ఎంపీల జీతాల దోపిడీ

పార్లమెంటు సభ్యులకు వేతనాలు పెంపు
– 475 మంది ఎంపీలు కోటీశ్వరులు…
– ఎంపీల సగటు ఆస్తి రూ. 20 కోట్లు… పెంపుపై మండిపడుతున్న జనం
– హెటెరో అధినేత, ఎంపీ బండి పార్థసారథి రెడ్డి ఆస్తి రూ. 5,300 కోట్లు
– మరో పార్లమెంటు సభ్యుడు అయోధ్య రామిరెడ్డి ఆస్తి రూ. 2,577 కోట్లు

సహనం వందే, హైదరాబాద్:
మన దేశంలో చట్ట సభలకు ఎన్నిక అవ్వాలంటే కోట్ల రూపాయలు ఖర్చు పెట్టాల్సిందే. అలా కోట్లకు కోట్లు ఖర్చుపెట్టి చట్టసభలకు ఎన్నికైన వారికి నెలవారి జీతం లెక్కే కాదు. కానీ వారికి నెలవారి వేతనాలను దాదాపు పావు వంతు పెంచుతున్నట్లు పార్లమెంటు నిర్ణయించింది. పార్లమెంటు సభ్యులకు ప్రస్తుతం ఉన్న రూ. లక్ష జీతాన్ని రూ. 1.24 లక్షలకు పెంచింది. అసలే ఆర్థిక మాంద్యం… ఆపై ప్రభుత్వాలు తీవ్ర అప్పులు చేస్తున్న సమయంలో పార్లమెంటు సభ్యులు వేతనాలను పెంచడం అవసరమా అనేది దేశ పౌరుల్లో ఇప్పుడు జరుగుతున్న ప్రధాన చర్చ. ఏడిఆర్ సర్వే ప్రకారం మన పార్లమెంటు సభ్యుల సగటు ఆస్తి రూ. 20 కోట్లకు పైనే. అలాంటివారికి జీతాలు పెంపు అవసరమా అన్న విమర్శలు వస్తున్నాయి.
జీతాలు, పెన్షన్ల పెంపు...
కేంద్ర ప్రభుత్వం పార్లమెంటు సభ్యుల జీతాలను రూ.1 లక్ష నుంచి రూ. 1.24 లక్షలకు, రోజువారీ భత్యాన్ని రూ.2,000 నుంచి రూ.2,500కు, మాజీ సభ్యుల పెన్షన్‌ను రూ. 25,000 నుంచి రూ.31,000కు, అదనపు పెన్షన్‌ను రూ.2,000 నుంచి రూ.2,500కు పెంచింది. ఈ నిర్ణయం 2023 ఏప్రిల్ 1 నుంచి అమల్లోకి వస్తుంది. ద్రవ్యోల్బణం సాకుతో ఈ పెంపును సమర్థిస్తున్నప్పటికీ, ఇది ప్రజల ఖజానాను కొల్లగొట్టే పథకంగా కనిపిస్తోంది. ఇలాంటి చర్య ఎవరి కోసం?
ధనిక సభ్యుల సంపద…
అసోసియేషన్ ఫర్ డెమోక్రటిక్ రిఫార్మ్స్ (ఎడిఆర్) లెక్కల ప్రకారం, 17వ లోక్‌సభలో సభ్యుల సగటు ఆస్తి రూ.20.93 కోట్లు. 543 మందిలో 87% కోటీశ్వరులు, 90% మందికి కనీసం రూ.1 కోటి ఆస్తులున్నాయి. 475 మంది కోటీశ్వరులేనని తెలిపింది. అత్యధిక సంపద గలవారిలో బండి పార్థసారథి రెడ్డి (రూ.5,300 కోట్లు), అయోధ్య రామిరెడ్డి (రూ.2,577 కోట్లు), జయ బచ్చన్ (రూ.1,001 కోట్లు) ఉన్నారు. ఇంత సంపద ఉన్నవారికి నెలకు రూ. 24,000 అదనంగా పెంచడం వల్ల ప్రభుత్వం ఎలాంటి సిగ్నల్ ఇస్తుందని ప్రశ్నిస్తున్నారు. ఈ జీతాలు వీరి ఆస్తుల్లో చిల్లిగవ్వలాంటివి కావా?
అత్యధిక సంపద గల టాప్ 10 మంది…
1. బండి పార్థసారథి రెడ్డి (బీఆర్ఎస్, తెలంగాణ) – రూ.5,300 కోట్లు: హెటెరో వ్యాపారవేత్త.
2. అయోధ్య రామి రెడ్డి (వైఎస్ఆర్సీపీ, ఆంధ్రప్రదేశ్)- రూ.2,577 కోట్లు: రామ్‌కీ వ్యవస్థాపకులు.
3. జయ బచ్చన్ (ఎస్పీ, ఉత్తరప్రదేశ్) – రూ.1,001 కోట్లు: సినిమా, రియల్ ఎస్టేట్.
4. నకుల్ నాథ్ (కాంగ్రెస్, మధ్యప్రదేశ్) – రూ.716 కోట్లు: కమల్ నాథ్ వారసుడు.
5. డి.కె. అరుణ (బీజేపీ, తెలంగాణ)- రూ.683 కోట్లు: వ్యాపార నేపథ్యం.
6. హర్దీప్ సింగ్ పూరి (బీజేపీ, ఉత్తరప్రదేశ్)- రూ.650 కోట్లు: కేంద్ర మంత్రి, రియల్ ఎస్టేట్ వ్యాపారి.
7. రవీంద్ర కిషోర్ సిన్హా (బీజేపీ, బీహార్) – రూ.500 కోట్లు: ఎస్ఐఎస్ భద్రతా సంస్థ వ్యవస్థాపకుడు.
8. కంభంపాటి హరిబాబు (బీజేపీ, ఆంధ్రప్రదేశ్)- రూ.450 కోట్లు: వ్యాపార నేపథ్యం.
9. పరిమల్ నాథ్వాణీ (స్వతంత్ర, జార్ఖండ్) – రూ.400 కోట్లు: రిలయన్స్ సంబంధం.
10. సుప్రియా సూలే (ఎన్సీపీ, మహారాష్ట్ర)- రూ.350 కోట్లు: శరద్ పవార్ కుమార్తె.
ఇంత సంపద ఉన్నవారికి జీతాలు ఎందుకు? ఈ పెంపు హాస్యాస్పదం కాదా?

కర్ణాటకలోనూ రెట్టింపు జీతాలు…
కర్ణాటకలో ముఖ్యమంత్రి జీతం రూ.1 లక్ష నుంచి రూ.2 లక్షలకు పెంచారు. ప్రతిపక్షాలు “ప్రజలు కష్టాల్లో ఉంటే, ప్రతినిధులు జేబులు నింపుకుంటున్నారు” అని ఆగ్రహించాయి. హోం మినిస్టర్ జి. పరమేశ్వర “ప్రజా ప్రతినిధుల ఖర్చులూ పెరిగాయి, బతకాలి కదా?” అన్నారు. కోట్ల సంపద ఉన్నవారికి ఈ బతుకుడు నాటకం ఎందుకు?
ప్రపంచంలో తక్కువ జీతాలున్న ఎంపీలు…
ఉక్రెయిన్‌లో ఎంపీకి నెలకు జీతం రూ.60,000-70,000, నైజీరియాలో రూ.50,000 కంటే తక్కువ, శ్రీలంకలో రూ.40,000 లోపే జీతాలున్నాయి. ఆ దేశాల సభ్యులు తక్కువ జీతాలతో సేవ చేస్తుంటే, భారత్‌లో కోట్ల సంపద గలవారికి ఈ జీతాల ఆడంబరం ఎందుకు? ఇది సిగ్గుచేటు కాదా?
ప్రజలపై భారం: ఈ దోపిడీ ఎవరి కోసం?
ఈ పెంపు ఖజానాకు సంవత్సరానికి వందల కోట్ల అదనపు భారం వేస్తుంది. సామాన్యులు పన్నులతో నలిగిపోతుంటే, ఉచిత విమానాలు, వసతులతో సుఖిస్తున్న ఈ ధనిక సభ్యులకు ఇంకా ఎందుకు ఈ దయ? ఈ డబ్బుతో విద్య, ఆరోగ్య రంగాలు అభివృద్ధి చెందవచ్చు. అయినా ఈ దురాశ ఎందుకు? బండి పార్థసారథి, అయోధ్య రామిరెడ్డి లాంటి కోట్ల సంపద గలవారికి ఈ జీతాలు అవసరమా? ఎడిఆర్ లెక్కలు ఈ దోపిడీని బయటపెడుతున్నాయి. ప్రజాధనాన్ని కొల్లగొట్టే ఈ చర్యను ఉపసంహరించకపోతే, ప్రజలు ఈసడించుకుంటారు.