ఉద్యమాలకు గ్లామర్

• సినీ, క్రీడా స్టార్లు, మేధావులు, ప్రముఖులు తోడైతే పోరాటాలు విజయవంతం
• కంచ గచ్చిబౌలి, ఢిల్లీలో రైతుల ఉద్యమం విజయవంతం వెనుక గ్లామర్
• కంచ గచ్చిబౌలి ఉద్యమానికి దియామీర్జా, రేణు దేశాయ్ వంటి ప్రముఖుల మద్దతు
• తాజాగా కంచ గచ్చిబౌలి భూములపై సుప్రీంకోర్టు ఆదేశం
• సాధారణ ఉద్యమాలు సక్సెస్ కావాలంటే అన్ని వర్గాల మద్దతు తప్పనిసరి

సహనం వందే, హైదరాబాద్:

హైదరాబాద్‌లోని కంచ గచ్చిబౌలి భూముల వివాదం దేశవ్యాప్తంగా సంచలనం సృష్టించి, ఆధునిక ఉద్యమాలకు కొత్త దిశానిర్దేశం చేసింది. హైదరాబాద్ సెంట్రల్ యూనివర్సిటీ (హెచ్‌సీయూ) సమీపంలోని 400 ఎకరాల అటవీ భూములను తెలంగాణ ప్రభుత్వం స్వాధీనం చేసుకునే ప్రయత్నం చేసినప్పుడు, విద్యార్థులు, మేధావులు, సినీ తారలు, ప్రజాసంఘాలు ఒక్కటై ఈ భూములను కాపాడారు. ఈ భూములను పునరుద్ధరించాలని బుధవారం తీర్పు ఇవ్వడంతో ఈ ఉద్యమం చారిత్రక విజయాన్ని సాధించింది.

అటవీ సంపద కోసం విద్యార్థుల ఉద్యమం…

కంచ గచ్చిబౌలిలోని 400 ఎకరాల భూమి అటవీ సంపదతో సమృద్ధిగా ఉంది. ఈ భూములలో జింకలు, నెమళ్లు, అడవి పందులు, ఊసరవెల్లులు, వివిధ పక్షి జాతులతోపాటు 455 జాతుల వృక్షజాతులు ఉన్నట్లు 2008-09లో హెచ్‌సీయూ, డబ్ల్యూ డబ్ల్యూఎఫ్-ఇండియా సంయుక్త అధ్యయనం వెల్లడించింది. ఈ భూములు తమవేనని, వీటిని సంరక్షించాలని హెచ్‌సీయూ విద్యార్థులు గట్టిగా వాదించారు. తెలంగాణ ప్రభుత్వం ఈ భూములను తన ఆధీనంలోకి తీసుకునేందుకు బుల్డోజర్లను రంగంలోకి దింపడంతో విద్యార్థులు ఆందోళనలకు దిగారు. వారిపై పోలీసు కేసులు నమోదై, కొందరిని అరెస్టు చేసినా విద్యార్థులు వెనక్కి తగ్గలేదు. విద్యార్థుల ఈ పోరాటం కేవలం వారితోనే ఆగలేదు. బీఆర్‌ఎస్, బీజేపీ, సీపీఐ సీపీఎం వంటి వామపక్ష ప్రతిపక్ష పార్టీలు, వివిధ ప్రజాసంఘాలు వారికి మద్దతుగా నిలిచాయి. సోషల్ మీడియాలో #SaveKanchaGachibowli హ్యాష్‌ట్యాగ్‌తో పెద్ద ఎత్తున ప్రచారం నడిచింది.

సినీ తారలు, మేధావుల సంఘీభావం…

సినీ తారలు, క్రీడాకారులు, మేధావుల సంఘీభావంతో ఈ ఉద్యమానికి గ్లామర్ తోడైంది. పలువురు ప్రముఖ తెలుగు సినీ నటులు, దర్శకులు ఈ భూములను కాపాడాలని సోషల్ మీడియా ద్వారా పిలుపునిచ్చారు. సమంత రూత్ ప్రభు, దియా మీర్జా, రిచా చద్దా, ప్రకాష్ రాజ్, ధృవ్ రాఠీ, రేణు దేశాయ్ సహా పర్యావరణవేత్తలు, రచయితలు ఈ ఉద్యమాన్ని బలపరిచే వ్యాసాలు, బహిరంగ లేఖలు రాశారు. సినీ నటుడు, జనసేన అధినేత పవన్ కల్యాణ్ కూడా స్పందించి అటవీ సంపద సంరక్షణకు ప్రభుత్వాలు కట్టుబడి ఉండాలని కోరారు. ఈ గ్లామర్, మేధో శక్తి కలసి ఉద్యమాన్ని దేశవ్యాప్తంగా చర్చనీయాంశంగా మార్చింది.

కంచ గచ్చిబౌలి పునరుద్ధరణకు సుప్రీం ఆదేశం

సుప్రీంకోర్టు ఈ కేసును స్వయంగా స్వీకరించి, అటవీ నిర్మూలన కార్యకలాపాలను తక్షణం నిలిపివేయాలని ఆదేశించింది. కంచ గచ్చిబౌలిలోని 400 ఎకరాల అటవీ భూమిని పునరుద్ధరించాలని, అక్కడి వన్యప్రాణుల రక్షణకు తెలంగాణ చీఫ్ వైల్డ్‌లైఫ్ వార్డెన్ చర్యలు తీసుకోవాలని స్పష్టం చేసింది. ఈ భూమిలో 100 ఎకరాల్లో భారీగా చెట్లు నరికివేయడం, బుల్డోజర్లతో వన్యప్రాణుల ఆవాసాలను ధ్వంసం చేయడంపై కోర్టు తీవ్ర ఆగ్రహం వ్యక్తం చేసింది. జింకలు, నెమళ్లు, ఇతర వన్యప్రాణులు ఆవాసం కోల్పోయి, కొన్ని జంతువులు మరణించినట్లు నివేదికలు వెల్లడించాయి. సుప్రీంకోర్టు నియమించిన సెంట్రల్ ఎంపవర్డ్ కమిటీ (సీఈసీ) ఈ భూమిని సందర్శించి, రాష్ట్ర ప్రభుత్వం చట్టవిరుద్ధంగా చెట్లు నరికివేయడం, పర్యావరణ నిబంధనల ఉల్లంఘనలను గుర్తించింది. అంతేకాక, ఈ భూమిని ప్రైవేటు సంస్థకు తాకట్టు పెట్టడంలో రూ. 10,000 కోట్ల ఆర్థిక కుంభకోణం జరిగినట్లు సీఈసీ నివేదికలో పేర్కొంది. తెలంగాణ చీఫ్ సెక్రటరీని వ్యక్తిగతంగా బాధ్యులను చేస్తూ, రాష్ట్రం పర్యావరణ హాని కోసం పునరుద్ధరణ ప్రణాళికను సమర్పించాలని కోర్టు ఆదేశించింది. ఈ కేసు విచారణను మే 15కి వాయిదా వేసిన కోర్టు, అప్పటివరకు సీఈసీ నివేదికపై సమాధానం సమర్పించాలని రాష్ట్ర ప్రభుత్వాన్ని ఆదేశించింది.

రైతు చట్టాల ఉద్యమంతో పోలిక…

కంచ గచ్చిబౌలి ఉద్యమం 2020-21లో ఢిల్లీలో రైతు చట్టాలకు వ్యతిరేకంగా జరిగిన ఉద్యమాన్ని గుర్తు చేస్తుంది. రైతుల ఉద్యమానికి సినీ తారలు, క్రీడాకారులు, అంతర్జాతీయ మేధావులు మద్దతు పలికారు. సోషల్ మీడియా ప్రచారం, బహిరంగ సభల ద్వారా ఆ ఉద్యమం ప్రపంచ దృష్టిని ఆకర్షించి, చట్టాల రద్దుకు దారితీసింది. కంచ గచ్చిబౌలి ఉద్యమం కూడా సినీ గ్లామర్, మేధో శక్తి, విద్యార్థుల ఉత్సాహంతో విజయం సాధించింది. ఈ రెండు ఉద్యమాలూ ఆధునిక సమాజంలో ప్రజా ఉద్యమాలకు సెలబ్రిటీలు, మేధావుల పాత్ర ఎంత కీలకమో తెలియజేస్తున్నాయి.

ఆధునిక ఉద్యమాలకు కొత్త దిశ…

కంచ గచ్చిబౌలి ఉద్యమం ఒక విషయాన్ని స్పష్టం చేసింది. ఆధునిక సమాజంలో ఉద్యమాలు విజయవంతం కావాలంటే, పీడిత వర్గాలతో పాటు సమాజంలో గుర్తింపు ఉన్న వ్యక్తుల మద్దతు అవసరం. సినిమా, క్రీడా, మేధో రంగాల నుంచి వచ్చే గ్లామర్ ఉద్యమాలకు జనాదరణను, బలాన్ని జోడిస్తుంది. సోషల్ మీడియా ఈ ప్రచారాన్ని మరింత వేగవంతం చేస్తుంది.