- వైట్ హౌస్ లో ఉన్నది 14 రోజులే
- ఆమె ఎక్కడున్నారు? ఏం చేస్తున్నారు?
- న్యూయార్క్, ఫ్లోరిడాలలో విహారం!
- వ్యక్తిగత స్వేచ్ఛకు ప్రాధాన్యం ఇస్తున్నారు
సహనం వందే, వాషింగ్టన్:
అమెరికా ప్రథమ మహిళ మెలానియా ట్రంప్… ఈ పేరు వినగానే ఒక మిస్టరీలా అనిపిస్తోంది. ఆమె ఎక్కడున్నారు? ఏం చేస్తున్నారు? వైట్‌హౌస్‌లో ఆమె ఎందుకు కనిపించడం లేదు? ఈ ప్రశ్నలు ఇప్పుడు అమెరికా రాజకీయ వర్గాల్లో హాట్ టాపిక్‌గా మారాయి. జనవరిలో డొనాల్డ్ ట్రంప్ రెండోసారి అధ్యక్షుడిగా ప్రమాణ స్వీకారం చేసిన తర్వాత, గత 108 రోజుల్లో మెలానియా వైట్‌హౌస్‌లో కేవలం 14 రోజులు మాత్రమే ఉన్నారని సమాచారం. ఆమె ఎప్పుడు, ఎంతసేపు ఉన్నారనే వివరాలను వెల్లడించడానికి మాత్రం అధికారులు నిరాకరిస్తున్నారు. ఈ విషయం వైట్‌హౌస్‌లో అత్యంత సున్నితమైన అంశంగా మారింది.
న్యూయార్క్… ఫ్లోరిడాలలో విహారం!
న్యూయార్క్ టైమ్స్ కథనం ప్రకారం మెలానియా ఎక్కువగా న్యూయార్క్‌లోని ట్రంప్ టవర్ లేదా ఫ్లోరిడాలోని మార్-ఎ-లాగో ఎస్టేట్‌లో ఉంటున్నారు. అధికారిక కార్యక్రమాల్లో కూడా ఆమె భాగస్వామ్యం చాలా తక్కువగా ఉంటోంది. గురువారం వాషింగ్టన్‌లో మాజీ ప్రథమ మహిళ బార్బరా బుష్‌కు తపాలా బిళ్లను ఆవిష్కరించడానికి, సైనిక తల్లుల కోసం ఒక కార్యక్రమంలో పాల్గొనడానికి మాత్రమే వచ్చారు. కానీ ఈ ఏడాది వైట్‌హౌస్‌లో ఆమె గడిపిన సమయం 14 రోజులు కూడా లేదని ఆమె షెడ్యూల్ తెలిసిన ఇద్దరు వ్యక్తులు తెలిపారు.
చరిత్రలో అరుదైన పోలిక!
ఒహాయో విశ్వవిద్యాలయంలో చరిత్రకారుడైన కేథరీన్ జెల్లిసన్ మాట్లాడుతూ, మెలానియా లాంటి తక్కువ ప్రొఫైల్ ఉన్న ప్రథమ మహిళను దాదాపు 80 సంవత్సరాల క్రితం బెస్ ట్రూమన్ తర్వాత చూడలేదని అన్నారు. బెస్ ట్రూమన్ కూడా తన స్వస్థలమైన మిస్సోరీలోని తిరిగి వెళ్లేవారని, మెలానియా కూడా తన వ్యక్తిగత జీవితాన్ని ఇష్టపడుతున్నారని జెల్లిసన్ పేర్కొన్నారు.
ఈస్ట్ వింగ్‌లో నిశ్శబ్దం!
మెలానియా తన కోసం ఈస్ట్ వింగ్‌లో సిబ్బందిని నియమించుకున్నప్పటికీ, ఆమె కార్యాలయంలో అరుదుగా కనిపిస్తారు. మార్-ఎ-లాగోలో కూడా ఆమె తక్కువగా కనిపిస్తారని అక్కడి నివాసులు చెబుతున్నారు. ఆమె ప్రైవేట్ జీవితాన్ని ఎక్కువగా ఇష్టపడుతున్నారని, అధికారిక బాధ్యతల కంటే వ్యక్తిగత స్వేచ్ఛకు ప్రాధాన్యం ఇస్తున్నారని విశ్లేషకులు అభిప్రాయపడుతున్నారు.
