- పాక్ హైకమిషన్‌కు కేక్ పట్టుకెళ్లిన వ్యక్తి
- 26 మంది ప్రాణాలు పోతే సంబరాలా?
- దేశవ్యాప్తంగా భగ్గుమంటున్న జనం
సహనం వందే, ఢిల్లీ:
జమ్మూ కాశ్మీర్‌లోని పహల్గామ్‌లో జరిగిన దారుణమైన ఉగ్రదాడి దేశవ్యాప్తంగా ఆగ్రహావేశాలు నింపుతుంటే… ఢిల్లీలోని పాకిస్తాన్ హైకమిషన్‌కు ఓ వ్యక్తి కేక్ పట్టుకెళ్లిన అత్యంత హేయమైన ఘటన సంచలనం రేపింది. 26 మంది పర్యాటకుల ప్రాణాలు పోగొట్టుకున్న విషాద సమయంలో ఇలాంటి చర్యకు పాల్పడటం దేశ ప్రజల మనోభావాలను తీవ్రంగా గాయపరిచింది. ఈ వీడియో సోషల్ మీడియాలో వైరల్ కావడంతో దేశవ్యాప్తంగా ప్రజలు మండిపడుతున్నారు.
నెత్తుటి మరకలు ఆరకముందే సంబరాలా?
ఏప్రిల్ 22న బైసరన్ వ్యాలీలో లష్కర్-ఏ-తొయిబాతో సంబంధం ఉన్న టీఆర్‌ఎఫ్ ఉగ్రవాదులు జరిపిన దాడిలో 26 మంది అమాయక పర్యాటకులు ప్రాణాలు కోల్పోయారు. 17 మంది తీవ్రంగా గాయపడ్డారు. ఈ దుర్ఘటనతో భారత్, పాకిస్తాన్ మధ్య ఉద్రిక్తతలు మరింత ముదిరాయి. ఇలాంటి పరిస్థితుల్లో ఢిల్లీలోని పాకిస్తాన్ హైకమిషన్‌కు ఓ వ్యక్తి కేక్ తీసుకెళ్లడం ఏమి సంకేతాలిస్తోంది? ఇది అమరవీరుల త్యాగాన్ని అవమానించడమే కాకుండా, ఉగ్రవాదులకు వత్తాసు పలికే చర్యగా దేశ ప్రజలు భావిస్తున్నారు.
నోరు మెదపకుండా లోపలికి…
వీడియోలో ఆ వ్యక్తి మీడియా అడిగిన ప్రశ్నలకు ఏమాత్రం సమాధానం చెప్పకుండా హడావుడిగా హైకమిషన్‌లోకి వెళ్ళిపోయాడు. దీంతో అతడి ఉద్దేశం ఏంటనే దానిపై తీవ్రమైన ఊహాగానాలు మొదలయ్యాయి. కొందరు ఇది పహల్గామ్ దాడిని సంబరాలు చేసుకునే ప్రయత్నంగా అభివర్ణిస్తున్నారు. మరికొందరు మాత్రం రాజకీయ దురుద్దేశంతో ఈ ఘటనను వాడుకుంటున్నారని వాదిస్తున్నారు. ఏది ఏమైనా, ఈ సమయంలో ఇలాంటి చర్యకు పాల్పడటం క్షమించరానిదని ప్రజలు ఆగ్రహం వ్యక్తం చేస్తున్నారు.
పాక్ హైకమిషన్ వద్ద నిరసనలు!
ఈ వీడియో ట్విట్టర్లో క్షణాల్లో వైరల్‌గా మారింది. దేశం శోకసంద్రంలో మునిగి ఉంటే, పాకిస్తాన్ హైకమిషన్‌లో సంబరాలు చేసుకోవడం సిగ్గుచేటని నెటిజన్లు తీవ్రంగా ఖండిస్తున్నారు. ఈ ఘటనపై ఢిల్లీలోని పాకిస్తాన్ హైకమిషన్ వద్ద నిరసనలు కూడా వెల్లువెత్తాయి. ఈ చర్యకు పాల్పడిన వ్యక్తిని గుర్తించి కఠినంగా శిక్షించాలని ప్రజలు డిమాండ్ చేస్తున్నారు. దేశ వ్యతిరేక చర్యలకు పాల్పడే వారి పట్ల కఠినంగా వ్యవహరించాలని ప్రభుత్వానికి విజ్ఞప్తి చేస్తున్నారు.
