెద్దలు
- ముసలివాళ్లం కాకుండా మరికొందరు ఖర్చు
- వింత వింత యంత్రాలపై వ్యాయామాలు
సహనం వందే, అమెరికా:
వైద్య రంగంలో డబ్బున్న వాడికి ఒక న్యాయం, లేనివాడికి మరో న్యాయం ఉందన్న పచ్చి నిజాన్ని ‘హిమ్స్ అండ్ హెర్స్’ సంస్థ ఎండగట్టింది. అమెరికాలో అత్యంత ఖరీదైన క్రీడా వేదికైన సూపర్ బౌల్ మ్యాచ్ సందర్భంగా ఈ సంస్థ ఇచ్చిన ప్రకటన ఇప్పుడు ప్రపంచవ్యాప్తంగా చర్చకు దారితీసింది. “సంపన్నులు మాత్రమే ఎక్కువ కాలం జీవిస్తారు” అనే పేరుతో విడుదల చేసిన ఈ వీడియో.. వైద్య సేవల్లో ఉన్న వివక్షను, బిలియనీర్ల విలాసాలను సూటిగా నిలదీసింది.
జెఫ్ బెజోస్ పై వ్యంగ్యాస్త్రాలు
ప్రపంచ కుబేరుడు జెఫ్ బెజోస్ అంతరిక్ష యాత్రల కోసం వేల కోట్లు ఖర్చు చేస్తున్నారు. హిమ్స్ సంస్థ తన ప్రకటనలో సరిగ్గా ఆయనను పోలిన ఒక వ్యక్తిని చూపించి ఎద్దేవా చేసింది. సామాన్యుడు కనీస వైద్యం అందక ఇబ్బంది పడుతుంటే… ఈ బిలియనీర్లు మాత్రం తమ వినోదం కోసం కోట్లు తగలేస్తున్నారని ఈ ప్రకటన విమర్శనాత్మకంగా చాటిచెప్పింది. ఆరోగ్యమనేది కేవలం కొద్దిమందికి మాత్రమే పరిమితమైన విలాసం కాకూడదని సంస్థ తన అసహనాన్ని వ్యక్తం చేసింది.
చావును కూడా కొనాలనుకుంటున్నారు…
మరోవైపు బ్రయాన్ జాన్సన్ వంటి కుబేరులు తాము ముసలివాళ్లం కాకుండా ఉండటానికి ప్రతి ఏటా కోట్ల రూపాయలు ఖర్చు పెడుతున్నారు. వింత వింత యంత్రాలతో వ్యాయామం చేస్తూ… రక్తాన్ని మార్చుకుంటూ చావును కూడా జయించాలని వారు ప్రయత్నిస్తున్నారు. దీనినే సంస్థ టార్గెట్ చేసింది. “వీరు కోట్ల రూపాయలు ఖర్చు పెట్టి చావును మోసం చేస్తున్నారు” అని నిలదీసింది. డబ్బుంటే చావును కూడా ఆపేయొచ్చా అనే ప్రశ్న ద్వారా వైద్య రంగంలో ఉన్న అరాచకాన్ని బయటపెట్టింది.
కంపెనీ అసలు ఉద్దేశం ఏంటి?
హిమ్స్ అండ్ హెర్స్ కంపెనీ ఇలాంటి ప్రకటన ఇవ్వడం వెనుక పెద్ద వ్యూహం ఉంది. ప్రస్తుతం వైద్యం అనేది సామాన్యుడికి అందనంత భారమైంది. ఇన్సూరెన్స్ కంపెనీలు, ఫార్మా దిగ్గజాలు సంపన్నులకే కొమ్ముకాస్తున్నాయని ఈ సంస్థ ఆరోపిస్తోంది. ఈ వివక్షను ప్రజల్లోకి తీసుకెళ్లి వ్యవస్థపై తిరుగుబాటు చేయడమే తమ ఉద్దేశమని సంస్థ చీఫ్ డాన్ కెంగెర్ స్పష్టం చేశారు. వైద్య వ్యవస్థ కేవలం ధనవంతుల క్లబ్ లా మారిపోయిందని, దాన్ని సామాన్యుడికి చేరువ చేయాలన్నదే తమ లక్ష్యమని ఆయన పేర్కొన్నారు.
ప్రకటన వెనుక ఉన్న అసలు రంగు
సాధారణంగా ఇలాంటి పెద్ద క్రీడల సమయంలో వచ్చే ప్రకటనలు కేవలం నవ్వు పుట్టించేలా ఉంటాయి. కానీ హిమ్స్ అండ్ హెర్స్ ఆ దారిని పక్కన పెట్టి నిజాలను చెప్పడానికి సాహసించింది. దీని కోసం ఏకంగా 58.80 కోట్ల రూపాయలు ఖర్చు చేసింది. వైద్యం చుట్టూ జరుగుతున్న వ్యాపారాన్ని, అందులో ఉన్న లోపాలను ఎండగట్టడమే తమ ప్రధాన ఉద్దేశమని సంస్థ బాహాటంగా ప్రకటించింది. దీనివల్ల పెద్ద పెద్ద రాజకీయ నాయకులు, కంపెనీల యజమానులు ఉలిక్కిపడ్డారు.
పాత వివాదాలు.. కొత్త పోరాటాలు
హిమ్స్ సంస్థ గతంలో కూడా తక్కువ ధరకే బరువు తగ్గే మందులను ఇస్తామని ప్రకటించి ఫార్మా కంపెనీల ఆగ్రహానికి గురైంది. అప్పట్లో సెనేటర్లు, పెద్ద పెద్ద లాబీయిస్టులు ఈ సంస్థపై దాడి చేశారు. అయినా సరే వెనక్కి తగ్గకుండా ఈసారి ఏకంగా కుబేరుల తీరును ప్రపంచానికి చూపిస్తోంది. ఆరోగ్య రంగంలోని దోపిడీని అడ్డుకోవడమే తమ లక్ష్యమని సంస్థ అంటోంది. సామాన్యుడి ప్రాణానికి కూడా విలువ ఉండాలని, ఆయుష్షు అనేది కేవలం బ్యాంకు బ్యాలెన్స్ మీద ఆధారపడకూడదని ఈ సంస్థ గట్టిగా వాదిస్తోంది.
వ్యవస్థలో మార్పు రావాలి
ప్రస్తుత వైద్య వ్యవస్థ కేవలం లాభాపేక్షతోనే నడుస్తోందని విమర్శకులు అంటున్నారు. ప్రభుత్వం, ప్రైవేట్ సంస్థలు కేవలం లాభాల కోసమే చూస్తే పేదవాడు వైద్యానికి దూరమవుతాడు. ఈ అగాధాన్ని పూడ్చాల్సిన బాధ్యత అందరిపై ఉంది. హిమ్స్ సంస్థ చేసిన ఈ ప్రకటన ఒక సామాజిక చర్చకు నాంది పలికింది. డబ్బుతో సంబంధం లేకుండా ప్రతి ప్రాణానికి విలువ ఉండాలని ఇది కోరుకుంటోంది. ఈ పోరాటం వైద్య రంగంలో ఎలాంటి మార్పులు తెస్తుందో వేచి చూడాలి.
