- రేవంత్ రెడ్డికి అధిష్టానం మోకాలడ్డు
- ఇష్టమైన వారికి ప్రయత్నించి భంగపాటు
- ఏడాదిన్నర అవుతున్నా విస్తరణలో జాప్యం
సహనం వందే, హైదరాబాద్:
తెలంగాణ రాజకీయాల్లో ఇటీవల కాలంలో హాట్ టాపిక్‌గా మారిన మంత్రివర్గ విస్తరణ వ్యవహారం ప్రస్తుతానికి నిలిచినట్లే కనిపిస్తోంది. ముఖ్యమంత్రి రేవంత్ రెడ్డి తన కేబినెట్‌ను విస్తరించేందుకు సన్నాహాలు చేస్తున్న సమయంలో అనూహ్య పరిణామాలు చోటుచేసుకుంటున్నాయి. పార్టీలోని సీనియర్ నాయకులు, అధిష్ఠానం నుంచి వస్తున్న ఒత్తిడి కారణంగా ఈ ప్రక్రియ ఆలస్యమవుతోందని విశ్వసనీయ వర్గాలు తెలిపాయి. ఈ నేపథ్యంలో రాష్ట్ర రాజకీయాల్లో ఉత్కంఠ నెలకొంది.
రేవంత్ నిర్ణయాలకు పెద్దల అడ్డుకట్ట…
రేవంత్ రెడ్డి సొంత నిర్ణయాలతో ముందుకు సాగుతున్న తీరు పార్టీలోని కొందరు సీనియర్ నాయకులకు రుచించడం లేదని సమాచారం. ఆయన దూకుడు వ్యవహార శైలికి కళ్లెం వేసేందుకు అధిష్ఠానం నుంచి ఒత్తిడి పెరుగుతోందని రాజకీయ వర్గాలు పేర్కొంటున్నాయి. ముఖ్యంగా రేవంత్ తన వద్ద ఉన్న కీలక శాఖలను వదులుకోవడానికి ఇష్టపడకపోవడం, స్వతంత్రంగా నిర్ణయాలు తీసుకోవడం వంటి అంశాలు పెద్దలకు కంటగింపుగా మారాయని తెలుస్తోంది. ఈ కారణంగానే మంత్రివర్గ విస్తరణ ప్రక్రియను వాయిదా వేయాలని రేవంత్‌పై ఒత్తిడి వచ్చినట్లు సమాచారం.
అధిష్టానంతో సమన్వయ లోపం…
మంత్రివర్గ విస్తరణ ఆలస్యం కావడానికి పలు కారణాలు ఉన్నట్లు రాజకీయ విశ్లేషకులు అభిప్రాయపడుతున్నారు. ముందుగా రేవంత్ రెడ్డి, కాంగ్రెస్ అధిష్ఠానం మధ్య సమన్వయం లోపించడం ఒక ప్రధాన కారణంగా చెబుతున్నారు. రేవంత్ తనకు నమ్మకమైన వ్యక్తులను మంత్రివర్గంలో చేర్చాలని భావిస్తుండగా, అధిష్ఠానం మాత్రం పార్టీలోని వివిధ వర్గాలకు ప్రాతినిధ్యం కల్పించాలనే ఉద్దేశంతో ఉన్నట్లు తెలుస్తోంది. అలాగే రాష్ట్రంలో స్థానిక సంస్థల ఎన్నికలు సమీపిస్తున్న నేపథ్యంలో ఏ వర్గాన్ని నిరాశపరచకూడదనే జాగ్రత్తలో పార్టీ ఉన్నట్లు సమాచారం. ఈ సందిగ్ధతల మధ్య విస్తరణ ప్రక్రియ మరింత ఆలస్యమయ్యే అవకాశం ఉందని అంటున్నారు.
ఆశావహుల ఎదురుచూపు…
మంత్రివర్గ విస్తరణ జరిగితే కొందరు కీలక నాయకులు కేబినెట్‌లో చోటు దక్కించుకునే అవకాశం ఉందని రాజకీయ వర్గాలు అంచనా వేస్తున్నాయి. వీరిలో కోమటిరెడ్డి రాజగోపాల్ రెడ్డి, జి.వివేక్, సుదర్శన్ రెడ్డి, వి.శ్రీహరి వంటి పేర్లు ప్రముఖంగా వినిపిస్తున్నాయి. కోమటిరెడ్డి రాజగోపాల్ రెడ్డి గత ఎన్నికల ముందు బీజేపీ నుంచి కాంగ్రెస్‌లో చేరినప్పుడే హామీ తీసుకున్నట్లు చెప్తున్నారు. అలాగే వివేక్ కూడా మంత్రి పదవి ఆశిస్తున్న వారిలో ఒకరు. బీసీ వర్గం నుంచి శ్రీహరి, నిజామాబాద్ జిల్లా నుంచి సుదర్శన్ రెడ్డి పేర్లు కూడా చర్చలో ఉన్నాయి. అయితే రేవంత్ రెడ్డి వీరిలో కొందరిని వ్యతిరేకిస్తున్నారనే వాదనలు కూడా వినిపిస్తున్నాయి.
అసంతృప్తి…
మంత్రివర్గ విస్తరణ ఆలస్యం కావడంతో దాని కోసం ఎదురుచూస్తున్న ఆశావహుల్లో తీవ్ర నిరాశ వ్యక్తమవుతోంది. ఎప్పుడెప్పుడు కేబినెట్‌లో చోటు దక్కుతుందా అని ఆశగా ఉన్న వారికి తాజా పరిణామాలు ఆందోళన కలిగిస్తున్నాయి. కొందరు ఎమ్మెల్యేలు తమ ప్రయత్నాలు ఫలించకపోవడంతో అసంతృప్తితో ఉన్నట్లు తెలుస్తోంది. ఈ అసంతృప్తి పార్టీలో అంతర్గత సమస్యలకు దారితీసే అవకాశం ఉందని విశ్లేషకులు హెచ్చరిస్తున్నారు.
రేవంత్ వ్యూహం…
ప్రస్తుతానికి రేవంత్ రెడ్డి మరికొంత కాలం వేచి చూసే ధోరణిలో ఉన్నట్లు సమాచారం. తెర వెనుక పెద్దలతో మంతనాలు జరుపుతూ ఈ సమస్యకు పరిష్కారం కనుగొనే ప్రయత్నంలో ఆయన ఉన్నారని తెలుస్తోంది. రేవంత్ తనదైన శైలిలో ముందుకు వెళ్లాలని భావిస్తున్నప్పటికీ, అధిష్ఠానం ఒత్తిడి ఆయనకు పెద్ద సవాల్‌గా మారే అవకాశం ఉంది. ఈ మంతనాలు ఎటువైపు మళ్లుతాయి, ఎప్పుడు విస్తరణ జరుగుతుందనేది స్పష్టత రావాల్సి ఉంది.
రాజకీయ ప్రభావం ఎలా ఉంటుంది?
మంత్రివర్గ విస్తరణకు బ్రేక్ పడటం రాష్ట్ర రాజకీయాలపై ఎలాంటి ప్రభావం చూపుతుందనేది ఆసక్తికరంగా మారింది. ఒకవైపు అసంతృప్తి పెరిగితే పార్టీలో అంతర్గత కలహాలు తలెత్తే అవకాశం ఉంది. మరోవైపు స్థానిక సంస్థల ఎన్నికల్లో పార్టీ పనితీరుపై ఈ ఆలస్యం ప్రభావం చూపే అవకాశం ఉందని విశ్లేషకులు అంచనా వేస్తున్నారు. రానున్న రోజుల్లో ఈ వ్యవహారం ఎలాంటి మలుపులు తిరుగుతుందో చూడాల్సి ఉంది.
