- ఫుడ్ పాయిజన్ జరిగి విషాదం
- ఒకరు మృతి… 70 మందికి అస్వస్థత
- పర్యవేక్షణ లేని అధికార యంత్రాంగం
సహనం వందే, హైదరాబాద్:
హైదరాబాద్‌లోని ఎర్రగడ్డ మానసిక వైద్యశాలలో తెలంగాణ రాష్ట్ర ఆవిర్భావ దినోత్సవ వేడుకల సందర్భంగా ఒక ఘోర విషాదానికి దారితీసింది. ఈ ఘటనలో ఫుడ్ పాయిజన్ కారణంగా ఒక మానసిక రోగి ప్రాణాలు కోల్పోగా, 70 మందికి పైగా రోగులు తీవ్ర అస్వస్థతకు గురయ్యారు. ఈ సంఘటన ఆసుపత్రి యంత్రాంగంపై తీవ్ర విమర్శలకు దారితీసింది.
ఒకరు మృతి…
తెలంగాణ రాష్ట్ర ఆవిర్భావ దినోత్సవం సందర్భంగా ఎర్రగడ్డ మానసిక వైద్యశాలలో సోమవారం ఈ దుర్ఘటన చోటు చేసుకుంది. ఆసుపత్రిలో చికిత్స పొందుతున్న రోగుల కోసం ఏర్పాటు చేసిన భోజనంలో అనుమానాస్పద ఆహారం అందించినట్లు తెలుస్తోంది. ఈ ఆహారం తీసుకున్న కొద్ది గంటల్లోనే రోగులు వాంతులు, విరోచనాలు, తీవ్రమైన కడుపు నొప్పితో బాధపడ్డారు. ఈ ఘటనలో కరణ్ (30) అనే రోగి కార్డియాక్ అరెస్ట్‌తో మరణించాడు, మిగిలిన 70 మందికి పైగా రోగులు అస్వస్థతకు గురయ్యారు.
కలెక్టర్ సందర్శన… దర్యాప్తు ఆరంభం
ఈ ఘటనపై సమాచారం అందుకున్న వెంటనే హైదరాబాద్ జిల్లా కలెక్టర్ అనుదీప్ దిశెట్టి ఆసుపత్రిని సందర్శించి పరిస్థితిని సమీక్షించారు. ఆసుపత్రి యాజమాన్యంతో సమావేశమై ఫుడ్ పాయిజన్‌కు గల కారణాలను గుర్తించేందుకు తక్షణ చర్యలు తీసుకోవాలని ఆదేశించారు. ఈ ఘటనపై పోలీసులు కూడా దర్యాప్తు ప్రారంభించారు. ఆహారం సరఫరా చేసిన క్యాటరింగ్ సంస్థ, ఆహార నాణ్యత, శుభ్రత ప్రమాణాలను పరిశీలిస్తున్నారు. కలెక్టర్ అనుదీప్ ఈ సంఘటనపై పూర్తి వివరాలను వెల్లడిస్తూ, బాధితులకు సత్వర వైద్య సాయం అందించాలని ఆసుపత్రి సిబ్బందికి సూచించారు.
మంత్రి దామోదర్ ఆరా…
తెలంగాణ వైద్య ఆరోగ్యశాఖ మంత్రి దామోదర్ రాజనర్సింహ ఈ ఘటనపై తీవ్ర ఆందోళన వ్యక్తం చేస్తూ, దర్యాప్తును వేగవంతం చేయాలని అధికారులను ఆదేశించారు. ఆసుపత్రిలో ఆహార సరఫరా వ్యవస్థలో లోపాలను గుర్తించడంతో పాటు, భవిష్యత్తులో ఇటువంటి ఘటనలు పునరావృతం కాకుండా కఠిన చర్యలు తీసుకోవాలని సూచించారు. మంత్రి స్వయంగా ఈ ఘటనపై ఆరా తీసి బాధితులకు మెరుగైన చికిత్స అందించేలా చర్యలు చేపట్టారు.
