- దాన్నే అవకాశంగా తీసుకున్న నకిలీగాళ్లు
- దీంతో ఎంబీబీఎస్ పక్కన ఎండీ అనే బోర్డులు
- వారిని స్పెషలిస్ట్ వైద్యులనుకునే ప్రమాదం
- ఆ రకంగా రోగులను మోసగిస్తున్న డాక్టర్లు
- ఆసుపత్రుల్లోనూ దర్శనమిస్తున్న ఎండీలు
- కొన్ని ప్రైవేటు కాలేజీల్లోనూ ఘోస్ట్ ఫ్యాకల్టీలు
సహనం వందే, హైదరాబాద్:
- అతని పేరు డాక్టర్ విశ్వేశ్వరరావు (పేరు మార్చాం). విదేశాల్లో ఎంబీబీఎస్ సమానమైన ఎండీ కోర్సు చదివి వచ్చాడు. హైదరాబాద్ లోని ఒక కార్పొరేట్ ఆసుపత్రిలో జనరల్ ఫిజీషియన్ గా పని చేస్తున్నాడు. యాజమాన్యం కూడా అతనికి అదే బోర్డు పెట్టి ప్రోత్సహిస్తోంది. ఇటీవల జరిగిన దాడుల్లో అతన్ని నకిలీ ఎండీగా గుర్తించారు.
- డాక్టర్ రాజారామ్ (పేరు మార్చాం) విదేశీ ఎండీ (ఎంబీబీఎస్ తత్సమాన కోర్సు) పూర్తి చేసి రంగారెడ్డి జిల్లాలో వైద్యం చేస్తున్నాడు. ఎండీ కార్డియాలజీగా అవతారం ఎత్తాడు. కార్డియాలజిస్ట్ మందులూ రాస్తాడు. సర్జరీలు మాత్రం తనకు తెలిసిన డాక్టర్లకు రిఫర్ చేస్తాడు. ఇతని నిర్వాకాన్ని కూడా ఇటీవలి దాడుల్లో గుర్తించారు.
______________________________________________________________________________________________________________________
రాష్ట్రంలో అనేకమంది నకిలీ ఎండీలు ఉన్నారు. అనేక దేశాల్లో ఎంబీబీఎస్ తత్సమాన ఎండీ కోర్సు ఉంది. అంటే అక్కడ ఎండీ చేసినవాళ్లు ఇక్కడి ఎంబీబీఎస్ తో సమానం. ఆయా దేశాల్లో సదరు కోర్సు చేసిన పలువురు డాక్టర్లు రాష్ట్రంలో ఎండీ (డాక్టర్ ఆఫ్ మెడిసిన్) లుగా చలామణి అవుతూ రోగులను బురిడీ కొట్టిస్తున్నారు. అంతేకాదు అలా చదివిన వారు తప్పుడు డిగ్రీతో దాదాపు 150 ఆసుపత్రులు నడిపిస్తున్నట్లు వైద్య వర్గాలు చెబుతున్నాయి. అవి అసలు రిజిస్ట్రేషనే లేకుండా చేస్తుండటం విస్మయం కలిగిస్తుంది. అంతేకాదు ఎండీ పక్కన ఉండడంతో అలాంటి వాళ్లని కొన్ని ప్రైవేటు మెడికల్ కాలేజీలు ఫ్యాకల్టీగా, ఘోస్ట్ ఫ్యాకల్టీగా నియమించుకోవడం వైద్య రంగంలో మోసాలకు పరాకాష్ట.
వైద్యాధికారులకు ముడుపులు ఇస్తూ..
ఎంబీబీఎస్ చదివినా ఎండీగా బోర్డులు పెట్టుకోవడంతో స్పెషలిస్ట్ వైద్యులనుకొని అనేకమంది రోగులు చికిత్స కోసం వారిని ఆశ్రయిస్తున్నారు. జనరల్ ఫిజీషియన్, జనరల్ సర్జన్, కార్డియాలజీ, నెఫ్రాలజీ, ఆర్థోపెడిక్, పీడియాట్రిక్, గైనిక్, రేడియాలజీ తదితర స్పెషలైజేషన్లతో ఎండీ పక్కన పెడుతూ రోగులను గందరగోళానికి గురిచేస్తున్నారు. అంతేకాదు ఎండీ (యూఎస్), ఎండీ (ఫ్రాన్స్).. అంటూ బోర్డులపై ప్రదర్శిస్తున్నారు. నగరాలు, పట్టణాల్లో తిష్ట వేసిన వీరంతా పెద్ద పెద్ద బోర్డులు పెట్టుకొని ఇష్టారాజ్యంగా ప్రాక్టీస్ చేస్తున్నారు. వీరిపై నిఘా పెట్టాల్సిన అనేక జిల్లాల వైద్యాధికారులు భారీగా ముడుపులు తీసుకుంటూ చూసీచూడనట్లు వ్యవహరిస్తున్నారనే ఆరోపణలున్నాయి.
వికటిస్తున్న వైద్యం…
హైదరాబాద్ మహానగరంలో ఎవరూ గుర్తించే పరిస్థితి కూడా ఉండటం లేదని, ఒక పేరున్న కార్పొరేట్ ఆసుపత్రి సైతం విదేశీ ఎండీ చదివిన వారికే జనరల్ ఫిజీషియన్, సర్జన్, కార్డియాలజీ వంటి బోర్డులు పెట్టి నడిపిస్తున్నట్లు తెలిసింది. ఎంబీబీఎస్, ఎండీల మాదిరి స్పెషలిస్ట్ సేవలు అందిస్తుండటంతో, అనేకచోట్ల వైద్యం వికటించిన సంఘటనలు కూడా వెలుగు చూసినట్లు తెలిసింది. స్పెషాలిటీలో కనీస పరిజ్ఞానం లేకపోవడంతో వైద్యం వికటిస్తోంది. అటువంటి సంఘటనలు జరిగినప్పుడు రోగులను బెదిరించి నోరు మూయిస్తున్నారనే ఆరోపణలున్నాయి. ఇటీవల హైదరాబాదులో కూడా ఎంబీబీఎస్ తత్సమాన ఎండీ చదివిన ఒక డాక్టర్ చిన్న పాపకు వైద్యం చేయడంతో అదికాస్తా వికటించి ఆ పాప ప్రాణం వదిలింది. అయితే ఈ ఘటన బయటకు పొక్కకుండా ఆసుపత్రి యాజమాన్యం మేనేజ్ చేసింది.
టీఎస్ఎంసీ ఆదేశాలు బేఖాతర్…
విదేశాల్లో ఎంబీబీఎస్ తత్సమాన ఎండీ చేసిన డాక్టర్లు పలువురు రోగులను మోసగించడంపై తెలంగాణ రాష్ట్ర వైద్య మండలి (టీఎస్ఎంసీ) దృష్టిసారించింది. ఎంబీబీఎస్ అని మాత్రమే బోర్డులు పెట్టుకోవాలని ఆదేశిస్తూ మార్గదర్శకాలు జారీ చేసినా ఇంకా నకిలీ ఎండీలు రాజ్యమేలుతున్నారు. ఎంబీబీఎస్ తో పాటు ఇతరత్రా అదనపు అర్హతలు ఉన్నవారు మండలిలో నమోదు చేసుకోవాలని సూచించినా కొందరు పట్టించుకోవడంలేదు. జాతీయ మెడికల్ కమిషన్ (ఎన్ఎంసీ) లేదా టీఎస్ఎంసీలో నమోదు చేయని అర్హతలను బోర్డులపై ప్రదర్శించవద్దని స్పష్టం చేసింది. అల్లోపతి వైద్యాన్నే అనుసరించాలని, ప్రతి ఐదు సంవత్సరాలకు రిజిస్ట్రేషన్ పునరుద్ధరించు కోవాలని ఆదేశించింది. విదేశాల్లో వైద్య విద్య పూర్తిచేసినవారు దేశంలో ప్రాక్టీసు, శాశ్వత రిజిస్ట్రేషన్ కోసం కంపల్సరీ రొటేటింగ్ మెడికల్ ఇంటర్న్షిప్ చేయాలని స్పష్టం చేసింది. కానీ అనేకమంది నకిలీ ఎండీ డాక్టర్లు ముడుపులు ఇచ్చుకొని దర్జాగా ప్రాక్టీస్ చేస్తున్నట్లు పలువురు ఆరోపిస్తున్నారు. ఆర్ఎంపీలపై కొరడా ఝలుపిస్తున్న టీఎస్ఎంసీ అధికారులు వీరిపై దృష్టిసారించారని కోరుతున్నారు.
