- మేలో తెరుచుకోనున్న ఆలయాల తలుపులు
- 2, 4వ తేదీల నుంచి భక్తుల రాకకు ఆహ్వానం
సహనం వందే, హైదరాబాద్:
ఉత్తరాఖండ్‌లోని ప్రఖ్యాత పుణ్యక్షేత్రాలైన కేదార్‌నాథ్, బద్రీనాథ్ ధామ్‌లు త్వరలో భక్తుల కోసం తమ తలుపులు తెరుచుకోనున్నాయి. బద్రీనాథ్-కేదార్‌నాథ్ టెంపుల్ కమిటీ ఈ విషయాన్ని అధికారికంగా ప్రకటించింది. కమిటీ తెలిపిన వివరాల ప్రకారం, కేదార్‌నాథ్ ధామ్ వచ్చే నెల 2వ తేదీన ఉదయం 7 గంటలకు భక్తుల దర్శనార్థం తిరిగి తెరుస్తారు. అలాగే బద్రీనాథ్ ధామ్ 4న ఉదయం 7 గంటలకు భక్తులకు స్వాగతం పలుకుతుంది. ప్రతి సంవత్సరం శీతాకాలంలో భారీగా మంచు కురవడం వల్ల ఈ ఆలయాలను మూసివేస్తారు. వేసవి ప్రారంభంతోనే మళ్లీ యాత్రికుల కోసం తెరుస్తారు.
చార్ ధామ్ యాత్రలో ముఖ్యమైన క్షేత్రాలు…
కేదార్‌నాథ్ ధామ్ శివునికి అంకితమైన అత్యంత పవిత్రమైన ప్రదేశం. బద్రీనాథ్ ధామ్ విష్ణుమూర్తి కొలువైన దివ్య క్షేత్రం. ఈ రెండు ఆలయాలు ఉత్తరాఖండ్‌లోని చార్ ధామ్ యాత్రలో ప్రధానమైనవి. దేశం నలుమూలల నుండి లక్షలాది మంది భక్తులు ఈ క్షేత్రాలను సందర్శిస్తారు. కమిటీ అధ్యక్షుడు అజేంద్ర అజయ్ మాట్లాడుతూ ఆలయాలను తెరవడానికి అన్ని ఏర్పాట్లు పూర్తి చేస్తున్నామని తెలిపారు. భక్తులకు ఎలాంటి ఇబ్బంది లేకుండా దర్శనం చేసుకునేందుకు అవసరమైన సౌకర్యాలను ఏర్పాటు చేస్తున్నామని ఆయన భరోసా ఇచ్చారు. భక్తులు ఈ తేదీలను గుర్తుంచుకుని, తమ యాత్రకు ప్రణాళిక చేసుకోవాలని ఆయన సూచించారు
