- రూపాయి నోట్లపై అంబేద్కర్ బొమ్మ లేకపోవడం కుట్ర
- ఆర్బీఐ ఏర్పాటులో కీలక పాత్రధారిని విస్మరించడం దారుణం
- అంబేద్కర్ రాజ్యాంగ నిర్మాతే కాదు… గొప్ప ఆర్థికవేత్త కూడా
- కుల నిర్మూలన కోసం బాబాసాహెబ్ చేసిన పోరాటం మరువలేనిది
- పాఠ్యాంశాల్లో భీమ్ రావు రచనలు చేర్చితేనే నిజమైన గౌరవం
(విజయ్ పుట్టపాగ, టీపీటీఎల్ఎఫ్ రాష్ట్ర ఉపాధ్యక్షులు)
డాక్టర్ బి.ఆర్. అంబేద్కర్ లాంటి మహనీయుడి చిత్రం మన కరెన్సీ నోట్లపై లేకపోవడం కేవలం పొరపాటు కాదు, ఆధిపత్య వర్గాల కుట్ర. భారత రాజ్యాంగ శిల్పి, రిజర్వ్ బ్యాంక్ ఏర్పాటులో కీలక సూత్రధారి, కుల నిర్మూలన యోధుడైన అంబేద్కర్‌ను గౌరవించకపోవడం సమాజంలో ఇప్పటికీ కొనసాగుతున్న వివక్షను సూచిస్తుంది. మహాత్మా గాంధీ జాతిపిత కాగా… అంబేద్కర్ రాజ్యాంగాన్ని రచించిన యోధుడు. దేశంలో అధిక సంఖ్యాకులైన బడుగు బలహీన వర్గాలకు ఆయన ఆరాధ్య దైవం. కాబట్టి గాంధీతోపాటు అంబేద్కర్ చిత్రాలు కరెన్సీ నోట్లపై ఉండాలి.
ఆర్బీఐ ఏర్పాటులో అంబేద్కర్ మేధోసంపత్తి…
అంబేద్కర్ కేవలం రాజ్యాంగ నిర్మాతే కాదు, ఆర్థికవేత్తగా కూడా అసాధారణ జ్ఞానం కలిగిన వ్యక్తి. ఆయన రచించిన ‘ది ప్రాబ్లమ్ ఆఫ్ ది రూపీ – ఇట్స్ ఆరిజిన్ అండ్ ఇట్స్ సొల్యూషన్’ గ్రంథం రిజర్వ్ బ్యాంక్ ఆఫ్ ఇండియా (ఆర్బీఐ) ఏర్పాటుకు బలమైన పునాది వేసింది. 1934లో ఆర్బీఐ చట్టం రూపొందడంలో ఆయన సూచనలు కీలక పాత్ర పోషించాయి. దేశ ఆర్థిక వ్యవస్థకు దిశానిర్దేశం చేసిన అంబేద్కర్ చిత్రం నోట్లపై లేకపోవడం శోచనీయం.
రాజ్యాంగ శిల్పి, సంఘ సంస్కర్త…
అంబేద్కర్ భారత రాజ్యాంగ రచనలో కీలక పాత్ర పోషించారు. స్వతంత్ర భారతదేశ తొలి న్యాయశాఖ మంత్రిగా, రాజ్యాంగ సభ ఛైర్మన్‌గా సమానత్వం, స్వేచ్ఛ, న్యాయం, సౌభ్రాతృత్వాలపై ఆధారిత రాజ్యాంగాన్ని రూపొందించారు. న్యాయశాస్త్రం, ఆర్థిక శాస్త్రంలో ప్రపంచ స్థాయి విద్వాంసుడిగా కొలంబియా విశ్వవిద్యాలయం, లండన్ స్కూల్ ఆఫ్ ఎకనామిక్స్‌లో డాక్టరేట్‌లు సాధించారు. కుల వివక్ష, అంటరానితనం వంటి అన్యాయాలను ఎదిరించి, విద్యాధికుడిగా ఎదిగిన ఆయన జీవితం స్ఫూర్తిదాయకం.
కుల నిర్మూలనకు అవిశ్రాంత పోరాటం…
1891లో మహర్ కులంలో జన్మించిన అంబేద్కర్ బాల్యంలోనే కుల వివక్షను అనుభవించారు. అయినా, సమాజంలో సమానత్వం కోసం జీవితాంతం పోరాడారు. 1935లో కుల నిర్మూలన రచన ద్వారా కుల వ్యవస్థను విమర్శించి, నిర్మూలనకు మార్గం చూపారు. 1927లో మహాద్ సత్యాగ్రహం, 1930లో కలారాం ఆలయ ప్రవేశ ఉద్యమం, 1932లో పూనా ఒప్పందం ద్వారా దళితుల హక్కులను సాధించారు. మూక్ నాయక్ పత్రిక, ఇండిపెండెంట్ లేబర్ పార్టీ, షెడ్యూల్డ్ కాస్ట్స్ ఫెడరేషన్ వంటి సంస్థలు ఆయన సామాజిక ఉద్యమాలకు బలం చేకూర్చాయి.
భారతరత్న ఆలస్యం…
అంబేద్కర్‌కు భారతరత్న ఇవ్వడానికి 34 ఏళ్లు (1956-1990) ఎందుకు పట్టింది? ఇది ఆధిపత్య వర్గాల వివక్షాపూరిత ధోరణిని సూచిస్తుంది. ఆయన రచనలు, ప్రసంగాలు సమాజంలో విస్తృతంగా చర్చించకపోవడం వెనుక కుల వ్యవస్థను కాపాడాలనే ఉద్దేశం కనిపిస్తుంది. 1956లో లక్షలాది మందితో బౌద్ధమతాన్ని స్వీకరించి, కుల వ్యవస్థకు వ్యతిరేకంగా సామాజిక విప్లవానికి నాంది పలికిన అంబేద్కర్ ఆశయాలు ఇప్పటికీ నెరవేరలేదు.
పాఠ్యాంశాల్లో అంబేద్కర్ రచనలు తప్పనిసరి…
అంబేద్కర్ రచనలైన కుల నిర్మూలన, ది బుద్ధ అండ్ హిస్ ధమ్మ వంటివి పాఠ్యాంశాల్లో చేర్చడం ద్వారా కుల వ్యవస్థపై చైతన్యం పెంచవచ్చు. పాఠశాల నుంచి ఉన్నత విద్య వరకు ఆయన ఆలోచనలను చేర్చితే, సమాజంలో సమానత్వం, న్యాయం స్థాపన సాధ్యమవుతుంది. ఇది అంబేద్కర్ ఆశయాలను నెరవేర్చడమే కాదు, దేశం ఆయన రుణం తీర్చుకునే మార్గం.
