- షేక్ హసీనా పార్టీపై నిషేధం!
- అవామీ లీగ్‌పై ప్రభుత్వం ఉక్కుపాదం!
- చాత్రా లీగ్‌పై ఉగ్రవాద ముద్ర…
సహనం వందే, ఢాకా:
బంగ్లాదేశ్ రాజకీయాల్లో పెను సంచలనం! తాత్కాలిక ప్రభుత్వం మాజీ ప్రధాని షేక్ హసీనా నేతృత్వంలోని అవామీ లీగ్ పార్టీపై ఉక్కుపాదం మోపింది. పార్టీ కార్యకలాపాలపై పూర్తి నిషేధం విధిస్తూ సంచలన నిర్ణయం తీసుకుంది. ఉగ్రవాద నిరోధక చట్టం కింద ఈ నిషేధం అమల్లోకి వస్తుందని ప్రభుత్వం ప్రకటించింది. ఈ నిర్ణయంతో బంగ్లాదేశ్ రాజకీయాలు ఒక్కసారిగా వేడెక్కాయి.
చాత్రా లీగ్‌పై ఉగ్రవాద ముద్ర…
అవామీ లీగ్ విద్యార్థి విభాగమైన చాత్రా లీగ్‌ను గతంలోనే ఉగ్రవాద సంస్థగా ప్రకటించిన తాత్కాలిక ప్రభుత్వం, ఇప్పుడు ప్రధాన పార్టీపై కూడా అదే చట్టం కింద నిషేధం విధించింది. షేక్ హసీనా, ఆమె పార్టీ నాయకులపై పలు చట్టపరమైన కేసులు పూర్తయ్యే వరకు ఈ నిషేధం కొనసాగుతుందని ప్రభుత్వం స్పష్టం చేసింది. రాబోయే ఎన్నికల్లో అవామీ లీగ్ పాల్గొనకుండా అడ్డుకునేందుకే ఈ చర్య తీసుకున్నారని రాజకీయ విశ్లేషకులు భావిస్తున్నారు.
ఇస్లామిక్ సంస్థల ఒత్తిడితోనే ఈ నిర్ణయం!
గత ఏడాది షేక్ హసీనా ప్రభుత్వం కూలిపోయిన తర్వాత బంగ్లాదేశ్‌లో రాజకీయ అనిశ్చితి నెలకొంది. ఈ నేపథ్యంలో విద్యార్థులు, ఇస్లామిక్ సంస్థల ఒత్తిడితోనే తాత్కాలిక ప్రభుత్వం ఈ సంచలన నిర్ణయం తీసుకున్నట్లు తెలుస్తోంది. ఈ నిషేధం కేవలం అవామీ లీగ్ ప్రధాన సంస్థకే కాకుండా, దాని విద్యార్థి విభాగమైన చాత్రా లీగ్‌పై కూడా వర్తిస్తుంది.
అవామీ లీగ్ ఆగ్రహం…
తాత్కాలిక ప్రభుత్వం తీసుకున్న ఈ నిర్ణయంపై అవామీ లీగ్ నాయకులు తీవ్ర ఆగ్రహం వ్యక్తం చేస్తున్నారు. ఈ చర్యను రాజకీయ ప్రతీకారంగా అభివర్ణిస్తూ, పార్టీ నాయకులు బహిరంగంగా ఖండిస్తున్నారు. ఈ నిషేధం దేశంలో రాజకీయ స్థిరత్వాన్ని మరింత దిగజార్చవచ్చని కొందరు విశ్లేషకులు హెచ్చరిస్తున్నారు. మరికొందరు దీనిని తాత్కాలిక ప్రభుత్వం రాజకీయ ప్రత్యర్థులను అణచివేసే ప్రయత్నంగా చూస్తున్నారు. ఈ నేపథ్యంలో అంతర్జాతీయ సమాజం కూడా బంగ్లాదేశ్‌లోని రాజకీయ పరిణామాలను నిశితంగా గమనిస్తోంది.
