- శని, ఆదివారాలు మాత్రమే భార్యాభర్తలు
- నవ యువ దంపతుల్లో వింత జీవనశెలి
- వారాంతరాల్లో మాత్రమే కలిసి జీవనం
- సంప్రదాయ వివాహ వ్యవస్థకు సవాల్
- ఆధునిక పోకడలు… కుటుంబం చిన్నాభిన్నం
- పెళ్లి బంధాలకు ప్రమాద ఘంటికలు!
సహనం వందే, హైదరాబాద్:
ఒకప్పుడు ఉమ్మడి కుటుంబాలు ఉండేవి. అయితే కెరీర్ కారణంగా సుదూర ప్రాంతాలకు వెళ్లాల్సి రావడంతో ఉమ్మడి కుటుంబాలు చిన్నాభిన్నమయ్యాయి. ఇప్పుడు మరింత ఆధునికత పెరిగింది. ఉమ్మడి కుటుంబాల సంగతి పక్కన పెడితే అసలు భార్యాభర్తలు కూడా కలిసి బతకలేని దుస్థితి ఏర్పడింది. వేర్వేరుచోట్ల పనిచేస్తూ వారాంతరంలో కలిసే దుష్ట సంస్కృతి ఏర్పడింది. దాన్నే వీకెండ్ మ్యారేజ్ అంటున్నారు. ఇలాంటి మ్యారేజ్ లు ఏ మేరకు నిలబడతాయో… ఎప్పుడు ఎండ్ కార్డు పడుతుందో మిలియన్ డాలర్ల ప్రశ్న. వీకెండ్ మ్యారేజ్ ఆధునిక బంధాలకు సరికొత్త నిర్వచనమా? లేక బంధాల పవిత్రతను కాలరాచే ప్రమాదకరమైన పోకడనా? వారం వారం విడివిడిగా బతుకుతూ, కేవలం శని ఆదివారాలు మాత్రమే భార్యాభర్తలుగా మారే ఈ వింత సంస్కృతి యువతను ఊరిస్తోంది. కెరీర్, స్వేచ్ఛ పేరుతో మొదలైన ఈ వారాంతపు వైవాహిక బంధాలు నిజంగా నిలుస్తాయా? లేక ఒంటరితనం, ఆర్థిక భారం, అనుబంధాల బలహీనతకు దారితీస్తాయా? నిపుణులు హెచ్చరిస్తున్నా నయా ట్రెండ్‌గా చెలామణి అవుతుండడం ఆందోళన కలిగిస్తుంది.
వారాంతపు బంధం.. నిజమైన దాంపత్యమా?
ఉద్యోగాలు వేర్వేరు చోట్ల. జీవితాలు వేర్వేరుగా. ఇలాగైతే పెళ్లెందుకు? శుక్రవారం సాయంత్రం మొదలయ్యే వీరి సంసారం ఆదివారం రాత్రి ముగుస్తుంది. మిగిలిన ఐదు రోజులు ఒంటరి పోరాటం. హైదరాబాద్, బెంగళూరు, చెన్నై వంటి ఐటీ హబ్‌లలో ఈ ఒరవడి వేగంగా విస్తరిస్తోంది. హైదరాబాద్‌లో సాఫ్ట్‌వేర్ ఇంజనీర్‌గా పనిచేసే రాహుల్, బెంగళూరులో డేటా సైంటిస్ట్‌గా ఉన్న తన భార్య సౌమ్యతో వారాంతాల్లో మాత్రమే కలుస్తాడు. ఈ విధానం తమ కెరీర్‌లకు ఇబ్బంది లేకుండా బంధాన్ని బలంగా ఉంచుతుందని రాహుల్ చెబుతున్నప్పటికీ, సంబంధాల పవిత్రతను ఈ విధానం ప్రభావితం చేస్తుందని నిపుణులు హెచ్చరిస్తున్నారు. ఇది నిజంగా దాంపత్య బంధమేనా? కలిసి జీవించడం, కష్టసుఖాల్లో పాలుపంచుకోవడం అనే వివాహంలోని మూల సూత్రాలకు ఈ విధానం తూట్లు పొడుస్తోంది. హైదరాబాద్‌లో సాఫ్ట్‌వేర్ ఇంజనీర్‌గా పనిచేసే వ్యక్తి, బెంగళూరులో ఉద్యోగం చేస్తున్న తన భార్యను వారానికోసారి కలవడం ప్రేమను పెంచుతుందా? లేక దూరాన్ని శాశ్వతం చేస్తుందా? ఈ విధానం కేవలం ఒక లాజిస్టికల్ అడ్జస్ట్‌మెంట్‌లా కనిపిస్తోంది.
కెరీర్ ముందు కుటుంబం హుష్…
నేటి యువత తమ ఉద్యోగాల కోసం రాజీ పడటానికి సిద్ధంగా లేకపోవడమే ఈ విధానానికి కారణం. వీకెండ్ మ్యారేజ్ ఇద్దరి కెరీర్‌లను సమతుల్యం చేస్తూ, రోజువారీ కలిసి ఉండటం వల్ల వచ్చే చిన్నపాటి గొడవలను తగ్గిస్తుందని, వారాంతాల సమయం నాణ్యతగా ఉంటుందనే అభిప్రాయం ఉంది. పరిమిత సమయం కలిసి ఉండటం వల్ల బంధంలో కొత్తదనాన్ని నిలబెడుతుంది. ఇద్దరూ విడివిడిగా సంపాదించడం వల్ల ఆర్థిక ఒత్తిడి తగ్గుతుందని కొందరు భావిస్తారు. అయితే ఈ లాభాలు ఉన్నప్పటికీ, సంబంధాల దీర్ఘకాలిక కొనసాగింపుపై సందేహాలు ఉన్నాయి. రోజువారీ సాన్నిహిత్యం లేకపోవడం భావోద్వేగ దూరానికి దారితీస్తుందని హైదరాబాద్‌కు చెందిన సైకాలజిస్ట్ డాక్టర్ సుధ అభిప్రాయపడ్డారు. పిల్లలు ఉన్న జంటలకు ఈ విధానం అసాధ్యం. ఒక తల్లి లేక తండ్రి లేని వాతావరణం పిల్లల మానసిక వికాసాన్ని ప్రభావితం చేస్తుందని నిపుణులు హెచ్చరిస్తున్నారు.
హైదరాబాద్, విశాఖపట్నంలలో నయా ట్రెండ్…
హైదరాబాద్, విశాఖపట్నం, విజయవాడ వంటి నగరాల్లో ఈ ట్రెండ్ వేగంగా విస్తరిస్తోంది. ఐటీ, ఫార్మా, బ్యాంకింగ్ రంగాల్లో పనిచేసే యువ జంటలు ఈ విధానాన్ని ఎంచుకుంటున్నారు. ఒక సర్వే ప్రకారం హైదరాబాద్‌లో 25-35 ఏళ్ల వయస్సు గల జంటలలో 15% ఈ విధానాన్ని అనుసరిస్తున్నారు. విజయవాడకు చెందిన డాక్టర్ అనిత, ‘మాకు కెరీర్ ముఖ్యం. మా పెళ్లి కూడా బలంగా ఉంది. వీకెండ్‌లో కలిసే సమయం మాకు చాలు’ అని చెప్పింది. అయితే ఈ జంటలలో చాలామంది దీర్ఘకాలంలో ఈ విధానం నిలబడుతుందా అనే సందేహంతో ఉన్నారు. సోషల్ మీడియాలో ఈ అంశంపై భిన్నాభిప్రాయాలు వ్యక్తమవుతున్నాయి. స్త్రీలు కూడా తమ కెరీర్‌ను వదులుకోవాల్సిన అవసరం లేదని ఒక నెటిజన్ సమర్థించగా, పెళ్లి అంటే బాధ్యత, కలిసి జీవించడం, ఇది కేవలం సౌలభ్యం కోసం చేసే ఒప్పందం అని మరొకరు విమర్శించారు. ఈ చర్చ సామాజిక, సాంస్కృతిక విలువలను ప్రశ్నిస్తూ, వివాహ వ్యవస్థ భవిష్యత్తును ప్రశ్నార్థకం చేస్తుంది.
