ఫ్యాషన్ రంగంలో ‘ఓలో’ విప్లవం

• కొత్త కలర్ కనుగొన్న అమెరికన్ శాస్త్రవేత్తలు
• మానవులు చూడని వింత రంగు ఆవిష్కరణ
• ఇంద్రధనస్సులో ఇకపై ఎనిమిది రంగులా?

సహనం వందే, హైదరాబాద్:

శాస్త్ర ప్రపంచంలో ఒక అద్భుతం ఆవిష్కృతమైంది. అమెరికా శాస్త్రవేత్తల బృందం మానవులు ఇప్పటివరకు చూడని ఒక సరికొత్త రంగును కనుగొనడం సంచలనం సృష్టిస్తుంది. ఈ అద్భుతమైన ఆవిష్కరణ శాస్త్రీయ పరిశోధనల్లో ఒక గొప్ప మలుపుగా నిలుస్తుందని సైంటిస్టులు భావిస్తున్నారు. మనకు తెలిసిన ఏడు రంగులతో పాటు, ఈ కొత్త రంగు చేరడంతో రంగుల ప్రపంచం మరింత విస్తృతం కానుంది. ఇది శాస్త్ర, సాంకేతిక, కళా రంగాలలో విప్లవాత్మక మార్పులకు నాంది పలుకుతుందని ఆశాభావం వ్యక్తం చేస్తున్నారు.

నీలం, ఆకుపచ్చల సమ్మేళనం… ‘ఓలో’

ఈ నూతన రంగుకు శాస్త్రవేత్తలు “ఓలో” అని నామకరణం చేశారు. ఇది ముదురు నీలం-ఆకుపచ్చ రంగుల కలయికగా ఉంటుందని వారు అభివర్ణించారు. అయితే, కొందరు శాస్త్రవేత్తలు ఈ రంగు నిజంగా కొత్తదేనా లేక ఇప్పటికే ఉన్న రంగుల మిశ్రమమా అనే సందేహాలను వ్యక్తం చేస్తున్నారు. ఈ రంగును రూపొందించడానికి శాస్త్రవేత్తలు అత్యాధునిక సాంకేతిక పరిజ్ఞానాన్ని ఉపయోగించారు. మానవ కంటికి కనిపించని కాంతి తరంగదైర్ఘ్యాలను గ్రహించగల ప్రత్యేక పరికరాల ద్వారా ఇది సాధ్యమైంది. ఇప్పటివరకు మనం ఇంద్రధనస్సులో ఏడు రంగులను చూశాం. ఈ కొత్త రంగుతో కలిపి మొత్తం రంగుల సంఖ్య ఎనిమిదికి చేరుతుంది. మరి ఇంద్రధనస్సులో ఈ ఎనిమిదో రంగు ఉంటుందా లేదా అనే విషయంపై శాస్త్రవేత్తలు మరింత పరిశోధన చేయాల్సి ఉంది.

డిజైన్, ఫ్యాషన్, కళా రంగాలలో విప్లవం…

ఈ పరిశోధనలో భాగంగా “ఓలో” రంగును చూపించడానికి ప్రత్యేకమైన పరికరాలను ఉపయోగించారు. ఈ పరికరాలు సాధారణ మానవ దృష్టి పరిధిని దాటిన కాంతి తరంగాలను కూడా ప్రదర్శించగలవు. ఈ ఆవిష్కరణ కళ, డిజైన్, ఫ్యాషన్, సాంకేతిక రంగాలలో విప్లవాత్మక మార్పులకు నాంది పలుకుతుందని శాస్త్రవేత్తలు ఆశాభావం వ్యక్తం చేస్తున్నారు.

అందుబాటులోకి ఎప్పుడొస్తుందంటే?

ఈ కొత్త రంగు గురించి ప్రజలకు అవగాహన కల్పించడానికి, పరిశోధకులు దాని ప్రత్యేకతలు, దానిని సృష్టించిన విధానాన్ని వివరించే ఒక ప్రదర్శనను ఏర్పాటు చేశారు. అయితే ఈ ఆవిష్కరణ సాధారణ ప్రజలకు ఎప్పుడు అందుబాటులోకి వస్తుందనే విషయంపై ఇంకా స్పష్టత రాలేదు. కానీ ఈ పరిశోధన శాస్త్రీయ వర్గాల్లో మాత్రం విశేషమైన ఆసక్తిని రేకెత్తించింది